¹ Buka thzo mundandwe o shikuta sha Jesu kilesite, mwana Davida, mwana Abrahama. ² Abrahama neli tata wa Isaka, Isaka tata wa Jakovo, Jakovo tata wa Juda naa minenji. ³ Juda neli tata wa Perezi na Zeraha o kwelekisha kwa Tamare, Perezi tata wa Heziloni, Heziloni tata wa Rama. ⁴ Rama neli tata wa Aminadabi, Aminadabi tata wa Nashoni, Nashoni tata wa Salumoni. ⁵ Salumoni neli tata wa Boazi o kwelekisha kwa Rahabu, Boazi tata wa Obedi o kwelekisha kwa Ruti, Obedi tata wa Jese. ⁶ Jese neli tata wa Fumu Davida, Davida tata wa Solomoni o kwelekisha kwa Uria. ⁷ Solomoni neli tata wa Rehoboami, Rehoboami tata wa Abija, Abija tata wa Asa. ⁸ Asa neli tata wa Jehoshafati, Jehoshafati tata wa Jorami, Jorami yo kuku owa Uzia. ⁹ Uzia neli tata wa Jotami, Jotami tata wa Ahazi, Ahazi tata wa Hezekia. ¹⁰ Hezekia neli tata wa Manase, Manase tata wa Amoni, Amoni tata wa Josia. ¹¹ Josia neli kuku wa Jekonia naa apenji mu shikati eshi awa twalile mu Babilona. ¹² Kutunda pa kuthza mu Babilona, Jekonia neli tata wa Shiatiele, Sheatiele neli kuku wa Zerubabele. ¹³ Zerubabele neli tata wa Abiudi, Abiudi tata wa Eliakimi, Eliakimi tata wa Azori. ¹⁴ Azori neli tata wa Zadoki, Zadoki tata wa Akimu, Akimu tata wa Eliudi. ¹⁵ Eliudi neli tata wa Elizare, Elizare tata wa Matani, Matani tata wa Jakovo. ¹⁶ Jakovo neli tata wa Josefa munu wa Maria, oyu welekile Jesu, oyu wishiwa kilesite. ¹⁷ Thzo thzihe mikuta kutunda kwa Abrahama kutwala kwa Davida neli mikuta likumi no mikuta thzine, kutunda kwa Davida kukuma apa awa twalile ku Babilona neli mikuta likumi no mikuta thzine, kalo kutunda apa awa twalile ku Babilona ku twala kwa Kilesite mikuta likumi no mikuta thzine. ¹⁸ Kwelekiwa kwa Jesu Kilesite shime kwakalile kenge. Mama wenji, Maria, neli amuungekela eci amuyeke Josefa, unone honi kwa shime kuli yeka, wathzile polemu ko okolo omupepo oukenu. ¹⁹ Unone Josefa, munu wenji, neli munu omuwawa ne kafotile kumuenisha pa mungi, wa anekelile ku mukana ko kukana kulimuka anu. ²⁰ Apa aanekelile eyi enu, lingeloi lya Fumu lya limonahashile kukwenji kutulo, alyopo liamba ci, "Josefa mwana Davida, wayapa kushimba Maria eci akale munu woe, mukonda eshi shina mupaka polemu mupepo oukenu. ²¹ Kenge akushamuluka mwana omu kwelume, ne kenge wa kumuta lithzina lyo Jesu, mukonda kenge akuyoyisha anu enji ku ivi yo." ²² Ne yoihe ei kuma yakwamahalile kuyalishelela eyi ya ambiwile ko Fumu ko mupolofita, ku amba ci, ²³ "Mumone, liungu kenge akukala polemu ne kenge akushamuluka mwana omukwelume, kalo kenge akumwisha lithzina lyenji ci Emanuele"- kuamba ci, "Nyambi oli netu." ²⁴ Josefa ayepo pinduka ne ayepo kwama eci omu lya mutumenenine lingeloi lya Fumu, ne ayepo mushimba kukala munu wenji. ²⁵ Unone kaliwanine kupitela apa aka ashamulukelelile mwana omukwelume. Ne ayepo muta lithzina lyo Jesu.