¹ ''Nehoni ofumu o kuwilu kenge wakulipitula weci ambanda likumi awa ashimbile malambi o no kuthza kukaliwana na mukakuyeka. ² Omutanu kukwo akalile etomba ne awa omutanu akalile anyanyami. ³ Ne awa ambanda o itomba ou ashimbile malambi o, kashimbile maathzi. ⁴ Unone awa ambanda owa nyanyami po shime ashimbile maathzi mu itofota no mu malambi o. ⁵ Ne mukakuyeka ou athzihamine awopo akosha ne awopo a lala. ⁶ Unone pakaci ko ushiku akopo kuyuvahala kukuwelela, 'Mumone, mukakuyeka! Mupune mukaliwane nenji.' ⁷ Nehoni wahe awo ambanda po apinduka no kuyumisha malambi o. ⁸ Awa oitomba po amba kwawa owa nyanyami, 'Mutupe ku maathzi enu mukonda malambi etu athzima.' ⁹ ''Unone owa nyanyami po awatawa no kuamba, 'Mukuninga ci katukwana atwe namwe, muthze lika kwa kakuulisha muka liulele enu.' ¹⁰ Mushikati athzile kukaula, mukakuyeka po keya, ne awa aliloishelile awopo athza nenji ku mukiti o maluwo, ne kushelo po kuyanjeliwa. ¹¹ ''Munyima awo ambanda wamweya po akuma no kuna amba, 'N'athsile, n'athsile, otu yanjululele.' ¹² ''Unone po watawa nokuamba ci, 'Yoshemwa namiambela ci, kanimilimuka.' ¹³ Nehoni mukenge, mukonda kamulimuka liyuwa nji shikati. ¹⁴ ''Mukonda kwalipitula weci mukwelume oyu wathzile mulitunga limweya. Po isha angamba enji no kuapa lufumo lwenji. ¹⁵ Yumweya ayepo mupa matalenta mutanu, koyu umweya po mupa eli, ne ko yumweya kalo po mupa talenta thzofoci. Munu no munu watambulile enu kuthza mukutwesha kwenji, ne oyo mukwelume po thza mu muendo wenji. ¹⁶ Oyu watambulile matalenta mutanu po thza nokuka akwamisha nepo wana kalo matalenta mutanu. ¹⁷ Mushifwa shofoci, oyu watambulile matalenta eli wawaninepo kalo matalenta eli. ¹⁸ Unone oyo ngamba watambulile talenta thzofoci po thza, kuka shima liteke mumuve nokukaholekamo mali a n'athsile wenji. ¹⁹ Honi munyima thzo shikati shoshile n'athsile wao angamba po huka no kunafotishisha eli anakwama awo angamba. ²⁰ Ngamba watambulile matalenta mutanu po keya nokuleta matalenta amweya o mutanu kalo. Po amba, ' N'athsile, hime wanipile matalenta mutanu. Omone nina wanenapo kalo matalenta mutanu.' ²¹ ''N'athsile wenji po muambela, 'Onakwama shuwana, ngamba omuwa no kusepahala! Onasepahala pa inu yoshonye. Kenge nikupaka kuendisha inu yoingi. Oingene mukunyanyuka kwa n'athsile oye.' ²² Mupika watambulie matalenta eli po keya noku naamba ci, 'N'athsile, hime wanipile matalenta eli. Omone, ninawanenapo kalo matalenta eli.' ²³ ''N'athsile wenji po muambela, 'Onakwama shuwana, ngamba omuwa noku sepahala! Onasepahala pa inu yoshonye . Kenge nikupaka kuendisha inu yoingi . Oingene mukunyanuka kwa n'athsile oye.' ²⁴ Honi ngamba watambulile talenta thzofoci po keya nokunamba ci, 'N'athsile, nalimuka ci omunu omukalu. Wakutula omu wakanine kukuna, ne kalo