¹ Jabini, fumu wa Hazori, owu ayuvile eyi, ayepo tuma maywi kwa Jobabi, fumu wo Madoni, noku kwa fumu wo shimironi, ne noku kwa fumu wo Akishafi. ² Kalo ayepo tuma maywi kuma fumu awa kalile kumutulo wo litunga lyo mikinya, no kunálo wo liviya lya Jordani kumboela wa kinnareti, no mulyanda, ne no mu Nafoti Doro kutwala kuwiko. ³ Kalo ayepo tuma maywi ku makanana kumuvo yuwa no kuwiko, no ku Maamori, no ku Mahiti, no ku Maperizi, no ku Majebusi kulitunnga lyo mikinya, wa Hemoni mulitunga lya Mizipa. ⁴ Mpi thzothzihe eyepo thzikeya noo, palo thzo shokulu thzo mashwalale, muungi echi luheke lwo pa liya lyo likulu lwale. Kuma akalile no palo thzo shokulu thzo ipizi no makoloi. ⁵ Wahe awa mafumu awopo aliwana pa shikati eshi atomine, ne awopo akwama shilombo kumeyu oku meromo kuliloishela mfvo thzo kulwisha isilaele. ⁶ Shinda sha moyo ayepo ambela Joshua kenge, ''Lelo wayapa kumonahala koo, mukonda peunja pa shikati shino kuma niwapa wahe kuma isilaele kwali anu okufa. Kuma ochinaula mithsipa thzo maulu oi pizi yoo, ne wangu o tumeke makoloi oo.'' ⁷ Joshua ne noa kwelume wahe omfvo awopo akeya. Awopo akuma muwangu wangu ku meyu a meromo, ne awopo a lwisha etothzi. ⁸ Shinda sha moyo ayepo opa etothzi mumoko a Isilaele, awopo awa shandaula no kuwa shupwela ku sidoni, no ku Misirefoti maimo, ne no ku mulonga wa Mizipa ku muvoyuwa. awopo awa paa ndoti mwene kupila kemonga yofochi kukwo oyu wa palile. ⁹ Joshua ayepo kwama kukwo echi eli amutongwelile Shinda sha moyo. Ayepo chinathzola mithsipa thzo maulu oi pizi ne no kutumeka makoloi. ¹⁰ Joshua ayepo kahuka mwesho shikati ne ayepo kakupala Hazori. Ayepo paa fumu walyo no mwele. (Hazori lyoliyo liumbo lya kalile lyo shikuná kumatunga ao omahe.) ¹¹ Awopo a paa no mwele shinu shoshihe sho kuyoya eshi sha kalilemo, ne ayepo wa anuena echi a thzilishiwe, nehonine kuyatukele shokumba sho kuyoya eshi a shiilemo kushipuya. Honine ayepo tumeka Hazori. ¹² Joshua ayepo kupala omahe maumbo owa mafumu. Kalo ayepo kupala no mafumu oo ne no kuwa paa no otwe wo mwele.Ayepo wa thzilishelela no otwe wo mwele. echi mwene Mushe ngamba wa Shinda sha moyo eli alaelelile. ¹³ Isilaele ka tumekile kumaumbo a a akalile pa mikinya, shime Hazori. Alyo lyofochi a tumekile Joshua. ¹⁴ Mpi thza Isilaele athzopo thzishimba yoihe etenga yomo mumaumbo omo pofochi noi imunanu kukaiheta. Awopo apaa munu yomuhe no otwe wo mwele kupitela mwene ndoti wahe kufa . kaashiilemo sho kumba sho kuyoya kushi puya. ¹⁵ Echi mwene Shinda sha moyo eli alaelelile ngamba wenji Mushe, mulikun'wa lyofochi, Mushe ayepo laelela Joshua, nehonine Joshua ayepo kwama kuthza mumashiko. Kuyatukele eshi a kanine kukwama kuinu yoihe eyo Shinda sha moyo a laelelile Mushe echi aikwame. ¹⁶ Joshua ayepo shimba lyolihe liya litunga: Litunga lyo mikinya, no litunga lyolihe lya Negeve, no litunga lyolihe lya Gosheni, no kushi thzo mikinya, no nálo thzo liviya lya Jordani, no litunga lyo mikinya thza Isilaele ne no lyanda lyolihe. ¹⁷ Kutunda kumukinya wa Halaki pepi na Edomo, ne no kuthza kumutulo kutwala kokule mane ku Baale Gadi mu mulonga pepi na Lebanoni kushi wo mukinya wa Hermoni, ayepo kwata ma fumu oo wahe ne ayepo wa paa. ¹⁸ Joshua ayepo lwa nowa mafumu awa shikati shoshile. ¹⁹ Kuyatukele kemonga lyuumbo lyo fochi eli lya kwamine kuliyala no mpi thza Isilaele hime mwene Mahivi awa tungile mu Givioni. Isilaele kuma akupalile omahe maumbo mukulwa. ²⁰ Mukonda Shinda sha moyo yoliyo wa kolopishile michima thzo echi a lwishe Isilaele, mukonda echi awa thzilishelele kokupila néke, echi eli a laelelile Mushe. ²¹ Ne Joshua ayepo keya mwo shiya shikati, ne ayepo na thzilisha ma Anaki. kuma akwamine henge mulitunga lyo mikinya, ku Hebroni, ku Debire, ku Anabi, ne no kulitunga lyolihe lyo mikinya thza Juda, ne no kulitunga lyo mikinya lyolihe thza Isilaele. Joshua ayepo wa thzilishelela ne no maumbo oo omahe. ²² Kuyatukele ma Anaki awaashialile mulitunga lya Isilaele hime ku Gaza, ku Gati, ne noku Ashidodi. ²³ Nehonine Joshua ayepo kupala litunga lyolihe, echi mwene Shinda sha moyo eli a tongwelile Mushe. Joshua ayepo litambeka Isilaele echi ali shwane, kuli waela kuthza mumikuta thzo. Nehonine litunga ayepo litulumwisha kukulwa.