¹ Unone mbunga thza isilaele kathza sepahalile kuitenga eyi ya anueneniiwile kuipishiwa. Akani mwana karimi mwana Zabibi mwana Zera, oyu tunda mu shikuta sha Juda, ayepo shimba kuitenga eyi ya anu eneniwile echi iipishiwe, ne waanji wa shinda sha moyo eyepo uyuumena mbunga thza isilaele. ² Joshua kushili mu Jeriko ayepo tuma a kwelume ku Ai kuma lya kalile popepi no Beti Aveni, kumuveyuwa wa Betele. Ayepo waambela echi, ''Muthze muka nenge litunga.'' Ne awa a kwelume awopo athza ne ayepo akanenga Ai. ³ Owu ahukile kwa Joshua, awopo akamwambela echi, ''Lelo wa tuma mbunga thzo thzihe ku Ai. Otume pohuma a kwelume o kukuma pa 2000 kapa 3000 echi athze aka lwishe Ai. Lelo wa kwama chi mbunga thzothzihe thzi kaayele mwothzi mfvo, mukonda kuwatanda apu. ⁴ Nehoni ayepo kuthza pohuma a kwelume okukuma pa 3000 wahe awopo akashiala, unone awa awopo aka ⁵ chila kwa kwelume, Akwelume oku Ai awopo aka paa akwelume okukuma pa 36 kwa nawa tatama kutunda mushelo sho lyuumbo kuthza kokule kumateke omawe, kalo awopo awa paa kwa ulumuka mukinya. Michima thzo mbunga athzopo thzi nyongolokota athzopo thzili pitula wechi meyu. ⁶ Joshua ayepo yataula eto yenji. Naye na kulu oma Isilaele ayepo apaka likungu ku mitwi thzo ayepo akala kufulumana pashi posho thzo Aleka thza Shinda sha moyo, ayepo akala apo kutwala ku lungulo. ⁷ Nehoni Joshua ayepo amba echi ''a, shinda sha moyo mfumu, yine yavukishela ethzi mbunga Jodani, echi notupe mumoko oma Amori echi natuthzilishe , Nga kuma tuna kwama maayalo angana nga tuna likalela muthsambwa thza Jodani. ⁸ Fumu , yiñe nitwesha kwaamba, munyima thzo maisilaele kualukishela itothzi yo miongo? ⁹ Mukonda aka Kanana nawa wahe anatungu muno mulitunga kuma ayiyuva . Kuma atupaka mukachi no kukwama mbunga thzo pano pashi echi thzi vulame lithzina lyetu. Yine okwama mukonda wo lithzina lyoe lyo shokulu? ¹⁰ Shinda shamoyo ayepo amba kenge kwa Joshua, '''Pinduka , yin`è onalalela apo no shihanga shoe shoshihe? ¹¹ Isilaele ona kwama shivi. Ana cholo kulitawa shana kwo umbusha wange oku nawalaelelile. Anethzi ne kalo ana holeka shivi sho mukuvanda kana eyi anashimbi kuitenga yo. ¹² Mukonda weyi, mbunga thza Isilaele kathzi twesha kuimana posho thzo itothzi yo. Ana alukishela etothzi yo miongo, mukonda woliyo honi ana anueneniwa kuthzilishiwa. Kani kala nenu honi hime mona wo muthzilishe etenga eyi ina loela kuthzilishiwa, unone ishili mukachi kenu. ¹³ Pinduka , onikenishele mbunga ne owaambele echi, 'Mulikenishele lyo peunja. Mukonda shinda sha moyo, nyambi wa Isilaele aamba kenge, '''Koili itenga nayi anueneniwa echi yi thzilishiwe eyi ishili mukachi koe , isilaele. Kotwesha kuimana kulwisha itothzi yoe kupitela apo tundisha mukachi koe etenga yoihe eyi nayi anueniwa echi ithzilishiwe. ¹⁴ Mashiku shiku, wa loela kulikeisha pa mukuta no mukuta. Mukuta owu a hangula shinda sha moyo kenga ukeya popepi mushikota no shikota. Shikota eshi a hangula shinda sha moyo sha loela ku keya popepi pa lila no lila . Lila eli a hangula shinda sha moyo lya loela kukeya popepi pa munu no munu. ¹⁵ Kenge kukala kenge, oyu a hanguliwa kalo yoliyo oli noeyo etenga nayaanueniwa echi ithzilishiwe, kenga a tumekiwa, neitenga yenji yoihe, mukonda ona cholo shitawashano sho umbusha wa shinda moyo kalo mukonda ona kwama yinu yokufisha honyi mu Isilaele. ¹⁶ Nehoni, Joshua ayepo pinduka kumeneka mashiku shiku ne ayepo leta Isilaele popepi, mukuta no mukuta ne mukuta wa Juda awopo uhanguliwa. ¹⁷ Joshua ayepo leta ikota ya Juda popepi, ne shikota sha Zerahiti ayepo shi hanguliwa. ¹⁸ Ayepo leta popepi shikota sha Zerahiti pa munu no munu, ne Zabidi ayepo hanguliwa. Ayepo leta lila lya Zabidi popepi, pa munu no munu, ne Akani mwana Karimi, mwana Zabidi, mwana Zera, oyutunda mumukuta wa Juda, ayepo hanguliwa. ¹⁹ Nehoni Joshua ayepo amba kenge kwa Akani, '''Mwanange, otongole yo shemwa pa meho a shinda sha moyo, nyambi wa Isilaele, ne omutongwele eyi onepisha. Nakulomba onitongwele eyi onakwama, wayini holekela.'' ²⁰ Akani ayepo tawa Joshua, ''Yashemwa, nina ipishela shinda sha moyo, Nyambi wa Isilaele, eyi yoliyo nanikwama; ²¹ Owu nanimono shikobelo sho shiwa sho ku Babilona mukachi koitenga eyi nayi ipishiwa, no zoo shekela wo muwayawaya wo silivera, ne no shikoto sho gauda thzo uima wokukuma pa mashekele okukwana 50, amepo niilyelela ne amepo niishimba. Inaholekiwa mumube pa kachi ko tente thzange, ne silivera thzili kushi thzayo. ²² Joshua eyepo tumako atumiwa, awopo ayokololela ku tente nanakukala eyo itenga. Owu akengakengile, awopo aiwana ina holekiwa mutente thzenji shemwa, ne no silivera kushi thzayo. ²³ Awopo a shimba eyo itenga pakachi ko tente ne awopo aileta kwa Joshua ne no kumbunga thzothzihe thza Isilaele. Awopo aimwaela pa meho thza shinda sha moyo. ²⁴ Nehoni Joshua, ne no ma Isilaele wahe awa akalile nenji, awopo ashimba Akani mwana Zera, ne no silivera, no shikovelo, no likoto lyo gauda, no anenji wowa kwelume ne no anenji wowa mbuyama, no ngombe thzenji, no mbongolo thzenji, no ngu thzenji ne, no tente thzenji no itenga yoihe eyi ahetile, ne awopo awaleta kumulonga wa Akore. ²⁵ Nehoni Joshua ayepo amba echi ''Yiñe onatupakela muukalu? Shinda sha moyo kenga akupaka muukalu lelo.'' Ana Isilaele wahe awopo amwandaula no mawe. Ne mumnyima awopo aandaula eyi naishaala no mawe ne awopo awatumeka mumulilo. ²⁶ Awopo atutela peulu thzenji shilambo sho mawe eshi shishilipo no lelo lino. Shinda sha moyo ayepo tundisha uanji wenji ou nauyuuma. Nehoni lithzina lyeshi shivaka po mulonga wa Akore no lelo lino.