¹ Ou Jesu a manishile ku fundisha afundishi enji o likumi no eli, wa tundile omo ku kulongethsa no ku fundisha mumaumbo ho. ² Nehoni Johani wa yuvile oku ali tolongo ikwama ya kilesite, wa mutumanenine shiamba ku afundishiwi enji ³ no kuamba ku kwenji, ''Yowe shemwa wo keya, nji tutateleko wao kalo?" ⁴ Jesu watawile no kuamba kuko, "Muthze mukatongwele Johani ei mumona no kuyuva. ⁵ Aka kufa meho amona, ilema ya enda, aka mbuma akenishiwa, aka kufa matwi ayuva kalo a anafu a pindikishiwa kukala no moyo, no liywi lia tongweliwa kwa ana pili. ⁶ Ali no fiyauthzi oyu na kana ku kwamiwa omango ku kwange." ⁷ Apo awa akwelume ahukile mulikun'wa lio, Jesu watatekile kuamba ku mbunga ya Johani, "Inu mwine mwa thzilelile mumbula kukutu ku kamona-limbumgu linyenga nyengiwa ku mupepo? ⁸ Unone inu mwine mwa thzelelile ku kamona-mukwelume ona bata shito sho shikenu? Ya shemwa, awo wahe abata ito yo shokenu ayoya muma njiyo oma Fumu. ⁹ Unone shinu mwine mwa kamonine-mupolofita? ee, na amba ku kwenu, kalo nene nokupita mupolofita. ¹⁰ Oyu yolio yenji ya n'oliwile, nga mumonine ame natuma mutumiwa wange kulupala lwenu, oyu wa kuloisha likun'wa lienu kulupala lwenu.' ¹¹ Ame na amba kukwenu yoshemwa, kakupindukile mukaci kawo ana elekiwa kwa mbuyama omukulu nene kupita Johani muka kukolovethza. Unone munu oku lemekiwa mbicana mu muvuso wo kuwilu mukulu nene kupita eli ali. ¹² Kutunda ku mayuwa a Johani muka kukolovethzi kuleta pano lili, muvuso wo kuwilu wa nyanda mipingo, kalo akwelume o mipingo au shimba maci. ¹³ Mukonda wahe apolofita no mulao kumana polofita kupitela hime Johani; ¹⁴ Kalo ngecipo mwahima ku utambula, aye Elia oyu wa kukeya. ¹⁵ Aye oyu lino matwi okuyuba, ayube. ¹⁶ Ku shinu mwine nitwesha kuanekethza eshi shikuta? Kwa pitula ci anuke apepela muibaka yo kuulishela, ao a kongomana no kulisha isha yo mweya kuyumweya, ¹⁷ no kuamba, 'Atwe kuma twakushikelile pala, kalo owe kowa kinine. Twakalile pa mwala owe kowalilile. ¹⁸ Owo Johani wa keile kwithsa kulia thsinkwa no kunwa waine, kalo awo ambile, 'Aye oli no mandimona! ¹⁹ Mwana munu wa keile no kunalia kalo no kun'wa kalo awo no kuamba, mumone, oyu mukwelume muka kulia nene no kun'wa, mbusha wa aka kutelisha no walino ibi!' Unone o nyanyami una pakiwa ko ikwama yo." ²⁰ Nehoni Jesu atatekile ku anjipela aka maumbo ao oko ikomokisha enji imweya kwa ikwamenine, mukonda awo kahumbile. ²¹ ''Lubinda loe, Korazini! Lubimda loe, Betisaida! ngeci po ikomokisho ya kwamahalile ku Tire no Sidoni ei ya kwa mahalile ku kwenu, awo nga ahumbile kale mu ito yo masaka no mututwi. ²² Unone henge kwa kukalako nawa ku Tire na Sidoni pa mayuwa okatulo kupita ku kwenu. ²³ Yowe, kapenauma, wa ayala ci henge wa kuthza ku wilu? Kwithsa, henge o letiwa pashi ku shivaka sho wa akakufa. ngecipo mu sodoma kwa kwamahalile ikomokisha eci ci ya kwamahalile ku kwenu, nga ko ishili kukuma no lelo. ²⁴ Unone na amba kukwenu kuli ato ci ci litunga lia Sodoma mu liyuwa lio katulo kupita kukwenu." ²⁵ Pa shikati sho Jesu ayepo amba, nakushangala, tata, Fumu wo ku wilu no pashi, mukonda ona holekela ei inu waya ali no unyanyami no ku yuvishisha, no kuili mukisha anu wo a onye. ²⁶ Ee, tata, mona himna mumeho oye. ²⁷ Yoihe inu naipakiwa ku kwange kutunda kwa tata, nehoni kwithsa oyu alimuka mwana shime tata, kalo kwithsa oyu alimuka tata shime mwana kalo no yu mweya kukwenji mwana ana anguliwa ku mutongwela. ²⁸ Mukeye ku kwange, amwe mwahe muna aya muli no mipingo thzo thzilemu, kalo henge nimipa pumulo. ²⁹ Mushimbe coko thzange ku kwenu no kulifundisha ku kwange, kalo nili no shiemo no woto mu mucima, henge muwanena mioyo thzenu ku pumulo. ³⁰ Coko thzange thzoto no mupango wange ulethzu."