¹ Lihoka kuma na lipetelela iyama yoihe yomu mulundu kuu nyanyami kwei nakwana shinda ya moyo. Apo amba ku mbuyama, yoshemwa Nyambi na amba, kowakulya shimweya shoku kushitondo sho mulipya'?" ² Mbuyama apoo amba kuliyoka, "Twatwesha kulya kuushuka kutunda kuitondo yo mulipya, ³ ambene koushuka kutunda ku shitondo eshi shili pakaci ko shilwa, Nyambi na amba, 'mwakulyako, shanga ku shikwata, kenge mwa kufa."' ⁴ Liyoka alyopo liamba kwa mbuyama, "Kuwakufa shemwa. ⁵ Mukonda Nyambi alumuka ci apa mulyako ku shitondo kenge meho enu amona, kalo kenge mukala weci Nyambi, kulimuka uwa no umango." ⁶ Apa mbuyama namono ci shitondo poshiwa kushilya, kalo ci shamonahala shiwawa, kalo shaleta kukupwethza no nyanyami, ayepo shimbako ushuka no kulya. Ne ayepo upako ushuka umweya kwa munu wenji, kalo ayepo olya. ⁷ Meho oo wahe awopo amona no kulimuka ci ali shiñekeñeke. Awopo alilukela mamuna oku vata. ⁸ Awopo ayuva liywi lya Nyambi oku enda mu shilwa nako thzo lungulo oku kunapolela mukwelume no mbuyama apo aliholeka mwiitondo yo mushilwa kuyapa lupala lya shinda sha moyo Nyambi. ⁹ Shinda sha moyo apo isha mukwelume no kuamba kukwenji, "mulikupi?" ¹⁰ Mukwelume apo amba, "nina kuyuvu mu shilwa, ne apo niyapa, mukonda kumanenikala shiñekeñeke. Ne amepo nili holeka. ¹¹ Nyambi po amba, "Helye nakutongwela ci kumanokala shiñekeñeke? Munali ku shitondo eshina ni mitumina ci mwalyako?" ¹² Mukwelume po amba, "Mbuyama uyu nonipa yoliyo nanipako, kuma nanipa ushuka kutunda kushitondo, namepo nilya." ¹³ Nyambi shinda sha mooyo apo amba kwa mbuyama, "Ine unakwama?" Mbuyama ayepo amba "Liyoka linaniangela, kalo amepo nilya." ¹⁴ Nyambi shinda sha mooyo apo amba kwa liyoka ci, "Mukonda onakwama kenge, nakukuta muinu yoihe no mukaci koiyama yoihe yo mushilwa. Kenge o enda no lila, no kulya likungu mumayuwa omahe omoyo woye. ¹⁵ Kenge nipaka shithzimbo mukaci kenu nowe no mbuyama, no mukaci ko anoye no anenji. Kenge aku kufulela ku mutwi, kenge wa kuhumela kulishito." ¹⁶ Ayepo amba kwa mbuyama, "Kenge nakuyuvisha kukola koye pakueleka mwaana, mukukola kwoye wakweleka mwaana . Kuhima koye kenge kwakukala kumunu woye, ambene kenge akukuendisha." ¹⁷ Kwa Adama ayepo aamba, "Mukonda onatelela liywi lya munuwoye, no kulya kushitondo, kathza ku mu nani kutumina kuamba, wakulyako, litunga lyo lihe lina kutiwa mulibaka lyoye; kenge wakulya shilya shoye ko kuaya mu mayuwa omahe okuyoya. ¹⁸ Kenge lyakumena minga no shosho , kalo kenge mulya imena yo mushilwa. ¹⁹ Kenge olya shilya sho kutunda ku muliyuwa lyo kumeho oye, kupitela opo uhuka ku muve, omu no tundelela. Mukonda omukwa likungu, kalo kenge wakuhuka kulikungu." ²⁰ Adama ayepo ta munuwenji lithzina lyo Eva mukonda yoloyo mama wowahe awa ayoya. ²¹ Nyambi shinda sha mooyo apo kwamena Adama no munu wenji ivato ayepo wavateka. ²² Nyambi shinda sha mooyo po amba, "Honi munu onapitula weci atwe, onalimuka owa no umango. Honi pano twa mutawethza lyoko lyenji likume, kushimba sho kulya kushitondo sho mooyo, kulya, ci akuyoye kokukana kupwa. ²³ Apo shinda sha mooyo wa atundishile mu shilwa sha Edeni, no kuthza kuka lima lipya elyo napilwe. ²⁴ Nehoni Nyambi wa tundishile mukwelume mushilwa, no kupaka Chelubini ku muveyuwa no kumamela shitondo sho umoyo.