waungumeka omu wakanine kuhasa. ²⁵ Shime nani yapa, po nithza kukaholeka talenta thzoye mumuve. Omone, inu yoye ei.' ²⁶ ''Unone n'athsile wenji po mutawa no kumuambela ci, 'Owe ngamba shomango no uva, walimukile ci nakutula omu nakanine kukuna no kuungumeka omu nakanine kuhasa. ²⁷ Nehoni waloelile kutwala mali ange kwaka mapanga, ne ounga ninahuka inga ninatambula mali ange neshi sho peulu. ²⁸ Nehoni mumunyange talenta muthzipe ngamba oyu li no matalenta likumi. ²⁹ Mukonda yomuhe oyu li nei yoingi, henge akupiwa- kupiwa muungi. Unone koyu napili shinu, hianga eshi ali nasho henge akunyangiwa sho. ³⁰ Mukonjele oyu ngamba okupila okwthsi mu milema thzo pola, oku kukakala kulila no kukweca maeo.' ³¹ Mwana munu apa akukeya mukutethzima kwenji no mangeloi oahe kwali nenji, ne henge akukala mu shipula shenji sho ufumu sho kutethzima. ³² Anu wahe kenge akukala pa posho thzenji, ne kenge akutepa anu, eci eli mukakumamela mangu eli antepanga mangu ku membe. ³³ Kenge akupaka mangu ku lyoko lyenji lyo shilyo, unone membe ku shimoho. ³⁴ Nehoni Fumu kenge akuamba kwao ali kulyoko lyenji lyo shilyo , 'Keyanu, amwe muna fiyaweliwa ko tata wange, mushwane ofumu unaloisheliwa yamwe kutunda kumatatekelo o kaye. ³⁵ Mukonda ou nafile njala kuma mwanipile ilya; Kuma nafile linotwa amwepo munipa meyu; Nakalile mwenda amwepo munitambula; ³⁶ Nakalile shin'weka-n'eka po munivateka; Nakolile po munikwata nawa; Nakalile mukamenga po mukanithzingula.' ³⁷ Honi awa akakuluka kenge akutawa no kuamba, 'Fumu kupi twakumonine konafu njala po tukupa shilya? Hianga konafu linotwa po tukupa meyu? ³⁸ Kupi twakumonine koli mwenda po tukwata nawa? Nji kukala shin'eka-n'eka po tukuvateka? ³⁹ Kupi twakumonine oku kola nji koli mukamenga po tukuthzingula? ⁴⁰ ''Ne Fumu henge akutawa no kuamba kukwo, 'Yoshemwa namiambela ci, 'Ei mwakwamine koyu omuonye kwawa apange, hime mwaikwamine kukwange.' ⁴¹ Nehoni kenge akuamba kwawa ali kulyoko lyenji lyo shimoho, 'Mutunde kukwange, amwe munakutiwa, muthze mu mulilo okukana kuthzimana ou unaloisheliwa Diavulosi no mangeloi enji, ⁴² mukonda kuma nafile njala, unone kamwanipile shilya; Kuma nafile linotwa, unone kamwanipile meyu; ⁴³ Nakalile no mwenda, unone kamwanitambulile; nakalile shin'eka-n'eka, unone kamwanivatekile; kuma nakolile no kukala mukamenga unone kamwanikwatile nawa.' ⁴⁴ ''Ne nawo kenge akutawa nokuamba, 'Fumu,kupi twakumonine ko nafu njala, hianga ko nafu linotwa nji koli mwenda, nji koli shin'eka-n'eka, nji koli mukamenga, ne katwakukwamenine?' ⁴⁵ ''Nehoni kenge akuwatawa nokuamba, 'Yoshemwa namiambela ci, eshi mwakanine kukwama ko oyu omuonye kwawa, kamushikwamine kukwange.' ⁴⁶ ''Awa kenge akuthza mu mulandu okukana kupwa, unone awa okuluka kenge akuthza ku moyo okuna kupwa.''