¹ Honi mashikushku, wahe akulu o apulisita na akulu o mbunga aliwanine kuatulela Jesu lifu. ² Awopo amuanga, kuutwala, no kukamupa mumoko a Pilato mukakuendisha anu. ³ Honi Judasi oyu wapitekile Jesu, apa amonine ci Jesu onaatuleliwa lifu, ayepo humba no kuhusha mali o silivera o makumi ahatu kwa apulisita owakulu na akuu, ⁴ no kuamba ci, ''Ninakwama shivi ko kupiteka manyinga okupila mulandu.'' Unone awopo aamba, ''Eyo ine kukwetu? Owe oimone.'' ⁵ Nehoni ayepo kakonjela mali o silivera mutempele, no kundunamo, no kuthza pola kukalihonda. ⁶ Akulu o apulisita awopo ashimba ao mali nokuamba, ''Kakuloile ci tupake aa mali mushitulekelo mukonda a muulo o manyinga.'' ⁷ Awopo ambaula eyo imba pofoci, ne awopo ashimba ao mali kukaula shilwa sha mukakuumba tunyungu mokuvumbekanga enda. ⁸ Mukonda wei esho shilwa shaishiwa, ''Shilwa sho manyinga'' kuleta no lelo lino. ⁹ Nehoni ei yaambiwile ko Jeremia mupolofita inaliyalishelela, kuamba ci, ''Anashimbi makumi ahatu o silivera muulo anatomo ana Isilaele pa ilama yenji, ¹⁰ ne anulu shilwa sha mukakuumba tunyungu, eci eli ananiambela Fumu.'' ¹¹ Honi Jesu ayepo imana pa posho thza mukakuendisha anu, ne ayepo muipula, ''Yowe fumu o Majuda?'' Jesu po mutawa, ''Onaamba.'' ¹² Unone apulisita oakulu na naakulu ou amulundelile iamba kawatawile. ¹³ Nehoni Pilato ayepo muambela, ''Koyuvu milandu ethzi akulundela?'' ¹⁴ Unone katawile liywi shanga lyofoci, kuninga ci oyo mukakuendisha anu kuma akomokile manene. ¹⁵ Honi pa mukiti wo paseka mukakuendisha kuma awatundishelangile munu yofoci mukamenga oyu anahangula mbunga. ¹⁶ Mushikati esho kuma kwakalile mukamenga munu okukana kuyuva olithzina lyo Barabasi. ¹⁷ Honi apa aliwanine pofoci, Pilato po amba kukwo, ''Elye mufota ci nimipunishele?'' Barabasi, nji Jesu oyu ishiwa Kelesite?'' ¹⁸ Kuma alimukile ci kuma atambekile Jesu mumoko enji mukonda o shipululu. ¹⁹ Kunakala pa shipula shenji sho kuatulela, munu wenji po tuma liywi kukwenji no kuamba, ''Lelo wamukwama shimweya oyo munu okupila mulandu. Mukonda lelo kuma ninanyanda manene ko shilota ninakala nasho shenji.'' ²⁰ Honi akulu o apulisita na akulu kuma ahongaulile mbunga ci alombe kuwapunishela Barabasi, ci Jesu aye apaiwe. ²¹ Mukakuendisha anu ayepo waipula, ''Kwawa eli yupi mufota ci nimipunishele?'' Awopo aamba , ²² ''Barabasi.'' Pilato po amba kukwo, ''Nikwame ngepi Jesu oyu ishiwa Kelesite?'' Wahe awopo atawa, ''Angongoteliwe.'' ²³ Nehoni ayepo amba, ''Ine, upi omango anakwama?'' Unone mbeci akuwelele manene, ''Angongoteliwe.'' ²⁴ Honi Pilato ou amonine ci kwithsa eshi atwesha kukwama, unone miyoyo athzopo thzitateka, ayepo shimba meyu, ayepo lihupa ku moko pa posho thzo mbunga, nokuamba ci, ''Kanili no mulandu mu unyinga oyu munu. Amwe muimone.'' ²⁵ Anu wahe awopo amba, ''Onyinga wenji ukale peulu thzetu na anetu.'' ²⁶ Nehoni ayepo wapunishela Barabasi, unone ayepo mwashula Jesu no shivanthzi ne ayepo mutambeka kukwo ci akamungongotele. ²⁷ Nehoni mashwalale a mukakuendisha anu awopo ashimba Jesu kumutwala mu kuta nokukawaneka mashwalale wahe. ²⁸ Awopo amuhulula no kumusika shito sho shikihu. ²⁹ Awopo akwama tepa thzo shitondo sho miondo nokumuvateka thzo kumutwi, no kumupaka limbungu mulyoko lyenji lyo shilyo. Awopo atongwama kuman'wi pa posho thzenji, awopo amukuyathzana, kuamba ci, ''Yosho, Fumu wo Majuda!'' ³⁰ Awopo amuthsipawela mate, awopo ashimba limbungu kumufulisha ku mutwi kuhukahukela. ³¹ Ou amanine kumuhendaula awopo amuhulula shito amuvatekile no kumuvateka evata yenji, ne awopo amutwala kukamungongotela. ³² Ou apunine, awopo awana mukwelume oyu watundile ku Sirene lithzina lyenji Simoni, oyo aotelelile kuthza no ci ashimbe mbinda thzenji. ³³ Awopo akuma ku shivaka shiishiwa Gologota, koliyo kuamba ci, ''Shivaka sho shikola sho