1 Nehonine Adoni-Zedeki, fumu wa Jerusalema, ayepo yuva echi Joshua ona kup[ala Ai ne ona li thzilisha kumanishelela [wechi eli na kwama ku Jeriko no fumu wateni], kalo ayepo yuva mbunga thza Gibioni omu ana kwamena kuliyala na Isilaele ne seli ana tungu mwofochi. 2 Mbunga thza Jerusalema athzopo thziyapa nene mukonda Gibioni kuma lyakalile liumbo lyo shokulu, echi maumbo oi kun`a. Kuma lyakalile kupita Ai, ne wahe akwelumeomo kuma akalile a shelume omfuo. 3 Nehonine Adoni-Zedeki, fumu wa Jerusalema, ayepo tuma maywi kwa Honani, fumu wa Hebroni, kwa Piramu, fumu wa Jaramuti, kwa Jafia, fumu wa Lakishi, ne noku kwa Debire, fumu wa Egloni; 4 ''Mukeye kukwange ne namunikwathse. Tu lwishe Gibioni mukonda anakwama kuliyala na Joshua ne no mbunga thza Isilaele.'' 5 Mafumu mutanu oma Amori, fumu wa Jerusalema, fumu wa Hebroni, fumu wa Jaramuti, fumu wa Lakishi ne no fumu wa Egloni ayepo aliwana, awo no masole oo wahe. Ayepo ashisha shilombo sho popepi na Gibioni, ne ayepo alilwisha. 6 Mbunga thza Gibioni athzopo thzi tuma maywi kwa Joshua ne no masole oku Giligali. Echi, ''Othzambule, lelo wa shiyelela moko oe kwa ngamba oe. Oyokolole okeye kukwetu ne no tuyoishe. Otu kwathse, mukonda mafumu wahe oma Amori awa ana tungu mulitunga lyo mikinya ana liwana pofochi echi atu lwishe.'' 7 Joshua ayepo katuka mu Giligali, aye na kwelume wahe omfuo, na kwelume wahe okulwa. 8 Shinda sha moyo ayepo ambela Joshua echi, ''Lelo wawa yapa. Ina wapa mumoko oe. Kuyatukele hinga yofochi kukwo oyu twesha kwimana posho thzoe.'' 9 Joshua ayepo keya kukwo mukuyokolola, kuma aendile ushiku wouhe kutunda ku Gligali. 10 Shinda sha moyo ayepo filikanya etothzi posho thza Isilaele, ne Isilaele ayepo wa paa mupaelo oshokulu ku Gibioni ne ayepo awa shupwela mu mulikun`wa lyo kuthza ku Beti Horoni, kalo ayepo awa paa mulikun`wa lyo kuthza ku Azeka no Makkeda. 11 Kwa chila Isilaele, kushi wo mukinya wa Beti Horoni, shinda sha moyo ayepo wa wishela mawe osho kulu kutunda kuwilu likun`wa lyolihe lyo kuthza ku Azeka, ne ayepo afa. Awa file kumawe kuma a vulile kupita awa paiwile no myele thzo a kwelume a Isilaele. 12 Nehoni Joshua ayepo amba kwa Shinda sha moyo kenge muliyiwa elyo shinda sha moyo apile a kwelume a Isilaele kutwesha Amori. Eyi yoliyo aambile Joshua kwa Shinda sha moyo pameho a isilaele , '' Liyuwa , oimane pa Givioni , ne nowe Ngonda , pa mulapo wa Aijalon.'' 13 Liyuwa alyopo liimana , ne no Ngonda athzopo thziimana kupitela mane mbunga apa thza hushelile omango kuitothzi yo. Eyi yaamba kali ina nóliwa muvuka thza Jasha? Liyuwa alyopo liimana pakachi ko mbembaulu ; kalyatokile shikati shokukwana Liyuwa mukatumbi. 14 Kuyatukele Liyuwa lyokulipitula echi elyo kunyima no kusho , apo Shinda sha moyo a thsingimikile liywi lyo munu . Mukonda Shinda sha moyo kuma alwelelile Isilaele. 15 Joshua ne no Isilaele yomuhe wakalile kukwenji awopo ahuka ku shilombo sho ku Giligali. 16 Honine mafumu mutanu kumaapalile ne awopo akaliholeka mumukoti woku Makkeda. 17 Joshua awopo amutongwela , ''Anawaniwa ! _mafumu okukwanu mutanu ana liholeka mumukoti wo ku Makkeda!'' 18 Joshua ayepo waambela echi, ''Mualumwene mawe osho kulu mushelo sho mukoti ne mupakepo masole echi anyungepo. 19 Amwe mwakala. Mushupwele etothzi yenu mupae awa ana shialela mumanyima. Mwa wa tawisha kuingena mu maumbo oo, mukonda shinda sha moyo ona wamipa mumoko enu.'' 20 Joshua na ana a Isilaele ayepo amanishelela kuwa paelela mupaelob oshokulu, kupitela mane apa nafoto kuwa thzilishela; kuma kwa palile opohuma wowa thzuthzu awa atweshile kukengena mu maumbo omakwakwa. 21 Ne masole wahe ayepo ahukela kwa Joshua kushilombo ku Makkeda mukuliyala. Kuyatukele oyu wa tweshile kupunisha liywi lyo limango lyo kutoya munu yomuhe wo mbunga thza Isilaele. 