¹ Nehoni Jesu ayepo ambela mbunga no afundishiwi enji. ² Ayepo amba ci, ''An'oli na afalisi anekala mu wikalo wa Mushe. ³ Honine yoihe amiambela ci muikwame, muikwame ne muimamele. Unone mwatamenena ei akwama, mukonda amba enu unone kaikwama. ⁴ Eee, anunga mipango thzothzilemu thzothzikalu kushimbiwa, nehoni athzipangekisha anu pa mapee. Unone awo kathzikwata shanga no munwe. ⁵ Akwama ekwama yo yoihe ci anu awamone. Mukonda ayandumuna mafikateri o, no kukulisha mingundo thzo evata yo. ⁶ Ahima itulo yoikulu ku mikiti no itulo yoikuu muma sinagoge, ⁷ no kukandeleliwa mu ivaka yo misika, no kuishiwa ci, 'Mufundishi' ko anu. ⁸ Unone amwe po mwaishiwa ci 'Mufundishi,' mukonfa amwe muli no mufundishi yofoci pohuma, ne amwe mwaheno mwaka kulitawa. ⁹ Kalo mwaisha munu pano pa kaye ci tata wenu, mukonda muli no tata wenu yofoci pohuma, oyu li muwilu. ¹⁰ Shanga kuishiwa ci 'mufundishi' lelo mwaishiwa kengeyo; mukonda muli n mufundishi yofoci pohuma, aye Kilesite. ¹¹ Unone umukulu mukaci kenu kenge akala ngamba wenu. ¹² Yomuhe oyu likulisha aye shinda kenge ahushiwa pashi, ne yomuhe oyu lihusha pashi kenge akulishiwa. ¹³ Unone kuvindama kwenu, an'oli no afalisi, amwe akalikamba! Mwayanjelela anu muvuthso o kuwilu. Mukonda amwe kamuingenamo, ne shanga awa afota kuingena kamuwatawethza kuingena. ¹⁴ Mwakalikamba! Mukonda mwamana lufumo mu manjiyo o mafakathzi ko kuwakwamena malombela omale. Honine kenge mwakutambula katulo thzothzikulu. ¹⁵ Kuvindama kwenu, an'oli no afalisi, amwe akwalikamba! Mukonda mwayavukanga mawete kukapilula munu yofoci, honi nou apiluka mwamukwama lwili eci eli muli amwe ana o lihele. ¹⁶ Kuvindama kwenu, amwe aka kuendisha o kufa meho, amwe muamba ci, 'Yomuhe oyu liethza ko tempele, kwithsa eshi shinepa, unone yomuhe oyu liethza ko gauda thzo tempele, angiwa ko kuliethza kwenji.' ¹⁷ Amwe etomba yokufa meho! Shipi shoshikulu, gauda nji tempele ethzi thzkwama gauda ci thzikale thzothzikenu? ^{18 19} Kalo mwamba ci, 'Yomuhe oyu liethza ko aletare, kwithsa eshi shinepa. Unone yomuhe oyu liethza ko shipiwa eshi shilipo, angangiwa ko kuliethza kwenji.' Amwe anu okufa meho! Shipi shoshikulu, shipiwa nji aletre ethzi thzikwama shipiwa ci shikale shoshikenu? ²⁰ Honine yomuhe oyu liethza ko aletare aliethza ko aletare nei ili po yoihe. ²¹ Oyu liethza ko tempele aliethza ko tempele noku ko yu nakalanga mo. ²² Kalo oyu liethza ko liwilu aliethza ko wikalo wa Nyambi noyu nakalanga po. ²³ Kuvindama kwenu, anoli no afalisi, amwe akalikamba! Mukonda mwakoleka shofoci kwei yolikumi yo minti no dilu no kumini, unone munashii enu yoikulu yo mulao koinakana kukwamiwa- ei iloela no shihemo no shitawo. Unone ei yoliyo munaloela kukwama kali kuishiya koinakana kukwamiwa. ²⁴ Amwe akakuendisha okufa meho, mwatundisha kambulumbulu mu sefa unone mwamina kamele! ²⁵ Kuvindama kwenu, an'oli no afalisi, amwe akalikamba! Mukonda mwahupa peulu thzo nganja no lilonga, unone mukaci kunayala omango no kulikwatakwata. ²⁶ Amwe afalisi okufa meho! muhupe tango mukaci ko nganja no lilonga, ci peulu napo pakene. ²⁷ Kuvindama kwenu, an'oli no afalisi, amwe akalikamba! Mukonda mwalipitula eci mambumbo anakwamiwa shuwana oshokenu, aa amonahala shuwana peulu, unoe mukaci kunayala ishoko ya anu no enu yoihe yokukana kukena. ²⁸ Namwe moliyo munakalela, namwe kwa anu mwamonahala kukena, unone mukaci munayala likamba no umango. ²⁹ Kuvindama kwenu, an'oli no afalisi, amwe akalikamba! Mukonda mwaumba mambumbo o apolofita no kuloisha mambumbo o anu okuluka. ³⁰ Mwa amba ci, ''Nga kuma twayoyile mu mayuwa owa tata wetu, atwe nga kanatukala kuku mwaa unyinga wa apolofita.' ³¹ Honine mwalipaka mwashinda ci mwa ana o anu apaile apolodita. ³² Namwe mwayalilshelela ekwama yowa tata wenu. ³³ Amwe mayoka, amwe ana ipili, kenge mwakucila ngepi katulo thzo lihele? ³⁴ Honine, mumone, natuma kukwenu apolofita na anu owa nyanyami no an'oli. Wamweya kukwo kenge mwa kuwapaa no kuwa ngongotela, wamweya kengae mwakuwa mwashula mu masinagoge enu no kuwa twala mu mbongi no mbongi. ³⁵ Ne unyinga wa anu okuluka ou unamwala pano pa kaye kenge wakukala peulu thzenu, kutatekela unyinga wa Abele o kuluka, kuleta ku unyinga wa Zakaria mwana Barakia, oyo mwapaelile mukaci ko sihalaleho no aletare. ³⁶ Yoshemwa namiambela ci, yoihe ei enu kenge ikeya peulu thzeshi shikuta. ³⁷ Jelusalema, Jelusalema, owe napaanga apolofita no kupovaula awa anatumiwa kukoye! Ninahimi lolungi ci niwaneke anoye pofoci, eci eli n'athzishushwa eli anawanekanga twanenji mu mando enji, unone konohimi! ³⁸ Omone, njiyo thzoye thzinashiyala mu matota. ³⁹ Mukonda nakuambela ci, kowakunimona kutunda pano kuthza kuposho shime apo wakuambela ci, 'Oli no fiyauthzi oyu keya mu lithzina lya Fumu.'''