¹ Ou Jesu na afundishiwi enji ahenyenine ku Jelusalema kwanakumu mu Betefega, pa mukinya o itondo yo olive, nehoni Jesu po tuma afundishiwi enji eli, ² ayepo waambela ci, ''Muthze mu lyumbo tunalihata nalyo, henge mukawana kakambe kanaangeleliwa, no mwanako. Mukatuangulule mukatuniletele kuno. ³ Ngeci kenge kukala munu oyu miipula, muambe ci, 'Fumu atufota,' ne popo mwene oyo munu henge atumipa.'' ⁴ Honi ei kuma yakwamahalile kuyalishelela ei yambiwile ko mupolofita. Ou ambile ci, ⁵ ''Mutongwele mwana sione ombuyama, 'Omone, fumu oe akeya kukwoye, kuna thzini pa kakambe- onathzini pa kakambeana ko mwama kakambe.''' ⁶ Nehoni afundishiwi awopo athza nokukakwama eci eli awambelile. ⁷ Awopo aleta kakambe no kakambeana kenji awopo atupaka evata yo pa miongo thzato, ne Jesu po kala apo pa evata. ⁸ Ungi o mbunga awopo ayala evata yo mu likun'wa, wamweya awopo ateta mitai thzo itondo kuyala mu likun'wa. ⁹ Honi mbunga awa aendile ku posho thza Jesu nawa amukeile munyima kuma akuwelelile, ''Hosana kwa mwana Davida! Onafiyauliwa oyu keya mulithzina lya Fumu! Hosana ku wilu!'' ¹⁰ Jesu ou akumine mu Jelusalema, anu wahe kuma atanekelile no kuamba ci, ''Elye oyu?'' ¹¹ Mbunga awopo atawa, '' Oyu yoliyo Jesu mupolofita tunda ku Nathzareta mu Galilea.'' ¹² Nehoni Jesu ayepo ingena mu tempele. Ayepo cithzile pola aka kuula no kuulishela mu tempele, kalo ayepo yendaula ma methsa akakucinca mali no ipulaya yakakuulisha mayembe. ¹³ Ayepo waambela ci, ''Kuna n'oliwa, 'Njiyo thzange henge thzakuishiwa njiyo thzo kulombelela,' unone amwe mwathzikwama mukuholama ethzi.'' ¹⁴ Nehoni akakukana kumona no elema awopo akeya kukwenji mu tempele, ayepo wapolisha. ¹⁵ Unone akulu o mapulisita no an'oli apa amonine ei akwamine yokukomokisha, na apa ayuvile anuke kwa kuwelela mu tempele kuamba ci, ''Hosana kwa mwana Davida,'' awopo anjipa manene. ¹⁶ Awopo amuambela ci, ''Eine wayuva ei aamba?'' Jesu ayepo waambela ci, ''Ee! Unone kamutalile, 'Kutundelela mutunwa twa anuke oshonye na anuke awa ashiyamwa munaloisha kulemekiwa?'' ¹⁷ Nehoni Jesu ayepo washiya no kutunda mu mbongi kuthza ku Betania koliyo akakalile ushiku ouhe. ¹⁸ Honi mashikushiku ayepo huka mu mbongi, kuma afile njala. ¹⁹ Ayepo mona shitondo sho feiga kumbali thzo likun'wa, ayepo thza ko kakawanineko shimweya shime mamuna lika. Ayepo shiambela, ''Mbela kwakula oshuka kukwoye kalo,'' popo mwene shitondo ashopo shikukuta. ²⁰ Afundishiwi ou amonine ei, kuma akomokile nene no kuamba ci, ''Shitondo sho feiga ngepi shinakukuta wanguwangu henge?'' ²¹ Jesu po tawa nokuambela ci, ''Yoshemwa namitongwela ci ngeci muli no shitawo no kukana kushomolola, nga kamwakukwama lika ei inakwamahala ku shitondo sho feiga, unone henge mwakutwesha kuambela mukinya , 'Oyeluke okawele mu liwate,' ne henge kwakukwamahala hengeyo. ²² Shoshihe mulomba mushilombelo kumunalitawa, henge mutambula.'' ²³ Jesu apa akeile mutempele, apulisita owakulu na akulu o mbunga akeile kukwenji aye kufundisha ne awopo amba, ''Okolo mwine okwamisha ei enu, kalo elye nakupa ou okolo?'' ²⁴ Jesu po tawa nokuwaambela ci, ''Name henge