¹ Unone Paulusi, kushikwatelela kulikanya no kupaa afundishiwi a Fumu, ayepo thza kwa mupulisita shokulu ² no kukamulomba man'olo okuthza nao mu masinagoge omu Damaseka, ci ou akawana munu yomuhe oyu shupwela likun'wa lya Fumu nji mukwelime nji mbuyama atweshe kuwakwata no kuwaleta ku Jelusalema. ³ Kuli, mulikun'wa ou akokelile ku Damaseka, popo mwene ayepo mona mwethzi oshkulu ou watundile kuwilu ou waethsile nene apa aklile popahe; ⁴ ayepo wela pashi kalo ayepo yuva liywi lyaambile kukwenji, ''Saule, Saule ine oninyandishela?'' ⁵ Saule watawile, ''Yowe elye, Fumu?'' Fumu wambile, ''Yame Jesu oyu onyandisha; ⁶ unone okatuke, oingene mu mbongi, henge okatongweliwa ei onaloela kukwama.'' ⁷ Nehoni akwelume awa aendile na Saule emanine kwananakomoka, liywi aliyuva, unone kamono munu. ⁸ Saule ayepo pinduka pashi, ou akengile wakwangile kumona; honi awopo amukwatelela ku lyoko nokumuleta mu Damaseka. ⁹ Mumayuwa ahatu katweshile kumona, kalo kalile nji kunwa. ¹⁰ Honi kwakalile mufundishiwi mu Damaseka olithzina lyo Ananiasi. Fumu ngou ambile kukwenji mu shimonisha ci, ''Ananiasi!'' ayepo amba, ''Omone, yame ono kuno, Fumu.'' ¹¹ Fumu ayepo muambela ci, ''Okatuke, othze mulikun'wa eli aneshanga ci likunwa lyo kuoloka, kunjiyo thza Judasi okepule mukwelume oyu tunda ku Tarese lithzina lyenji Saule, mukonda alombela. ¹² Onamono mushimonisha mukwelume olithzina lyo Ananiasi kunamupa moko ci amone kalo.'' ¹³ Unone Ananiasi watawile ci, ''Fumu, ninayuvu kwa anu owangi yoyu mukwelume, omu ananyandishela anu oe owakenu mu Jelusalema. ¹⁴ Onapiwa okolo kutunda kwa mupulisita shokulu ci nakwate munu yomuhe oyu isha pa lithzina lyoye.'' ¹⁵ Unone Fumu wamuambelile ci, ''Othze, mukonda yoliyo ninahangula ci akale shikwamisha shange, kutwala lithzina lyange kwa anu angana no mafumu no ana Isilaele; ¹⁶ mukonda kenge nimumonisha ukulu o likando ana loele kunyanda ko lithzina lyange.'' ¹⁷ Honi Ananiasi ayepo katuka, kukengena munjiyo. Ayepo kamupaka moko, ayepo amba, ''Minange Saule, Fumu Jesu oyu walimonahalishile kukoe mulikun'wa kokeya onanitumu ci nanikupolishe meho oye amone kalo oyale mupepo oukenu.'' ¹⁸ Popo mwane enu yokulipitula eci nyathzi ayopo itunda mu meho a Saule, ne ayepo mona; ayepo katuka nokukolovethziwa kalo ¹⁹ ayepo lya kalo mbeci akale no n'anyo. Ayepo wikala na afundishiwi mu Damaseka mayuwa oangi. ²⁰ Popo mwene ayepo tateka kuamba ya Jesu mu masinagoge, kuamba ci yoliyo mwana Nyambi. ²¹ Wahe awa amuyuvile akomokile no kuamba ci, ''Oyu kali yoliyo mukwelume oyu nathzilisha mu Jelusalema awa naishanga apa pa lithzina? Shime nakeya kuno kunawaanga ci awtwale kwa apulisita oakulu.'' ²² Unone Saule mbeci akolope nene, kalo shime ayuvishile omango ku micima Majuda awa