¹ Honi lyo Sabata, ou nalihenyena ku liyuwa lyo mutatelo mu sunda, Mary Magadalena no Mary yumweya kuma akeile kunamona mbumbo. ² Mumone, kuma kwakalile kulingunga ko kaye kokukulu, mukonda lin'eloi lya Fumu kuma lyaulumukile kutunda kuwilu, lyakeile no kuna alumuna liwe, no kukongomana po. ³ Kuma nalimonahala eci liyeye, no eto yalyo kuma yamonahalile okenu eci litwa. ⁴ Akakunyunga mbumbo awopo atutuma ko kuyapa awopo apiluka eci okufa. ⁵ Lin'eloi alyopo liambela ambuyama ci, ''Mwayapa, mukonda nalimuka ci mwafota Jesu, oyu nangongoteliwa. ⁶ Kalimo, unone onapinduka, eci eli ambile. Mukeye namumone shivaka apa nalala Fumu. ⁷ Muyakame muthze mukatongwela afundishiwi enji ci, ''Onapinduka kwakakufa. Mumone amienda kuposho kuthza ku Galilea. Kenge muka mumona ko.' Mumone ninamiambela.'' ⁸ Wanguwangu ambuyama awopo ashiya mbumbo kwanayapa no kunyanyuka manene, ne awopo andandumuka kukatongwela afundishiwi. ⁹ Mumone, Jesu ayepo liwana no ne ayepo wa ambela ci, ''Shangwenu!'' Ambuyama awopo akeya, kunamukwata ku maulu no kumulombela. ¹⁰ Nehoni Jesu ayepo wambela ci, ''Mwayapa. Muthze mukatongwele apange ci athze ku Galilea. Koliyo akanimona. ¹¹ Honi ambuyama kwathza, mumone, akakunyunga mbumbo wamweya awopo athza mu mbongi no kuka ambela apulisita owakulu enu yoihe ei naikwamahala. ¹² Apulisita ouwakulu awopo aliwana na akulu kuamba ei iamba, awopo apa mali oangi kwa mashwalale ¹³ no kuwa ambela ci, ''Muambele anu wamweya ci, 'Afundishiwi a Jesu kuma nakeya ushiku kotunalala no kunaithza elama ya Jesu.' ¹⁴ Ngeci ou muambelo po ukuma kwa muvuthsithsi, kenge atawa ne pomuma kamivilaela.'' ¹⁵ Mashwalale po ashimba mali no kukwama eli na ambeliwa. Ou muambelo awopo uyanduluka ku Majuda wahe ne no lelo lino ou muambelo koushili. ¹⁶ Unone afundishiwi o likumi noyofoci awopo athza ku Galilea, ku mukinya oku awa ambelile Jesu. ¹⁷ Ou amumonine, awopo amulombela, unone wamweya kuma asheununine. ¹⁸ Jesu ayepo keya kukwo no kuamba no ayepo amba ci, ''Ninapiwa okolo ouhe muwilu no pakaye. ¹⁹ Honine muthze mukwame afundishiwi mu matunga oahe. Muwakolovethze mulithzina lya Tata, lyo Mwana, neli lyo Mupepo Oukenu. ²⁰ Muwafundishe kumamela enu yoihe ei ninamituminina. Mumone, nekala nenu shikati shoshihe, kuka kuma kuhula o enu yoihe.''