¹ Muliyuwa elyo Jesu ayepo puna munjiyo no kukakala kumambali o likulu lwale. ² Mungi wa anu awopo aliwana no kuka mupaka mukaci honi ayepo ingena mu shisepe nokukalamo mungi wa anu awo kwanemana pa liya. ³ Nehoni Jesu wawa ambelile enu yoyingi muma nguli. Ayepo amba, ''Mumone, njimi wathzile kukakuna mbuto. ⁴ Ou akunine, mbuto thzimweya thzopo thziwela kumbali thzo likun'wa, enyunyi ayopo ikeya nokunathzilya. ⁵ Mbuto thzimweya athzopo thziwela mumuve o mawe, omo thzakanine kuwana muve oungi. Popo mwene thhopo thzimena mukonda muve wapupile. ⁶ Unone liyuwa ou lyavile , athzopo thziolaola mukonda kathzakalile no mithzithzi nepo thzikukuta. ⁷ Mbuto thzimweya athzopo thziwela mumisheunga. Misheunga athzopo thzikula noku thzihonyahonya. ⁸ Mbuto thzimeya thzawelelile mumuve ouwa kalo athzopo thziima ilya, thzimweya kuima kukakuma pa shita, thzimweya makumi mutanu na lyofoci, kalo thzimweya makumi ahatu. ⁹ Oyu li no matwi, ayuve.'' ¹⁰ Afundishiwi awopo akeya kwa Jesu no kuna mu ambela, '' Ine onambelanga ku mbunga mumanguli?'' ¹¹ Jesu ayepo tawa noku wambela ci, ''Amwepo munapiwa kuyuvishisha ei inaholama yo ofumu o kuwilu, unone kuko kapiwile. ¹² Mukonda yomuhe oyu li no inu henge akupiwa imweya , ne henge akukala nei yoingi. Unone oyu napili , shanga ei ali nayo henge akuimunyanga. ¹³ Ei yoliyo ninaambelanga kukwo mumanguli:Shianga ci amona, kamono; shanga ci ayuva, kayuvu, nji kuyuvishisha. ¹⁴ Kukwo ei apolofitile Isaya inaliyalishelela, ei iamba ci, 'Kuyuva henge mwakuyuva , unone kamwakuyuvishisha; kumona henge mwakumona, unone kamwakumonishisha. ¹⁵ Mukonda micima thzo wa anu thzinelaula, kalo akalu kukuyuva, kalo analithzimenena ku meho eci katele amone no meho o, nji katele ayuve no matwi o, nji katele ayuvishishe no micima thzo, ci katele apiluke kalo, ci niwapolishe.' ¹⁶ Unone meho enu anafiyauliwa, mukonda amona; no matwi enu , mukonda ayuva. ¹⁷ Shemwa namiambela ci mapolofita oangi no anu owawa kuma nahimi kumona enu mumona kalo kanaimono. Kuma nahimi kuyuva enu muyuva kalo kanaiyuvu. ¹⁸ Nehoni muteelele kunguli thza mukakulima oyu wakunine mbuto thzenji. ¹⁹ Ngeci munu yomuhe po yuva liywi lyo muvuthso unone kaliyuvishisha, omumango(satani) akeya kukwenji nokunamunyanga eshi shinakuniwa mumucima wenji. Ethzi thzoliyo mbuto nathzikuniwa kumbali thzo likun'wa. ²⁰ Ethzi nathzikuniwa mumuve o mawe po munu yuva liywi wanguwangu alitambula kunanyanyuka, ²¹ unone kali no mithzithzi ne atanalisha mushikati shoshoonye pohuma. Likando no kunyandishiwa apa ikeya mukonda o liywi, wanguwangu ahuka munyima. ²² Ethzi nathzikuniwa mu misheunga, oyu po munu oyu yuva liywi, unone maanekelo o kaye no kuangeliwa ko kuhima lufumo lo mukaye yamukwangisha, kalo kakala no oshuka. ²³ Mbuto ethzi nathzikuniwa mumuve ouwa, oyu yoliyo munu oyu yuva liywi nokuliyuvishisha. Aema oshuka no kumenisha shikuniwa, shokwima oshuka shita mu mwimeno ofoci, shimweya makumi mutanu no likumi lyofoci, no shimweya makumi ahatu momuhe omu aikunenine.'' ²⁴ Jesu ayepo wapakela nguli thzimweya kalo. Ayepo ambaa, ''Ofumu o kuwilu walipitula eci mukwelume oyu wakunine mbuto thzothziwa mu shilwa shenji. ²⁵ Unone anu kwanalala, mukwashithzimbo shenji ayepo keya nokuna kuna kalaalela mukaci ko uloto ne ayepo thza. ²⁶ Uloto ou wamenine nokutateka kupunisha no kalaalela nako po kamonahala. ²⁷ Apika oyo shinda sha shilwa po akeya nokuna mu ambela ci, 'N'athsile, kowakunine mbuto thzothziwa mushilwa shoye? Kwakeya ngepi ci kalo kukale kalaalela?' ²⁸ Ayepo wa ambela, 'Mukwashithzimbo shange yoliyo naikwama.' ''Apika enji awopo amu ambela, 'Honi wafota ci tuthze tukaithzulemo?' ²⁹ ''Shinda sha shilwa po amba, 'Kwahi. Mukonda ou mutundisha kalalela, mwatwesha kutukula no