akalangile mu Damaseka kokuwamonisha ci Jesu yoliyo Kelesite. ²³ Apa kwapitile mayuwa oangi, Majuda awopo aliyongola ci amupae. ²⁴ Unone Saule ayepo limuka ei aliyongolile. Awopo amutatelela ku mashelo o lyumbo mutanya no oshiku ci amupae. ²⁵ Unone afundishiwi enji amushimbile oshiku nokumupaka mukatanda no kumuulumukishela pa limota lyo lilapa. ²⁶ Ou anakumine ku Jelusalema, Saule ayepo eleka kuliwana na afundishiwi, unone wahewahe shime amuyapile, katawile ci naye onapiluka mufundishiwi. ²⁷ Unone Banabasi wamushimbile kumleta kwa apositola, no kuwatongwela omu Saule amonenine Fumu mu likun'wa nomu ambaulelile nenji, nomu Saule afundishelile mu Damaseka mu lithzina lya Jesu. ²⁸ Wakalile no no kuendaula no mu Jelusalema. Wafundishile shuwana mulithzina lya Fumu Jesu ²⁹ no kulikananisha no Majuda o magelike; unone kuma akwatelelile kufota kumupaa. ³⁰ Akakulitawa ou alimukile, awopo amuleta ku Sesarea no kumutuma ci athze ku Tarese. ³¹ Honine, keleke mu Judea momuhe, Galilea, no mu Samaria kwakalile kuliyala; makeleke kuma akulile; no, kuenda ko kuyapa Fumu no kuhengahengiwa ko mupepo oukenu, keleke thza kulile muungi. ³² Honi akopo kukwamahala ci, Pitolosi ou athzile no kuthzinguluka mulitunga momuhe ayepo keya kwa anu a Nyambi awa atungile mu mbongi thza Lida. ³³ Oko akawanine mukwelume olithzina lyo Aenaniasi, oyu wakolile myika mutnu na thzihatu ko kukutela elama. ³⁴ Pitolosi ayepo muambela ci, ''Aeniasi, Jesu Kelesite akupolisha. Okatuke oshimbe mumbeta oe,'' ne popo mwene ayepo katuka. ³⁵ Homi wahe awa akalangile mu Lida no mu Sharoni ou amonine oyo mukwelume awopo ahuka kwa Fumu. ³⁶ Kwakalile mufundishiwi yumweya mu Jopa olithzina lyo Tabita(kokuamba ci ''Dokasi''). Oyu mbuyama wakalile no ekwama yoiwa no shihemo kwe ehutu. ³⁷ Omo mumayuwa nao ayepo kola ne po fa; ou amanine kumuhupa, awopo amupaka munjiyo thzo kuwilu. ³⁸ Pakuninga ci Lida neli pepi no Jopa, kalo afundishiwi ayuvile ci Pitolosi kwakaile, awopo atuma akwelume eli kukwenji, nokukamuambela ci, ''Oyokolole tuthze.'' ³⁹ Pitolosi ayepo katuka no kuthza no. Ou akakumine awopo akamutwala ku njiyo nthzo kuwilu, mafakathzi kuma aimanuine kumbali kwa lila awopo amumonisha evata ei awakwamenangile Dokasi kushili no. ⁴⁰ Pitolosi wawapunisjile wahewahe munjiyo, ayepo tongama, no kulombela; nehoni ayepo pilukela ku shivimbi, ayepo amba, ''Tabina, opinduke.'' Honi ayepo thsikula meho enji, nepo mona Piltolosi ayepo kongomana. ⁴¹ Pitolosi ayepo mukwata no kumuimanisha; ayepo isha anu a Nyambi ouwakenu no mafakathzi, ayepo mutambeka kukwo kuyoya. ⁴² Ei enu ayopo iyuvahala mu Jopa momuhe, anu owangi awopo alitawa kwa Fumu. ⁴³ Pitolosi ayepo kala mu Jopa mayuwa oangi kwa mukwelume olithzina lyo Simoni, mukakunyuka.