¹ Mushikati esho, fumu Heroda wayuvile ya Jesu. ² Ayepo ambela angamba enji, ''Oyu yoliyo Joani mukakulovethza; onapitunduka kwa afu. Honine ou okolo wakwama kukwenji.'' ³ Mukonda Heroda wangile Joani, nokumupaka mukamenga mukonda wa Herodiasi munu waminenji Filipi. ⁴ Mukonda Joani kuma amuambelile ci, ''Kakuloile ci omuninge munu woye.'' ⁵ Heroda wafotile kumupaa, unone wayapile anu, mukonda anu kuma amushimbile ci mupolofita. ⁶ Unone liyuwa lyo mukiti o kuelekiwa kwa Heroda ou lyakumine, mwana herodiasi o mbuyama wakinine mukaci ka anu ne Heroda kuma aloelile manene. ⁷ Ayepo mukulupelisha ko kuliethza ci shoshihe amulomba henge ashimupa. ⁸ Munyima thzo kutongweliwa kwa njina, ayepo amba, ''Munipe pano pa lilonga mutwi wa Joani mukakukolovethza.'' ⁹ Fumu wanjipile nene kwei alombile, unone mukonda o okuliethza kwenji naawa wahe akalile nenji kumulalelo, ayepo tuminina ci kukwamiwe hengeyo. ¹⁰ Ayepo tuma kukacinuna mutwi wa Joani mukamenga. ¹¹ Honi mutwi awopo uletiwa pa lilonga nokunaupa mumbanda ne ayepo utwala kwa njina. ¹² Nehoni afundishiwi enji po akeya, kunashimba shivimbi, nokukashivumbeka. Munyima wei, awopo athza kukaambela Jesu. ¹³ Honi Jesu ou ayuvile ei, ayepo tundako mu shisepe kuthza kushivaka sho kunthzimba. Mbunga ou aiyuvile awopo amushupwela no maulu kutunda mumambongi. ¹⁴ Nehoni Jesu po keya kukwo ayepo mona mbunga thzothzikulu. Ayepo wayuvela n'eke ne ayepo polisha akakukola o. ¹⁵ Lungulo ou lwakumine, afundishiwi awopo akeya kukwenji nokuna aamba, ''Muno po mulihalaupa, kalo liyuwa linatoko. Oambele mbunga thzihuke, ci athze mumaumbo akaliulele yokulya.'' ¹⁶ Unone Jesu po awambela, ''Kwithsa ei atwesha kuhukela. Amwe muwape yokulya.'' ¹⁷ Awopo amuambela, ''Tuli nomikasha mutanu no ethsi thzili pohuma.'' ¹⁸ Jesu po amba, ''Muilete kuno.'' ¹⁹ Nehoni Jesu po tuminina mbunga ci akale pashi pa muhonyi. Ayepo shimba ethzo mikasha mutanu no ethzsi thzili. Ayepo tanekela muwilu, ayepo fiyaula no kukuyaula ethzo mikasha nokuthzipa afundishiwi, ne afundishiwi awopo athzipa ku mbunga. ²⁰ Wahe po alya no kuikuta. Awopo atolatola omwamwa washilileko- kuyala tutanda likumi na twili. ²¹ Awo alile kuma akumine pa akwelume makumi mutanu o ita, kuvandakana ambuyama na anuke. ²² Popo mwene ayepo ambela afundishiwi ci aingene mushisepe nokulitangethza musambwa limweya aye kunashiyala, kushuhusha mbunga. ²³ Ou amanine kuambela mbunga ci ahuke, ayepo kanduka pa mukinya yofoci kukalombela. Lungulo ou lwakumine, shime aklileko yofoci. ²⁴ Unone shisepe koshinathzi kokule kutunda paliya, koshiendishiwa ko man'ithsingi, mukonda mupepo kuma naupepe. ²⁵ Mushikati sho 03:00hours thzo ushiku Jesu po thza kukwo, kuenda pa liwate. ²⁶ Afundishiwi ou amumonine kuenda pa liwate, kuma ayapile ne awopo aamba, ''shilumba,'' awopo akuwa kucila. ²⁷ Unone Jesu po aamba kukwo apo mwene kuamba ci, ''Mukale no ondume! Yame! Lelo mwayapa.'' ²⁸ Pitolosi po mutawa nokuamba ci, ''Fumu, ngeci yowe, onituminine ci nikeye kukwoye pa meyu.'' ²⁹ Jesu po amba, ''Okeye.'' Honi Pitolosi ayepo tunda mushisepe no kuenda pa meyu kuthza kwa Jesu. ³⁰ Unone Pitolosi ou amonine mupepo, ayepo yapa. Ou atatekile kuthzela, ayepo kuwa no kuamba, ''Fumu,, oniyoyishe!'' ³¹ Popo mwene Jesu po olola lyoko lyenji, nokukwata Pitolosi, ayepo muambela ci, ''Owe mukakulitawa kokuonye, ine olishoshomwa?'' ³² Nehoni Jesu na Pitolosi ou aingenine mushisepe mupepo aopo ushiya kupepa. ³³ Nehoni afundishiwi awa akalile mushisepe awopo alombela kuwenji no kuamba ci, ''Yoshemwa omwana Nyambi.'' ³⁴ Ou ayavukile, awopo akeya kushivaka shoku Genesareti. ³⁵ Honi anu omo mushivaka apa alimukile ci Jesu, awopo alimukisha anu wahe mumatunga anathzinguluka esho shivaka, ne awopo aleta kukwenji munu yomuhe okukola. ³⁶ Awopo amulomba ci akwate lika kumungundo o evata yenji, ne wahe awa nakwatako awopo apola.