¹ Mukwelume ayepo limuka Eva munu wenji ayepo imana muliumbo no kueleka Kaine. Ayepo amba, "Nineleka mukwelume mu kunikwathsa shinda sha moyo." ² Kalo epo eleka minenji Avele. Ne Avele ayepo kala mulithsani, unone Kaine ayepo kala mulimi wo muve. ³ Kuma kwalile kenge pakaci ko shikati Kaine epo leta ku ushuka naalimi kukwama nupu kwa shinda sha moyo. ⁴ Avele aye, ayepo leta ana o mangu o kulivanga no mathzi. Shinda sha moyo epo mutambula nupu thza Avele, ⁵ unone kaine no nupu thzenji kanaaitambula ne. Kaine epo anjipa, no kukwama man'onde mulupala. ⁶ Shinda sha moyo ayepo amba kwa Kaine, "Ine oanjipa ne ine ona kwamena man'onde mulupala? ⁷ Nga onakwama uwa, inga kani kutambulile? Unone ngeci kokwama yoiwa, shivi shina kalela pa shelo ne shaotela kukuendisha, unone yowe uloela kushiendisha." ⁸ Kaine ayepo amba kwa minenji Avele. Kuma kwa tendalile kenge kwashili mulianda, Kaine ayepo katuka kupilukela minenji Avele no kumu paa. ⁹ Ne shinda sha moyo epo amba kwa Kaine, "Kupi ali minoye Avele?" Ayepo tawa ci, "Kanilimuka. Eine yame no munyungi wa minange nji?" ¹⁰ Shinda sha moyo epo amba, "Ine ona kwama? Unyinga wa minoye wa isha ku kwange kutundelela pashi. ¹¹ Nehoni onafu milao kutundelela pashi, apa panayaha misha kanwa kako kutambula unyinga wa minoye utunda mulyoko lyoye. ¹² Ou ulima pashi, kutunda lelo kawa kuku letelanga kuyanga nawa mu ungi. Kenge okala wo kuyauluka no yembaana mu kaye." ¹³ Kaine ayepo amba kwa shinda sha moyo, "Kashitiko kange ka kulu nene kani katwesha. ¹⁴ Yashemwa, onani cithzi mu liyuwa lyo lelo ci nitunde muno mukaye, ne kenge nilioleka oku okana kumona. Kenge ni yauluka no kuyembana mu kaye, ne yomuhe wukuniwana kenge ani paa." ¹⁵ Shinda sha moyo epo amba kukwenji, "Yomuhe waku paa Kaine, naye kenge aku husheliwa omango miendo mutanu no thzili.'' Ne shinda sha moyo epo paka kaine shilimukisho, eci yomuhe wakumuwana, amu lwisha. ¹⁶ Ne Kaine ayepo tunda pa meho a shinda sha moyo no kuka tunga mu litunga lya Node, ku muve yuwa wa Edeni. ¹⁷ Kaine ayepo limuka munu wenji ne ayepo imana mu liumbo. AYepo eleka Enoki. Ayepo umba liumbo ne epo lita lithzina lya mwanenji Enoki. ¹⁸ Enoki ayepo eleka Iradi. Iradi yoliyo wa kalile tata wa Mehujaele. Mehujaele yoliyo wa kalile tata wa Metusaele. Metuseele yoliyo wa kalile tata wa Lameki. ¹⁹ Lameki ayepo yeka ambuyama eeli. Lithzina lyo yumweya lya kalile Ada, ne yumweya lithzina lyenji kuma lyakalile Zila. ²⁰ Ada epo eleka Jabali. Yoliyo tata wawa naa yoyanga mu matente kulisha emunanu. ²¹ Lithzina lya mwapenji lyakalile Jubali. Yoliyo tata wawa naa shikanga Harepa no pala. ²² Zila aye, epo eleka Tubali -Kaine, kuma akalile muka kufuta inu pa kopa no shifu. Ndumbu thza Tubali- Kaine kuma kalile Naama. ²³ Lameki ayepo amba kenge kwa anu enji, ''Ada nowe zila, muteelele liywi lyange; amwe anu a Lameki, mutelele eyi niamba. Mukonda nina paa mukwelume nani kulukisha, no mucaha nani kulukisha. ²⁴ Ngeci Kaine waanekeliwile miendo mutanu no thzili, ne Lameki kenge aku anekeliwa miendo makumi mutanu no makumi eeli." ²⁵ Kalo Adama ayepo limuka munu wenji, ne ayepo eleka mwana wo mukwelume. Ayepo muta lithzina lyo Seta ne epo amba, "Nyambi onanipa kalo mwana wo mukwelume mu shivaka sha Avele, mukonda Kaine wamu paaile." ²⁶ Seta naye epo eleka mwana o mukwelume ne epo muta lithzina lyo Enoshi. Mwesho shikati anu awopo atateka kulombela mu lithzina lya shinda sha moyo.