1 Shinda sha moyo ayepo amba kenge kwa Joshua, ''Lelo wayapa; lelo wa bapa, oshimbe wahe akwelume omfuo. Othze ku Ai. Ngomone, ninapa mumoko oe fumu wa Ai, no mbunga thzenji, no liumbo lyenji. 2 Kenge okwama ku Ai no ku kwa fumu wateni wechi eli ona kwama kwa Jeriko no ku kwa fumu wateni, shime popohuma echi kenga oshimba etenga ne munanu echi ikale yoe. Ondamene liumbo kunyima.'' 3 Ne Joshua ayepo pinduka honine ayepo shimba akwelume wahe omfuo kuthza no ku Ai. Nehonine Joshua ayepo hangula a kwelume okukuma pa 30, 000 osho kolo, akwelume oundume ne ayepo wa tuma ushiku. 4 Ayepo walaela, ''Ngamumone, kenga mukaliholeka kundamena liumbo, kunyima walyo. Lelo mwathza kokule no liumbo, unone mwahe muliloishele. 5 Ame no akwelume wahe awa alinange kuma tuhenyenena liumbo, ne owu a puna kuna tulwisha, kuma tuchila kukwo wechi pa matatekelo. 6 Kuma apuna kutu chithza chithza kupitela mane tuwahenyishele kwo kule no liumbo. Kuma aamba echi, 'Ahatuchila wechi liya na kwama pa shikati nashipu.' Ne kuma tuchila kukwo. 7 Nehonine kuma muhokoka muibaka yenu eyi munaliholeka, ne kuma mukupala liumbo. Shinda sha moyo nyambi woe kuma alikupa mumoko oe. 8 Owu okupala liumbo kuma oli tumeka mulilo. Kuma okwama eyi apo kuteka kulaela okuna kupiwa muliywi lya shinda sha moyo. Ngomone, nina kulaelela. 9 Joshua ayepo watuma, ayepo athza mushibaka sho kundamena, ayepo aliholeka mukachi ka Betele na Ai ku wiko wa Ai. Unone Joshua ayepo lala owo ushiku no mbunga. 10 Joshua ayepo pinduka mashiku shiku ne ayepo tongwela masole enji echi aliloishele, Joshua ne na kulu a Isilaele, honine ayepo akalwisha mbunga thzo mu Ai. 11 Wahe akwelume omfuo awa akalile kukwenji ayepo athza ne ayepo aka henyenena limbo. Ayepo akeya popepi no liumbo ne ayepo atibelela ku mutulo wo shibaka sha Ai. Nehoni kuma kwa kalile mulonga mukachi ko no Ai. 12 Ayepo shimba akwelume okukuma pa 5000 ne ayepo wapaka echi ondamene liumbo ku wiko walyo mukachi ka Betele no Ai. 13 Ayepo apaka mashwalale wahe, athzo mpi shemwa kumutulo wo shibaka sho liumbo, ne nowa wowathzuthzu echi anyunge kuwiko wo shivaka sho liumbo. Joshua ayepo kala owo ushiku mumulonga. 14 Ayepo kukala kenge fumu wa Ai apa amonine kenge, aye no mpi thzenji ayepo apinduka mashiku shiku ne ayepo ayokolwela kuka lwisha Isilaele ku shibaka shimwea esho sho kulunduka kupita mulonga wo liya lya Jodani. Kalimukile echi kwali awa anondamena kutatiela kulwisha liumbo kumanyima. 15 Joshua ne no ma Isilaele wahe awopo alishielela wechi ahawa yapa echi pamatatekelo, awopo achilela mungana nakuwana. 16 Anu awa akalile mu liumbo kuma awa eshelile pofochi echi athze akawa chithza chithze, ne awopo ashupwela Joshua ne awopo awa henyishela kokule no liumbo. 17 Kakwa shialile kemonga munu yofochi mu Ai no mu Betele awa akanine kuthza muku shupwela Isilaele.Kuma ashiile liumbo shiyahamwa kwali no kuchithza chithza Isilaele. 18 Shinda sha moyo ayepo ambela Joshua echi, ''Oineke likothzi eli lili munyala thzoe ku Ai, mukonda kuma nipa Ai munyala thzoe.'' Joshua ayepo ineka likothzi eli nalikala munyala thzenji ku liumbo. 19 Mashwalale awa aliholekile kundamena ayepo ayokolola kutunda muibaka yo mukukuma kukwo lioko lyenji. Awopo andandumuka ne awopo engena mu liumbo ne awopo alikupala. Awopo ayokolola kutumeka liumbo no mulilo. 