¹ Nehoni liwilu no kaye owu alitunulile kuliumba, no yumbiwa yoihe lyayo. ² Pa liyuwa mutanu no eli Nyambi wakumine kumatunwelo oi kwama aumbile, nehoni wali pumulishile pa liyuwa mutanu na eli kui kwama yoihe. ³ Nyambi wa fiyauthzile liyuwa lyo matatekelo kulininga lyo likenu, mukonda kweli lyo liyo alitulumwishile kuikwama aumbile kumatatekelo. ⁴ Eshi shikati ya amba yo liwilu no kaye, ou yaumbilwe, mu liyuwa lya shinda sha moyo Nyambi ou akwamine kaye no liwilu. ⁵ Ne kwithsa mulundu wa kalile mukaye no itondo ya menine, Mukonda Nyambi shinda sha moyo kalokishile vula mukaye, ne wai munu walimine mube. ⁶ Unone mume wathzile muwilu kutundelela mukaye no kuyulisha popahe pashi. ⁷ Nyambi shinda sha moyo wa umbile munu kutundelela palikungu lyo pashi, no kumu puyela mumayulu mupepo omuya, no munu ayepo kala yumbiwa yo kuyoya. ⁸ Nyambi shinda sha moyo wa kunine shilwa kumuve o liyuwa, Muedeni, no pakamo munu oyu ahumbile. ⁹ Mu muve shinda sha moyo wakunine itondo no kukula ci imonahale nawa mumeho, kalo itowi kuilya. Ne wa kunine shitondo sho moyo pakaci koshilwa, no shitondo sho kulimuka uwa no umango. ¹⁰ Ne lwale lwa tundelela mu Edeni kunayulisha shilwa. Ne kalo kutundapo watepile lwale ku akwama malwale ane. ¹¹ Ne lithzina lyo lwale lwa matatekelo Pishoni. Lyoliyo lipukishela mulitunga lyoliye lya Habile, omu muli Gauda. ¹² Gauda thzomu mulitunga thziwa. mwakala kalo no Badeliumu no liwe lyo onikisi. ¹³ Lithzina lyo lwale lyo mushili Gihoni. Ne olulwale lwa pukishela mulitunga lyolihe lya kushi. ¹⁴ Lithzina lyo lwale lyo mushihatu Hidelekele, lya pokishela kumuve oliyuwa o litunga lya Asho. Lwale lyo mushine po Eufraiti. ¹⁵ Nyambi shinda shamoyo poshinda munu ku mupaka mushilwa sho Edeni ci akwame no kulinyunga. ¹⁶ Nyambi shinda shamoyo watuminene munu, no kumuambela, "Kwei yoihe itondo ili mushilwa mulilyele. ¹⁷ Unone kweshi shitondo sho uwa no umango lelo mwashilya, mukonda elyo liyuwa mulyako, kenge mufa shemwa." ¹⁸ Unone shinda sha moyo po amba, "Kali uwa munu ci akale yofoci. Kenge ni kwama mukwathsi wenji." ¹⁹ Pashi Nyambi shinda sha moyo wahumbile yoihe iyama yomu mulundu no inyunyi yo muwilu. Unone ayepo ileta kumunu ci amone eli atwesha kuisha. Momuhe omu munu aishela ei yumbiwa, co oliyo mathzina ayo. ²⁰ Munu ayepo ipaka mathzina kui yoihe imuna, no inyunyi yoihe yo muwilu, no ikondwama yo mu mulundu. Unone mukonda aye wapilile mukwathsi okumukwathsa. ²¹ Nyambi shinda shamoyo wa mulalishile tulu totukulu nene, munu polala. Nyambi shinda shamoyo po mutundisha kofoci kapali kutupaci twenji no kuwushela nyama omonathzi kalela kutupaci. ²² Kukapali oka atundishile Nyambi shinda sha moyo ku munu po humba mbuyama no kumuleta kukwenji. ²³ Munu po amba, "Eshi shikati, oyupo shishoko oi shoko yange, no nyama thzo nyama thzange. Kenge aishiwa mbuyama; mukonda atunda pa munu." ²⁴ Honine munu kenge ashiya tata wenji no mama wenji, kenge akala na munu wenji, kalo kenge akala nyama thzofoci. ²⁵ Wahe akalile shin'eka n'eka, munu na munu wenji, unone kakalile no honyi.