¹ Kumatattekelo, Nyambi kuma a umbule liwilu no kaye. ² Kaye kana kombiwa kalo kupila shimweya. Milema kuma thzakalile peulo thzo uthzungi. Mupepo wa Nyambi kuma waendauliele peulo o meyu. ³ Nyambi ayepo amba eci, "Kukale liyeye," ne liyeye alyopo likalako. ⁴ Nyambi ayepo mona liyeye, eci kunaloo. Aepo hangununa liyeye ku milema. ⁵ Nyambi ayepo isha liyeye ci "Mutanya," ne ayepo isha milema ci, "Ushiku," Nehoni olu loliyo lungulo no mashiku, eli lyoliyo liyuwa lyo matatekelo. ⁶ Nyambi ayepo amba ci, "Kukale mbembeulu mukaci ko meyu, ne shi hangunune meyu ku meyu." ⁷ Nyambi ayepo amba mbembeulu no kuhangununa meyu aa akalile kushi ko mbembeulu mu meyu aa akalile peulo thzo mbembeulu. Nehoni kopo kukala hengeyo. ⁸ Nyambi ayepo isha mbembeulu "Liwilu." Ne kopo kukala lungulo no mashiku, lyoliyo liyuwa lyo mushili. ⁹ Nyambi ayepo amba ci, "Meyu aa ali mushi o liwilu aliwane mushivaka sho foci, ne kumonahale mube okukutu." Ayepo kukala hengeyo. ¹⁰ Nyambi ayepo isha mube okukutu ci "Kaye," nehoni omo mwaliwanenine meyu ayepo isha moci "Likululwale." Ayepo mona ci kuna loo. ¹¹ Nyambi ayepo amba ci, "Kaye kamenishi imena: Yo kumena ei ipaka nanda no itondo ipaka ushuka ou uli no nanda muushuka, Kuthza mu mipambi thzayo." Ayepo kukala hengeyo. ¹² Kaye akopo kamenisha imena, imena ipaka nanda mu mipambi thzayo, no itondo ipaka oshuka no nanda thzayo mukaci, mu mipambi yayo. Nyambi ayepo mona ci kuna loo. ¹³ Nehoni kopo kukala lungulo no mashiku, lyoliyo liyuwa lyo mushihatu. ¹⁴ Nyambi ayepo amba ci, "Liyeye likaleko mu wilu eci lihangunune mutanya ku ushiku nehoni eci ikale imonisha, mukonda o ikati, mukonda omayuwa no myaka. ¹⁵ Liyeye likale mu liwilu eci lipe liyeye mukaye." Epo kukala kengeyo. ¹⁶ Nyambi ayepo kwama mayeye eli oshokulu, liyeye lyo likulu eci libuse mutanya, ne lyo lionye eci libuse oshiku. Kalo ayepo kwama matungwezi. ¹⁷ Nyambi ayepo apaka mu liwilu ci ape liyeye mu kaye, ¹⁸ eci abuse mutanya no oshiku, ne no kuhangununa liyeye ku milema . Nyambi ayepo mona ci kuna loo. ¹⁹ Kopo kukala lungulo no mashiku, lyoliyo liyuwa lyo mushine. ²⁰ Nyambi ayepo amba ci, "Mumeyu kuyale iumbiwa yo ingi yo kuyoya, kwikale enyunyiiunduke peulo thzo kaye muwile." ²¹ Nyambi ayepo omba iumbiwa yo ikulu yo mulikululwale, no shiubiwa shoshihe sho kuyoya mu mupambi washo, iumbiwa yo kuenda nehoni ei yayalile mumeyu momuhe, ne enyuni yoihe yo mando mu mupambi wayo. Nyambi ayepo mona ci kunaloo. ²² Nyambi ayepo ifuyawethza, eci, "Mueleke nehoni mubule, ne muyale mu meyu mumakululwale. Enyunyi ibule pa kaye. ²³ Kopo kukala lungulo no mashiku, elyo lyoliyo liyuwa lyo mushitanu. ²⁴ Nyambi ayepo amba ci, "Kaye kalete iumbiwa yo kuyoya, kuthza mumupambi wayo, eyama, nei yo kuendisha mala, ne no ikashama yo mukaye, kuthza mumupambi wayo." Ayepo kukala kengeyo. ²⁵ Nyambi ayepo kwama ikashama yo pakaye kuthza mu mupambi wayo, eyama mumipambi wayo, nei yiendisha mala pashi. Ayepo mona ci kuna loo. ²⁶ Nyambi ayepo amba ci, Tukwame munu mushifwa shetu, no kulipitula kwetu. Eci abuse ethzi thzo mu makululwale, no enyunyi yo muwilu, no eyama, no kaye ko kahe, no ikokwama ei ikokawa pashi." ²⁷ Nyambi ayepo omba munu mu shifwa shenji. Ayepo muumba mushifwa shenji. Ayepo umba mukwelume no mbuyana. ²⁸ Nyambi ayepo wa fiyauwethza no kuwa ambela eci, "Mueleke, ne mubule. Muyale mukaye, ne mukabuse. Mubuse ethzi thzo makululwale, no enyunyi yo muwilu, ne noi yoihe ei iyoya no kuenda pa kaye." ²⁹ Nyambi ayepo ambaci, "Mumone, ina mipa imene yoihe ei ipaka oshuka ei ili pakaye kokahe, ne no shitondoshoshihe eshi shili no shuka eshi shili no nanda mukaci. Henge shikala shilya shenu. ³⁰ Kui yama yopa kaye, ku shinyunyi shohsihe sho muwilu, nehoni no shinu sho shihe shienda no lila pa kaye, ne no shiumbiwa sho shihe eshi shipuya mupepo o kuyoya inashipa sho ushombo shoshihe eci shikale shilwa." Ayepo kukala hengeyo. ³¹ Nyambi ayepo mona yoihe akwamine. Eci inaloo. kukala lungulo no mmashiku, eli lyoliyo liyuwa lyo 6