uloto. ³⁰ Muishiye yoihe ikulele pofoci kukakuma pa kuyanga. Pashikati sho kuyanga henge nakuambela akwakuyanga, ''Mutange kutundisha kalalela mukanunge itungu ci kakatumekiwe, unone muungumeka uloto mu shishete shange,''''' ³¹ Jesu po watongwela nguli thzimweya. Ayepo po amba, ''Ofumu o kuwilu walipitula weci mbuto thzo masitete ethzo munu ashimbile nokuthzikuna mu shilwa shenji. ³² Ethzi mbuto thzoliyo thzoshoonye ku mbuto thzothzihe. Unone kothzinamene thzikulu kupita ikuniwa yo mushilwa. Thzakula kuninga shitondo, ci enyunyi ya keya nokunakwama italatala ku mitai thzasho.'' ³³ Jesu nepo watongwela nguli thzimweya. ''Ofumu o kuwilu walipitula weci mamene ao mbuyama ashimbile no kuavandakana no ipimo ihatu sho ushunga kukakume apo likende lyolihe lya tundulukile.'' ³⁴ Yoihe ei enu ambile Jesu ku mbunga kuma aimbile mumanguli; kalo kwithsa eshi ambile kukwo ko kupila nguli. ³⁵ Ei kuma yakalile hengeyo ci ei yaambiwile ko mupolofita ikwamahale, ou ambile ci, ''Henge nakuyahamisha kanwa kange mumanguli. Henge nakuamba enu ei naiholekiwa kutunda kumatatekelo o kaye.'' ³⁶ Ne Jesu po shiya mbunga nokukengena munjiyo. Afundishiwi enji awopo akeya kukwenji no kunaamba ci, ''Otutongwele nguli thzo kalalela ko mushilwa.'' ³⁷ Jesu po tawa nokuamba ci, ''Oyu kuna mbuto thzothziwa mwana munu. ³⁸ Shilwa koliyo kano kaye; kalo mbuto thzothziwa, awa woliyo ana o muvuso. Kalalela woliyo ana oyu omumango, ³⁹ kalo oyo mukwashithzimbo wakunine kalalela yoliyo Diavulosi. Kuyanga koliyo kupwa ko kaye, akakuyanga mangeloi. ⁴⁰ Nehoni, eci eli kalalela kapakiwa pofoci no kutumekiwa no mulilo, lyokwakukala ou kakupwa kaye. ⁴¹ Mwana munu henge akutuma mangeloi enji, ne henge akutundisha mumuvuso wenji nokuwaneka pofoci enu yoihe ileta shivi na anu wahe awo akwama omango. ⁴² Henge akuwakonjela mu mulilo, oko kwakukala kulila no kukweca maeo. ⁴³ Nehoni anu okuluka henge akuethsa weci liyuwa mumuvuso watata wo. Oyu li no matwi , ayuve. ⁴⁴ Ofumu(futisho) o kuwilu walipitula weci mali aa naholekiwa mushilwa. Munu ayepo awana kalo nepo aholeka. Mukunyanyuka kwenji ayepo thza, nokukaulisha yoihe ei akalile nayo, no kukaula esho shilwa. ⁴⁵ Kalo, ofumu(futisho) o kuwilu walipitula weci munu omiulo oyu fota mapelela oawa. ⁴⁶ Ou awanine pelela thzokutula manene, ayepo thza nokukaulisha yoihe ei nakala nayo nokukathziula. ⁴⁷ Kalo, ofumu(futisho) o kuwilu walipitula weci shiothzi eshi nashilangekiwa mu liwate, eshi nashikwata enu yoingi yokulishiyashiya. ⁴⁸ Ou shayalile, mandui owopo ashikokela pa likanda. Nehoni awopo akala pashi nokuungumeka enu yoiwa mumayongo o, unone enu yoimango awopo aikonja. ⁴⁹ Lyokwakukala hengeya ou kakupwa kaye. Mangeloi henge akukeya no kunatundisha owamango kwawa okuluka. ⁵⁰ Henge akuwakonjela mu mulilo, oko kwakula kulila no kukweca maeo. ⁵¹ ''Munayuvishisha yoihe ei enu?'' Afundishiwi awopo amuambela ci, ''Eee.'' ⁵² Ne Jesu ayepo waambela ci, ''Nehoni yomuhe mun'oli oyu napiluka mufundishiwi ku ofumu(futisho) okuwilu alipitula weci munu oyuli shinda sha njiyo, oyu tundisha enu yo kale nei yoipe mushitulekelo shenji.'' ⁵³ Nehoni akopo kukwamahala ci Jesu ou amanine aa manguli, ayepo tunda kukwo. ⁵⁴ Nehoni Jesu po ingena mulitunga lyenji ayepo fundisha anu mu masinagoge o. Anu nkuma akomokile no kuamba ci, ''Oyu mukwelume kupi anawana ou unyanyami kalo kupi atundisha ei ekomokisha? ⁵⁵ Oyu mukwelume kali yoliyo mwana mukakuyuwa? Njina kali Maria? Aminenji kali Jakovo, Josefa, Simoni, no Juda? ⁵⁶ Kali andumbuthzenji wahe twakalanga no? Kupi anawana yoihe ei enu?'' ⁵⁷ Kuma awanjipishile. Unone Jesu po wambela ci, ''Mupolofita katwesha kulemekiwa mulitunga lyenji no kwaapenji.'' ⁵⁸ Kakwamine ikomokisha oko mukonda okukana kulitawa kwo.