22 Nehoni Joshua ayepo amba echi, ''Muyanjulele shelo sho mukoti ne muniletele awa mafumu mutanu alimo.'' 23 Ayepo akwama eyi awa ambelile. Ayepo amuletela awa mafumu mutanu kuwa tundisha mu mukoti---fumu wa Jerusalema, fumu wa Hebroni, fumu wa Jaramuti, fumu wa Lakishi, ne no fumu wa Egloni. 24 Owu aletile mafumu kwa Joshua, ayepo isha mukwelume yomuhe wa Isilaele. Ayepo tongwela aeteleli omasole awa athzile kulilwelo nenji, ''Muwa lyate pa mathsingo oo.'' Honine ayepo a henyena ne awopo awa lyata pa mathsingo oo. 25 Ne ayepo waambela echi, ''Lelo mwa yapa ne lelo mwa pemuka. Mukale no kolo no undume. Eyi yoliyo akwama shinda sha moyo kwitothzi yenu yoihe eyi mulwa nayo.'' 26 Ne Joshua ayepo wa kin`a no kupaa mafumu. Ayepo wa thzinisha kuwa angelela kwitondo mutanu. Ayepo anyengelela kuitondo kutwala ku lungulo. 27 Liyuwa owu lya tokile, Joshua ayepo laelela ne ayepo awa shulukisha kwitondo ne ayepo akawa kuhela mumukoti owu aliholekile. Ayepo apaka mawe oshokulu kushelo sho wo mukoti. awa mawe paashili no lelo lino. 28 Mulikun`wa eli, Joshua ayepo kupala Makkeda mwelyo liyuwa no kupaa yomuhe oyu wakalile mo na mwele, pofochi no fumu woo. Ayepo thzilishela munu yomuhe womwo muliumbo. Kaashiilemo wokupala, ayepo kwama fumu wa Makkeda echi eli eli akwamine fumu wo ku Jeriko. 29 Joshua ne no Isilaele yomuhe ayepo apitelela Makkeda kuthza ku Libina. Ayepo lwisha Libina. 30 Shinda sha moyo ayepo pa Libina mumoko a Isilaele---pofochi no fumu wo. Joshua ayepo wa paa no otwe wo mwele wahe awa akalilemo. Kaashilemo wo kupala. Ayepo kwama kwa fumu womo echi eli a kwamine kwa fumu wo mu Jeriko. 31 Ne Joshua no Isilaele yomuhe ayepo ayepo apitelela Libina kuthza ku Lakishi. Ayepo akwama shilombo popepi no ku lilwisha. 32 Shinda sha moyo ayepo pa Lakishi mumoko a Isilaele. Joshua ayepo likupala muliyuwa lyo mushili ne ayepo wa paa no otwe wo mwele , yomuhe oyu wa kalilemo, echi eli akwamine ku Libina. 33 Honine Horamu, fumu wa Gezere, ayepo keya kuna kwathsa Lakishi. Joshua ayepo mu lwisha no mpi thzenji kupitela mane apa nakupili kemonga yofochi wokupala. 34 Ne Joshua no Isiaele yomuhe ayepo a pitelela Lakishi kuthza ku Egloni. Ayepo akwama shilombo popepi ne ayepo alilwisha. 35 Ne mwelyo liyuwa ayepo alikupala. Ayepo awa paa no otwe wo mwele ne ayepo athzilisha yomuhe oyu wa kalilemo, echi Joshua eli a kwamine ku Lakishi. 36 Ne Joshua no Isilaele yomuhe ayepo apitelela Egloni kuthza ku Hebroni. 37 Ayepo alilwisha. Ayepo alikupala no kuwa paa no otwe wo mwele, pofochi no fumu womo no maumbo osho onye alyo, no anu wahe awa akalilemo. Ka shiilemo wo kupala. Echi eli akwamine ku Egloni, kuma ali thzilishile kumanishelela noyu yomuhe wa kalilemo. 38 Joshua ayepo aluka, ne no mpi mpi thzothzihe thza Isilaele kuthzili nenji, ayepo pitelela kuthza ku Debire ne ayepo akalilwisha. 39 Ayepo alikupala, no fumu walyo no maumbo alyo osho thzuthzu opa manyonga. Ayepo wa paa no otwe wo mwele ne no kuthzilisha yomuhe oyu wakalilemo. Kashiilemo wo kupala. Ayepo akwama ku Debire no fumu walyo echi eli akwamine ku Libina no fumu walyo ne no ku Hebroni. 40 Joshua ayepo koma litunga lyolihe, litunga lyo mikinya, Negeve, mulyanda, no mambomba. Kuma fumu oo omahe ka shiileko kemonga yofochi wo kupala. Kuma athzilishelelile shinu shoshihe shokuyoya, echi mwene shinda sha moyo, Nyambi wa Isilaele, eli awa laelelile. 41 Joshua ayepo wa paa kutatekela ku Kadeshi wa wa Baranea kutwala ku Gaza, ne no litunga lyolihe lya Gasheni ti no ku Gibioni. 42 Joshua ayepo kupala wahe awa mafumu no matunga oo mushikati sho fochi mukonda shinda sha moyo, Nyambi wa Isilaele, alwelelile Isilaele. 43 Ne Joshua, no Isilaele yomuhe oyo wakalile kukwenji, ayepo ahuka kushilombo ku Giligali.