20 A kwelume omu Ai ayepo alishetuka kutaneka kumanyima. Ayepo amona watundelela mu liumbo wahathza muwilu, ne katweshile echi achile mulikun`wa eli kapa liya. Mukonda masole a Isilaele waya ana chilelile mungana nakuwana honi ana aluka kulitaneka nawa anakala no kuwa chithza chithza. 21 Joshua no ma Isilaele wahe apa amonine echi aka kundamena ana kupala liumbo no mushi ayepo akakuka, ayepo aaluka ne ayepo apaa akwelume o ku Ai. 22 Wamweya awopo atundelela mu liumbo kuwa lwisha, nehoni echi akale mukachi, kalo no ma Isilaele pakachi, wamweya thsambweli wamweya thsambwaliya. Isilaele ayepo lwisha akwelume omu Ai; kuyatukele oyu wa yoyile kemonga wo kupala. 23 Ayepo a tuleka fumu wa Ai,oyua kwatile kushi yoya, ne ayepo amuleta kwa Joshua. 24 Ayepo kukala kenge Isilaele owu amaninishile kupaa wahe awa atungile mu Ai mulilwelo lyo pepi no mungana na kuwana oko awa shupwelile, ne wahe omu akalelile, kutwala kumunu wopahula, a wile ku utwe wo mwele, Isilaele yomuhe ayepo huka mu Ai. Ayepo aka lwisha no otwe wo mwele. 25 Wahe awa wile elyo liyuwa, pofochi a kwelume na mbuyama, kuma akalile 12 000, wahe anu omu Ai. 26 Joshua ka wishile lyoko lyenji eli enekile kuna kwatelela likothzi lyenji, kupitela apa nawa thzilishela wahe anu omu Ai. 27 Isilaele ayepo shimba pohuma emunanu no itenga yo mu liumbo echi ikale yo, wechi eli alaelelile shinda sha moyo kwa Joshua. 28 Joshua ayepo tumeka Ai ne no kulialula liumbo lyo mathzilo okukana kupwa. Shibaka shoku thzimbolokiwa kuleta no lelo lino. 29 Ayepo angelela fumu wa Ai ku shitondo kutwala kulungulo. Liiwa owu lya fotile kutoka, Joshua ayepo laela ne ayepo ashimba shitupu sha fumu kushitondo ne ayepo ashi kuhela posho thzo shelo sho liumbo. Apo ayepo a tutelapo mutumbo wo mawe peulu thzo shitupu shenji. Owu mutumbo poushili no lelo lino. 30 Nehonine Joshua ayepo umbela shinda sha moyo aletare, Nyambi wa Isilaele, pa mukinya wa Ebali. 31 Wechi mwene Mushe ngamba wa shinda sha moyo eli alaelelile mbunga thza Isilaele, wechi mwene omo a n`olelile mubuka thza mulao wa Mushe; ''Aletare thzo kukwama pa mawe okukana kuyuwa, ao okupila munu oyu wa twalapo shitenga shoshifu echi ayuwe.'' Ayepo kwamena pa aletare shitabelo sho kutumeka sha shinda moyo, ne ayepo a kwama itabelo yo kuliyala. 32 Kwali oko, pa meho ombunga thza Isilaele, ayepo n`ola pa mawe kukopithsa mulao wa Mushe. 33 Ma Isilaele wahe, akulu wo, aendishi, no aatuli wo ayepo emana kuthsambweli no kuthsambweli thzo aleka posho thza ma prista neno maliui awa a shimbile aleka thzo umbusha wa shinda sha moyo---Anu angana nawo pofochi no ma Isilaele---kalulo thzo thzimweya kuma thza imanine pa mukinya wa Gerizimi ne kalulo thzimweya athzopo thziimana posho wo mukinya wa Ebali. Ayepo Afiyawethza mbunga thza Isilaele, wechi mwene Mushe ngamba wa shinda sha moyo eli awa laelelile pa matatekelo. 34 Munyima, Joshua ayepo tala maywi omahe o mulao, fyawuthzi no milao,wechi mwene omu anai n`olela mubuka thzo mulao. 35 Kakwa kalile kemonga liywi lyofochi ku maywi omahe ao Mushe alaelelile a kanine kutala Joshua posho thzo mbunga ethzi thza kungulukile thza Isilaele, pofochi no ambuyama, na anuke, ne enda awa tungile no.