¹ Munyima thzo kushamulukiwa kwa Jesu mu Betelehema omu Judea koku vuthsa Fumu Heroda, akwelume okulifundisha awa atundile kumuve yuwa akumine mu Jelusalema awopo aamba ci, ² "Kupi ali oyu neelekiwa Fumu o Majuda? Natumono litungwethzi lyenji kumuve yuwa otuna keye eci natumulombele." ³ Honi Fumu heroda ou ayuvile ei, waanjipile, wahe omu Jelusalema aanjipile. ⁴ Heroda ayepo waneka akulu omapulisita no an'oli, ne ayepo wepula ci, "Kupi ana loela kuelekeliwa kilesite?" ⁵ Wa mutawile, "Mu Betelehema omu Judea, mukonda ei yoliyo yan'oliwile ko mupolofita ci, ⁶ 'Unone owe, Betelehema, omulitunga lya Juda, kali omuonye nene mukaci ko aendishi o mu Juda, mukonda kukoe kenge kwa kutunda muendishi, oyu wakulisha anu ange o Isilaele. ⁷ Honi Heroda ayepo ishela akwelume o kulifundisha kumukunda no kukawepula esho shikati shemwa elyo litungwethzi nalimonahala. ⁸ Ayepo watuma ku Betelehema, no ku aamba ci, "Muthze muka fotishishe shiwana yoyo mwanuke. Apa muka muwana, namu nitongwele eci name nika mulombele." ⁹ Munyima thzo kuyuva kwa Fumu, awopo athza, litungwethzi eli amonine kumuve yuwa lya waendile posho kupitela ou lya kakumine no kukemana peulu thza po akalile mwanuke. ¹⁰ Ou amonine litungwethzi, anyanyukile ko shinyanyu sho shikulu. ¹¹ Awopo aingena mu njiyo no kumona kambu na njina Maria. Awopo akinyama pashi no kumulombela. Ayanjululile mikotana thzo no kumupa ipiwa yo Gauda, Insense, no Mira. ¹² Nyambi ayepo watongwela kutulo eci katele hahukele kwa Heroda, awopo ahuka ku litunga lyo ko likun'wa lyalyo. ¹³ Kwana huka, lingeloi lya Fumu lya monahalile kwa Josefa kutulo alyopo limuambela ci, "Opinduke, oshimbe kambu na njina, ocilele ku Engepita. Kokekala shime ou nakukutongwela, mukonda Heroda kenge akufota tumbu ci tupaiwe." ¹⁴ Oshiku wo Josefa ayepo pinduka no ku shimba kambu na njina no kucilela mu Engepita. ¹⁵ Kwa kakalile kutwala pa kufa kwa Heroda. Ei kuma yayalishelelile ei ya ambiwile ko Fumu ko mupolofita, kuamba ci, "Ninesha mwanange kutunda mu Engepita." ¹⁶ Honi heroda, ou amonine ci anamuangela akwelume okulifundisha, wa anjipile nene. Ayepo tuma eci apae anuke owa kwelume awali mu Betelehema no omo mu litunga momuhe o myaka thzili kuhusha munyima, kuthza ko shikati eshi ambile akwelume okulifundisha. ¹⁷ Honi mukengeyo kwakwamahalile ei ya ambiwile ko mupolofita Jeremia, kuamba ci, ¹⁸ "Kakumbo kana yuvahala mu Rama, kulila ko shililo shoshikulu, Rachelu alila anenji, ne akana kuhengahengiwa mukonda anenji wahe kaliko." ¹⁹ Heroda konafu, apo mwene, lingeloi lya Fumu lya limonahalishile kwa Josefa kutulo mu Engepita no ku amba ci, ²⁰ "Opinduke ne oshimb mwanuke na njina othze ku litunga lyo Isilaele, mukonda awa na foto kupaa mwanuke anafu." ²¹ Josefa ayepo pinduka, no kushimba mwanuke na njina, no kukeya ku litunga lyo Isilaele. ²² Unone oyu ayuvile ci Arikelausi yoliyo vuthsa Judea kushwana tata wenji Heroda, wa yapile kuthza ko. Nyambi kona mana ku muambela kutulo, wa thzile ku litunga lyo Galilea ²³ no kuthza kukatunga mu mbongi thziishiwa Nathzaleta. Eii kuma yaylishelelile ei ya ambiwile ko apolofita, ci kenge akuishiwa ci mu Nathzareni.