¹ Afalisi na aka Saduki po akeya kukwenji kuna mueleka ko kumulomba ci awamonishe shimonisha shitunda kuwilu. ² Unone ayepo tawa no kuambela ci, ''Lungulo ou lukuma, mwamba ci, lelo kenge kukala shuwana, mukonda liwilu lyamonahala ukihu.' ³ Mashikushiku ou akuma, mwa amba ci, 'lelo kenge kuenya, mukonda liwilu lya monaha kukiha.' Mwalimuka kutongola yo liwilu, unone kamutwesha kulimuka imonisha yo shikati. ⁴ Shikuta sho shivi no ohuka shafota shimonisha, unone kwithsa shimonisha eshi shakupiwa kukwo hime shimonisha sha Jona.'' Nehoni Jesu ayepo washiya no kulithzela. ⁵ Afundishiwi ou akakumine muthsambwa, kuma avulamine kushimba eshima. ⁶ Jesu ayepo wambela ci, ''Muyape no kumamela mamene a Afalisi no mamene aka Saduki.'' ⁷ Afundishiwi awopo aliipaula mukaci ko no kuamba ci ''Eine poliyo pakuninga ci katushimbile eshima.'' ⁸ Jesu kuma alimukile ei anekelile ne ayepo amba ci, ''Amwe aka shitawo shoshionye, ine muliipaulela mukaci kenu no kuamba ci poliyo pa kuninga ci kamushimbile eshima? ⁹ Nahingeno kamuyuvishisha nji kamuvuluka mikasha mutanu ethzi thzaikutishile anu makumi o makumi mutanu o ita(5000), kalo tutanda tungahi to umwamwa otu mwatolatolile? ¹⁰ Nji mikasha mutanu no thzili ethzi thzaikutishile anu makumi o makumi ane o ita(4000), kalo tutanda tungahi to umwamwa otu mwatolatolile. ¹¹ Ngepi mukwanga kuyuvishisha ci kaniambile yo eshima? Muyape no kumamela mamene a Afalisi no aka Saduki.'' ¹² Nehoni awopo ayuvishisha ci kanawambela yo mamene o mu eshima, unone ci amamele yo ifundisha ya Afalisi no aka Saduki ¹³ Honi Jesu ou akakumine mulitunga lya Sesarea wa Filipi, ayepo ipula afundishiwi enji, ci, ''Anu ambanga ci Mwana Munu ne elye?'' ¹⁴ Awopo amba ci, ''Wamweya ambanga ci Joani muka kukolovethza; wamweya ci, Elia; ne wamweya ci, Jeremia nji yumweya wa apolofita.'' ¹⁵ Ayepo wambela ci, '' Unone amwe mwamba ci yame elye?'' ¹⁶ Mukutawa, Simoni Pitolosi ayepo amba ci, ''Yowe Kilesite, Mwana Nyambi oyu yoya.'' ¹⁷ Jesu ayepo tawa no kumuambela ci ''Oli no fiyauthzi, Simoni mwana Jona, mukonda kali nyama no unyinga, unone Tata oyu li muwilu yoliyo nakulimukisha ei. ¹⁸ Name nakuambela ci yowe Pitolosi, ne apa pa liwe kenge naku umba po keleke thzange. Mashelo o lifu kathza kuthzitwesha kuthzilwisha. ¹⁹ Kenge nikupa inotolo yo muvuthso o kuwilu. Shoshihe eshi wakuanga pa kaye kenge shakuangiwa no kuwilu, kalo shoshihe eshi wakuangulula pa keya kenge shaku angululiwa no kuwilu.'' ²⁰ Nehoni Jesu ayepo watuminina ci lelo ambela munu yomuhe ci yoliyo Kilesite. ²¹ Kutunda pa shikati esho Jesu ayepo tateka kutongwela afundishiwi enji ci aloela kuthza ku Jelusalema, akayuvishiwe kukola nene ko akulu no akulu o apulisita no an'oli, apaiwe, ne pa liyuwa lyo mushihatu kenge kupinduka kwaka kufa no kuyoya kalo. ²² Nehoni Pitolosi ayepo mushimba kumutwala kunthzimba no kukamuanjipela, ci, ''Ei ipitele kokule noye, Fumu; yakwamahala kukoye ei.'' ²³ Unone Jesu ayepo lishetuka no kuambela Pitolosi ci, ''Otunde kukwange, Satani! Oshikun'u shokunikun'ukisha, mukonda owe kotwala maano ku enu ya Nyambi, unone wa anekela enu ya anu.'' ²⁴ Nehoni Jesu ayepo ambela afundishiwi enji ci, ''Ngeci munu po fota kuni shupwela, alihupwele aye shinda, ashimbe mbinda thzenji, ne anishupwele. ²⁵ Mukonda munu yomuhe oyu fota kuyoyisha moyo wenji, moyo wenji kenge uipa, ne yomuhe oyu ipeliwa ko moyo wenji mukonda wange kenge akuuwana. ²⁶ Mukonda ine shikwathsa munu kufuma kano kaye kokahe moyo wenji ko uipa? Shine nga akula munu ci akale no moyo? ²⁷ Mukonda mwana munu kenge akeya mu kutethzima kwenji no man'eloi enji. Nehoni kenge akuyamba munu no munu kuthza koi anakwama. ²⁸ Yoshemwa namiambela ci, wamweya kukwenu munemana pano kakufa shime ou amona Mwana Munu kukeya mu muvuthso wenji.''