¹ Munyima thzo mayuwa mutanu no liyuwa lyofoci, Jesu ayepo shimba Pitolosi, Jakovo, no minenji Joani, no kuwatwala pa mukinya. ² Ayepo piluka pa posho thzo. Lupala lwenji alopo luethsa eci liyuwa, evata yenji ayopo ipiluka okenu eci mwethzi. ³ Mumone, akopo kumonahala kukwo Mushe na Elia kwa amba nenji. ⁴ Pitolosi ayepo tawa no kuambela Jesu ci, ''Fumu kuna loo ci nga twakala pano. Ngeci wahima, kenge nikwama ipundo ihatu- shofoci shoye, shimweya sha Mushe, ne shimweya sha Elia.'' ⁵ Kushiamba eyo, mumone, livui lyo kuethsa alyopo liwathsika, ne akopo kuyuvahala liywi kutunda mulivui, kuamba, ci, ''Oyu yoliyo Mwanange nihima, oyu nakata. Mumuyuve.'' ⁶ Afundishiwi ou ayuvile kengeyo, awopo alikulumanena ne kuma ayapile nene. ⁷ Nehoni Jesu ayepo keya kunawakwata no kuamba ci, ''Mukatuke ne lelo mwayapa.'' ⁸ Nehoni awopo ataneka unone kwithsa oyu amonie shime Jesu yofoci. ⁹ Ou aulumukile kutunda pa mukinya, Jesu ayepo watuminina, ci, ''Mwa tongwela anu eshi shimona shime ou akupinduka Mwana Munu kwaka kufa.'' ¹⁰ Afundishiwi enji awopo amuipula, ci, ''Ine honi an'oli ei ana ambelanga ci Elia yoliyo loela kukeya tango? ¹¹ Jesu ayepo tawa no kuamba ci, ''Yoshemwa Elia yoliyo tanga kukeya tango no kunaloisha enu yoihe. ¹² Unone namitongwela ci, Elia onakeile kale, unone kanamulimuka. Unone, nakwama yoihe ei nahimi kukwenji. Mulikun'wa lyofoci, no Mwana Munu kenge akuyuvishiwa kukola mu moko o.'' ¹³ Nehoni afundishiwi awopo ayuvishisha ci kuma awatongwelile ya Joani muka kukolovethza. ¹⁴ Ou akumine ku mbunga, munu po keya kukwenji, ayepo tongomana pa posho thzenji, no kuamba ci, ¹⁵ ''Fumu, oyuvele mwanange n'eke mukonda akola kanono ne akola nene. Mukonda awelanga lolungi mu mulilo no mu meyu. ¹⁶ Ninamuleta kwa afundishiwi oye, unone anakwanga kumupolisha.'' ¹⁷ Jesu ayepo tawa no kuamba ci, ''Shikuta sho kukana kulitawa no umango, nikale nenu shikati sho kukuma kupi? Nilitanalishe nenu shikati sho kukuma kupi? Omulete kuno.'' ¹⁸ Jesu ayepo anjipela mupepo oumango, ne awopo umutunda, ne oyo mwanuke omukwelume ayepo pola kutunda apo pa shikati esho. ¹⁹ Nehoni afundishiwi awopo akeya kwa Jesu kunthzimba no kuamba ci, ''Atwe ine tunakwangela kuutundisha? ²⁰ Jesu ayepo wambela ci, ''Mukonda shitawo shenu shionye. Mukonda namitongwela yoshemwa ci, nga muli no shitawo shanga shoshi onye eci mbuto thzo masitete, nga mwatwesha kuambela ou mukinya ci, otunde pano othze paya,' nga wathza, kalo nga kwithsa eshi mukwanga.'' ²¹ Unone mupepo okengeya ou kautundu pohuma shime ko kuliyumena yo kulya no kulombela. ²² Awopo akala mu Galilea, Jesu ayepo ambela afundishiwi enji ci, ''Mwana Munu kenge apiwa mu moko a anu, ²³ ne kenge amu paa, ne pa liyuwa lyo mushihatu kenge apindka.'' Afundishiwi awopo aliyuva nene omango. ²⁴ Ou akumine ku Kapenauma, akwelume akakutelisha mali o tempele awopo akeya kwa Pitolosi no kuamba ci, ''Mufundishi wenu aye katelangile mutelo o tempele?'' ²⁵ Ayepo amba ci, ''Eee.'' Pitolosi ou aingenine mu Njiyo, Jesu ayepo amba nenji tango, kuamba ci, ''Waanekela ngepi, Simoni? Mafumu opa kaye atelishanga alye? Atelishanga ano nji amu ao?'' ²⁶ ''Atelishanga anu ao,'' Pitolosi po tawa. ''Nehoni ano awo analiyala,'' Jesu ayepo amba. ²⁷ Unone ci twaletela aka kutelisha ci akwame shivi, othze ku liwate, okapake mo kalovo ne okakwate ethsi omutatekelo kulya ko. Ou omuthsikula mu kanwa kenge owana mo mali. Oashimbe oatwale kwaka kutelisha oliyo mutelo wange nou oye.''