¹ Omo mu mayuwa ao Joani mukakukolovethza weile kufundisha mumbulwa kukutu omu Judea kuamba ci, ² ''Muhumbe, mukonda ofumu o kuwilu uli popepi.'' ³ Mukonda oyu yoliyo aambile ko mupolofita, Isaya, kuamba ci, ''Liywi lyoyu kuwelela mumbulwa kukutu, 'Muloishe likun'wa lya Fumu, muolole makun'wa enji.''' ⁴ Honi Joani wavatile shikanda sho ohunga o kamele no kulianga mwiya oshikanda mumbunda thzenji. Ilya yenji neli mbimba no oki. ⁵ Honi Jelusalema, Judea yomuhe, no shivaka shoshihe kuthzinguluka lwale lo Jodani awopo akeya kukwenji. ⁶ Awopo akolovethziwa kukwenji mu lwale lo Jodani, kwalitongola ivi yo. ⁷ Unone apa amonine ungi wo Afalisi no Asaduki kwakeya kukwenji kunakolovethziwa, ayepo wambela ci, ''Amwe ana ipili, elye naminangula ci muyape kuanji oukeya? ⁸ Nehoni muime oshuka ou umonisha kuhumba. ⁹ Lelo mwa anekele kuamba mukaci kenu ci, 'Tuli no Abrahama tata wetu.' Mukonda namiambela ci Nyambi atwesha kukwamena Abrahama ana shianga kutunda apa pa mawe. ¹⁰ Ne kamo kanapakiwa kale pa muthzithzi wo itondo. Nehoni shoshihe shitondo shikana kuima oshuka ouwa shashinjiwa no kushikonjela mu mulilo. ¹¹ Namikolovethza no meyu ci muhumbe. Unone oyu keya munyima thzange oli noukolo kunipita, kalo kanitwesha shianga kumushimbela makatulo enji. Aye kenge namikolovethza no mupepo oukenu no mulilo. ¹² Lyendeko lyenji lili mulyoko lyenji ci akombe pa shilambo no kuungumeka uloto wenji mushishete. Unone kenge atumeka kalaalela no mulilo okukana kuthzimana.'' ¹³ Nehoni Jesu ayepo keya kutunda ku Galilea kuthza ku lwale lo Jodani ci akakolovethziwe kwa Joani. ¹⁴ Unone Joani waelekile kumukanena, kuamba ci, ''Yame niloela kukolovethziwa kukoye, kalo owe wakeya kukwange?'' ¹⁵ Jesu po mutawa nokuamba ci, ''Onitawethze honi, mukonda kwa loela ci tumanenene yoihe yo kuluka.'' Nehoni Joani po mutawethza. ¹⁶ Ou amanine kukolovethziwa, wanguwangu Jesu po tunda mumeyu, ne popo mwene, liwilu alyopo limuyanjulukela. Ayepo mona mupepo wa Nyambi okulipitula eci likuci ko ukeya kunakala peulu thzenji. ¹⁷ Popo mwene, liywi alyopo likeya kutunda kuwilu koliamba ci, ''Oyu yoliyo mwanange nihima. Nina mukulupela nene.''