¹ Jesu po amba kukwo mu manguli, ayepo amba ci, ² ''Ofumu okuwilu walipitula eci fumu oyu waloishelile mwanenji o mukwelume mukiti omaluwo. ³ Ayepo tuma angamba enji ci akaishe awa ambelile ci nakale oko ku mukiti wo maluwo, unone kanakeyako. ⁴ Kalo fumu ayepo tuma angamba amweya, nokuambela ci, 'Mukawambela awa naniisha, ''Mumone, nina loisha mulalelo. Mapulu ange no ngombe thzange thzo kununa thzinapaiwa, no enu yoihe ina loo. Mukeye kumkiti wo maluwo.''' ⁵ Unone katwalileko maano ne awopo alithzela kwako, yumweya ku shilwa shenji tumweya ku miulo thzenji. ⁶ Wamweya awopo akwata angamba a fumu, kuwakwama omango, no kuwa paa. ⁷ Fumu ayepo ngwenya, nepo tuma mashwalele enji awopo akapaa eyo ikevenga no kutumeka mbongi thzo. ⁸ Honi ayepo ambela angamba enji, 'Shinawenga shina loo, unone awa naishiwa kaloelile kukalako. ⁹ Nehoni muthze pa mahangangila o likun'wa lyoshokulu mukaishe anu wahe mukawana ci akeye ku mukiti o maluwo.' ¹⁰ Angamba awopo athza mumakun'wa oshokulu no kukawaneka wahe anu nakawana, owamango nawa oawa. Munjiyo kwakalile mukiti amopo kuyala enda. ¹¹ Unone fumu apa engenine kunamona enda, ayepo mona mukwelume oyu wakanine kuvata ito yo shinawenga. ¹² Fumu po amba kukwenji, 'Mbusha ngepi onengena muno kokupila ito yo shinawenga?' Unone oyo mukwelume wapilile yo kuamba. ¹³ Honi ayepo ambela angamba enji, ''Mununge oyu mukwelume ku moko no kumaulu, mukamukonjele mu milema thzo pola, apo kukala kulila no kukweca maeo.' ¹⁴ Mukonda anu owangi aishiwa, unone owaonye woliyo ahanguliwa ¹⁵ Co honi Afalisi awopo athza kukaliyongola omu atwesha kukwatela Jesu kutunda kwei anamba. ¹⁶ Awopo atuma kukwenji afundishiwi o, no anu a Heroda. Awopo amba kwa Jesu, ''Mufundishi, twalimuka ci wambanga yoshemwa, ne kalo wafundisha likun'wa lya Nyambi mu shemwa.Kotwala maano kumaayalo o munu yomuhe, kalo kotaneka munu ci oyune elye. ¹⁷ Co honi otuambele, waanekela ngepi? Kunaloo kukula mutelo kwa Sesare nji kakuloile?'' ¹⁸ Unone Jesu walimukile omango wo nepo amba, ''Ine ei munielekela, amwe akalikamba? ¹⁹ Munimonishe mali o mutelo.'' Awopo amuleteladenare(mali). ²⁰ Jesu po amba kukwo, ''Shihanga no mathzina alye ei?'' ²¹ Awopo amba, ''Ya Sesare.'' Honi Jesu po amba kukwo, ''Cohoni mupe Sesare inu ya Sesare kalo mupe Nyambi inu ya Nyambi.'' ²² Apa ayuvile hengeyo, kuma akomokile manene. Awopo amushiya nokuthza. ²³ Apo pa liyuwa apo Masaduki wamweya awa anambanga ci munu kunafu katwesha kupinduka, po akeya kukwenji. Awopo amuipula, ²⁴ ci, ''Mufundishi, Mushe wambile, 'Ngecci mukwelume po fa, kunakana kueleka ana, mwapenji(minenji) ayeke munu wenji ci aelekele mwapenji(mukulwenji) ana.' ²⁵ Kwakalile akwelume mutanu na eli. Omutatekelo wayekile ne ayepo fa.Kashiile ana, ayepo shiya munu wenji kwa mwapenji(minenji). ²⁶ Akwopo kukwamahala hengeyo noku koyu omushili, o mushihatu naye kalo hengeyo kukakuma koyu omushitanu na eli. ²⁷ Munyima thzo wahe mbuyama po fa. ²⁸ Honi pa kupinduka kwa afu henge akukala munu walye kwawo o mutanu na eli? Mukonda wahe amuyekile.'' ²⁹ Unone Jesu po watawa nokuambela ci, ''Munepisha mukonda kamulimuka man'olo no okolo wa Nyambi. ³⁰ Mukonda pa kupinduka kwa afu kwithsa wa kuyeka nji ku yekiwa. Unone alipitula eci mangeloi o muwilu. ³¹ Unone kwei yo kupinduka kwa afu, kamutalile ei amiambelile Nyambi, kuamba ci, ³² 'Yame Nyambi wa Abrahama, Nyambi wa Isaka, no Nyambi wa Jakobo'? Nyambi kali Nyambi wa anu anafu, unone wa anu ayoya.'' ³³ Mbunga apa thzayuvile ei kuma akomkile ku mifundishelo thzenji. ³⁴ Unone Afalilsi apa ayuvile ci Jesu onatutwalisha Masaduki awopo aliwana pofoci. ³⁵ Yumweya kukwo, oyu limuka manene yo mulao, ayepo muipula shiipula, kumueleka- ³⁶ ''Mufundishi shipi situminino shoshikulu mu mulao?'' ³⁷ Jesu po muambela, ''Oheme Fumu Nyambi woye ko mucima woye ouhe, ko moyo woye ouhe, kalo ko maayalo oye oahe.' ³⁸ Eshi sholiyo shituminino shoshikulu sho matatekelo.' ³⁹ Kalo shituminino sho mushili shalipitula nasho- 'O heme mwapoe eci eli olihima owe shinda.' ⁴⁰ Apa pei ituminino ili poliyo pa nemana mulao ouhe no apolofita.'' ⁴¹ Honi Afalisi kwashili pofoci hengeyo, Jesu po waipula shiipula. ⁴² Ayepo amba, ''Mwaanekela ngepi ya Kelesite? Mwana lye?'' Awopo amuambela, ''Mwana Davida.'' ⁴³ Jesu po amba kukwo, ''Honi ngepi kalo Davida mumupepo apa amuisha ci Fumu, apa amba ci, ⁴⁴ 'Fumu po ambela Fumu wange, ''Okongomane kulyoko lyange lyo shilyo, kukumena akwethzimbo yoye apa nakuwakwama elyatelo yo maulu oye.''' ⁴⁵ Ngeci Davida aisha Kelesite ci 'Fumu' ngepi nga akala mwana Davida?''' ⁴⁶ Kwithsa watweshile kumutawa liywi, kutunda liyuwa elyo kwithsa munu walitumine kumuipula shiipula kalo.