nimiipula shiipula shofoci. Apa munitongwela, name henge nimitongwela okolo nikwamisha ei enu. ²⁵ Kolovethzo thza Joani- kupi nathzitundelela? Kuwilu nji kwa anu?'' Awopo alipaula mukaci ko kuamba ci, ''Ou tuamba ci 'kuwilu,' henge atuambela ci, 'Nehoni ine namukanena kumutawa?' ²⁶ Unone ou tuamba ci, 'kwa anu,' twayapa mbunga, mukonda wahe ashimba Joani ci mupolofita.'' ²⁷ Nehoni awopo atawa Jesu no kuamba ci, ''Katulimuka.'' Naye po waambela ci, ''Name kanimitongwela okolo nikwamisha ei enu. ²⁸ Unone mwaanekela ine? Mukwelume wakalile na anenji owakwelume eli. Ayepo thza koyu omutatekelo nokumuambela ci, 'Mwanange, othze okakwame lelo mushilwa sho veine.' ²⁹ Mwana ayepo tawa nokuamba, 'Mekau,' Unone ayepo ahusha maayalo enji munyima ne ayepo thza. ³⁰ Nehoni oyo mukwelume ayepo thza kwamwanenji omushili nokukamutongwela naye. Ayepo tawa nokuamba, 'Henge nithza, n'athsile,' unone kathzileko. ³¹ Kwa anenji eli yupi nakwama ei namba tata wenji?'' Awopo amba ci, ''Omutatekelo.'' Jesu po wambela ci, '' Yoshemwa namitongwela ci, akakutelisha no mahule henge akuingena mu ofumu wa nyambi(futisho thza Nyambi) amwe komushime kuingena. ³² Mukonda Joani wakeile kukwenu mulikun'wa lyo kukena, unone kamwamutawile. Unone amwe shanga apa mwamonine eyo, kamwahumbile ci mumutawe. ³³ ''Mutelele ku nguli thzimweya.Kwakalile mukwelume, shinda sha njiyo. Ayepo kuna shilwa sho veine, ayepo umbelako shipatango, ayepo shima liteke mo kuololela, ayepo umba tawala, ayepo pakamo akakulima veine. Nehoni ayepo thza mulitunga limweya. ³⁴ Shikati sho kuyanga apa shukumine, ayepo tuma angamba enji kwakakulima veine kukashimba oshuka wenji. ³⁵ Unone akakulima veine awopo akwata awo angamba enji, kufula yofoci, kupaa yumweya, no kupovaula yumweya. ³⁶ Kalo , shinda sha shilwa ayepo tuma angamba wamweya, owangi kupita omutatakelo, unone akakulima veine awopo awakwama eci eli akwamine omutatekelo. ³⁷ Munyima thzeyo, shinda sha shilwa ayepo tuma mwanenji kuwo, kuamba ci, 'Henge akalemeka mwanange.' ³⁸ Unone akakulima veine ou amonine mwanenji, awopo aambaula mukaci ko, 'Oyu yoliyo shwana. Mukeye, tumupaenu ne atwe tushwane.' ³⁹ Awopo amushimba kumukonjela pola thzo shilwa no kumupaa. ⁴⁰ Honi oyo shinda sha shilwa sho veine ou akeya, henge nakwama ngepi awo akakulima veine?'' ⁴¹ Awopo amuambela ci, ''Henge nawaipisha nene awo anu owamango, kalo henge apa esho shilwa sho veine kwa alimi amweya, anu awo akumupanga shipathsi shenji kwei inalimiwa mushikati sho kuyanga.'' ⁴² Jesu ayepo waambela ci, ''Kamutalile mu man'olo, 'Liwe eli akanine akakuumba likwamiwa lilulu. Ei yatunda kwa Fumu, ne kalo shakomokisha mumeho etu'? ⁴³ Ne kalo namitongwela ci, ofumu wa Nyambi(futisho thza Nyambi henge wakunyangiwa kukwenu ne henge wakupiwa ku litunga eli lya kuima oshuka wao. ⁴⁴ Yomuhe wela apa pa liwe henge akucokathzoka tupinthzi-pinthzi. Unone munu yomuhe lyakuwela henge lyakumuolola.'' ⁴⁵ Akulu o mapulisiya na afalisi ayuvile manguli enji, ayuvishishile ci shime ambile yo. ⁴⁶ Afotile kumuanga, nekalo kuma ayapile mbunga, mukonda anu kuma amushimbile ci mupolofita.