mutwi.'' ³⁴ Awopo amupa waine okuvandakana no ndulu. Unone ou alathsileko, ayepo kana kunwa. ³⁵ Ou amanine kumungongotelela, awopo ayataula evata yenji no kuliela yo, ³⁶ ne awopo akala pashi kumunyunga. ³⁷ Peulu o mutwi wenji apakilepo lin'olo lyo mulandu wenji eli liamba ci, ''Oyu yoliyo Jesu Fumu o Majuda.'' ³⁸ Ethzi(akakuipiwha) eli kuma awangongotelile pofoci nenji, yofoci ku shilyo shenji kalo yumwaeya kushimoho. ³⁹ Awa apitangile mulikun'wa nawo kuma amutukathzanine, kwa kinisha mitwi thzo ⁴⁰ no kuamba ci, ''Owe watwesha kuumbulula tempele no kuthziumba mu mayuwa ahatu, oliyoishe! Ngeci yowe mwana Nyambi, oshuluke apo pa mbinda!'' ⁴¹ Mushifwa shofoci akulu o apulisita nawo kuma amukumaelile, pofoci na an'oli na akulu kwamba ci, ⁴² ''Kuma nayoishanga aenjenji, unone katwesha kuliyoisha. Yoliyo Fumu o Isilaele. Ashuluke pa mbinda, nehoni henge tulitawa kukwenji. ⁴³ Onakulupela kwa Nyambi, Honi Nyambi amuamwene, ngeci Nyambi atawa kumutundisha. Mukonda kuma ambile ci, 'Yame mwana Nyambi.''' ⁴⁴ Mushifwa shofoci ethzi(akakuipisha) awa angongotelile pofoci nenji nawo ambile maywi o matuka kukwenji. ⁴⁵ Honi kutunda pa shikati sho 12:00hours milelema thzopo thzithsika litunga lyolihe shime kukakuma shikati sho 15:00hours. ⁴⁶ Mushikati sho 15:00hours, Jesu po lila no liywi yoshokulu no kuamba ci, ''Eli, Eli, lama sabakatani?'' Kokuamba ci, ''Nymbi wange, Nyambi wange ine onanishiyelela?'' ⁴⁷ Wamweya awa aimanine oko ou ayuvile hengeyo, awopo amba ci ''Aisha Elia.'' ⁴⁸ Popo mwene yofoci kukwo ayepo ndandumuka no kukashimba shiponji, ayepo kashiombeka mu waine okuwawata ayepo shihomeka ku limbungu, nokushimupa ci anwe. ⁴⁹ Ungi wo awopo amuambela ci, ''Omushiye yofoci. Tumone ngeci Elia henge akeya kunamuyoisha.'' ⁵⁰ Honi Jesu ayepo lila no liywi lyoshokulu kalo ne ayepo hula moyo. ⁵¹ Nehoni, lwambi lo mutempele po luyatua pakaci kutakela kuwilu kuleta kushi, litunga po lingunga, mawe aopo ayatuka. ⁵² Mambumbo aopo ayanjuluka, ne elama ya anu o luka awa nalalamo ayopo ipinduliwa. ⁵³ Andundile mu mambumbo munyima thzo kupinduka kwenji kwa afu, no kuingena mu mbondi thzo thzikenu, no kukamonahala kwa anu owangi. ⁵⁴ Honi mukakuendisha mashwalele nawa natanekala Jesu ou amonine litunga ko lilingunga no enu ei yakwamahalile, ayapile nene no kuamba ci, ''Yoshemwa oyu neli mwana Nyambi.'' ⁵⁵ Ambuyama owangi awa ashupwelile Jesu kutunda ku Galilea kunakala nenji kuma aimanenine kokule kwanatanekela. ⁵⁶ Mukaciko kwakalile Maria Magadalena, Maria mama wa Jakobo na Josefa, no mama wa ana a Zebedea. ⁵⁷ Lungulo ou lwakumine, akopo kukeya mukwelume o kufuma kutunda ku Arimatea, olithzina lyo Josefa, oyo naye neli mufunfishiwi wa Jesu. ⁵⁸ Ayepo thza kwa Pilato kukalomba elama ya Jesu. Nehoni PIlato ayepo tuminina ci aimupe. ⁵⁹ Josefa po shimba elama, kuivungela mu shito shohsikenu, ⁶⁰ no kukaipaka mu mbumbo thzenji thzothzipe ethzi acakulile muliwe.Nehoni ayepo thzingulukishelako liwe kuyanjela kushelo thzo mbumbo ne ayepo lithzela. ⁶¹ Maria Magadalena na amweya owangi kwakalile, kwnakala kunyonga thzo mbumbo. ⁶² Liyuwa lyahatileko, liyuwa kutunda pa kuliloishela, Akulu o apulisita na Afalisi aliwaninepofoci na Pilato. ⁶³ Awopo amba ci, ''N'athsile, twavuluka ci oyu mukakuangela kushiyoya, kuma aambile ci, 'Munyima thzo mayuwa ahatu henge nakupinduka kalo.' ⁶⁴ Cohoni otuminine ci mbumbo thzinyungiwe kukakuma liyuwa lyomushihatu, apa kukana kuningiwa hengeyo afundishiwi enji henge akeya no kunamuithza nokukamabela anu ci, 'Onapinduka kwa afu,' ne oku kuangela ko mahulelo henge kuninga kokulu kupita ko mutatekelo.'' ⁶⁵ Pilato po wambela ci, ''Mutwaleko mukakunyunga. Muthze mukathzinyunge omu mutweshela momuhe.'' ⁶⁶ Honi awopo athza kukanyunga mbumbo, awopo apaka liswayo pa liwe nokupakako mukakunyunga.