¹ Saule neli atawa kupaiwa kwenji. Honi muliyuwa elyo likando lyo likulu lyopo litatekela mukeleke thzo mu Jelusalema; na akakulitawa awopo ashandauka kuthza kumatunga a Judea na Samaria, hime apositola wafoci wolyo ashiyalile. ² Akwelume akakulitawa awopo akavumbeka Setefani kalo awopo amulila manene. ³ Unone Saule neli aeleka kuipisha keleke. Neli aingenanga munjiyo no njiyo, kushimba akwelume na mbuyama wahe kuapaka mukamenga. ⁴ Aka kulitawa awa nalihanda awopo athza no kufundisha liywi. ⁵ Filipi ayepo thza ku mbongi thza Samaria nepo kaamba kukwo ya Kelesite. ⁶ Mbunga thzoshongi athzopo thziteelela shuwana-wana ei nafundisha Filipi; awopo amuyuva ko mucima ofoci, kalo namono imonisha ei nakwama. ⁷ Mipepo thzo thzimango po thzitunda kwa anu oangi awa akalile nathzo, ko thzikuwa no liywi lyoshokulu, owangi awa nakukutela ilama no ilema awopo apolishiwa. ⁸ Cohoni kwakalile kunyanyuka omo mu mbongi. ⁹ Unone nakukala omo mumbongi mukwelume olithzina lyo Simoni, oyu nakwama masheno; neli akomokishanga anu oku Samaria kulishangala ci aye munu omukulu manene. ¹⁰ Aka Samaria wahe kutatekela koyu omuonye kuthza koyu omukulu, kuma nateelelanga no kutwala maano kukwenji; kwa amba, ''Oyu mukwelume oli nokolo wa Nyambi ou uishiwa ukulu.'' ¹¹ Kuma namuteelelanga mukonda kuma nawakomokisha no masheno enji pa shikati shoshile. ¹² Unone apa nalitawa kwa Filipi apa naamba yo evangeli thzo ufumu wa Nyambi no lithzina lya Jesu Kelesite, awopo akolovethziwa, akwelume na ambuyama wahe. ¹³ Hianga Simoni ayepo litawa, ne apa namana kulovethziwa ayepo ikala na Filipi kukwatelela. Apa namono imonisha no ekwama yoshokulu koikwamahala ayepo komoka manene. ¹⁴ Honi apositola apa nayuvu ci Samaria onatambula liywi lya Nyambi, awopo atumako Pitolosi na Joani. ¹⁵ Apa nanakumuko , awopo nawalombelela, ci atambule mupepo oukenu. ¹⁶ Mukonda, kana tambula mupepo oukenu; kuma nakolovethziwa pohuma mulithzina lya Fumu Jesu.Hime apa nawalombelela mbeci autambule. ¹⁷ Cohoni Pilosi na Joani awopo apaka moko peulu thzo, nepo atambula mupepo oukenu. ¹⁸ Cohoni Simoni apa namono ci mupepo oukenu wapiwa kwa anu apa apositola apaka mooko pa anu. Ayepo wapa mali. ¹⁹ Ayepo amba, ''Mutawethze, name, ci munu yomuhe nipaka mooko, atambule mupepo oukenu. ²⁰ Unone Pitolosi ayepo muambela, ''Shilivela shoye shifele pofoci noye, mukonda waayala kuwana mbuyo thza Nyambi no mali. ²¹ Kolimo no shipathsi omu muinu ei, mukonda mucima woye kauloile kwa Nyambi. ²² Nehoni oshiye omango woye,olombele kwa Fumu, nahimingwa henge akutetela ku omango uli mumucima woye. ²³ Mukonda nahamona ci oli mu uhungu oululu kalo onaangeleliwa mu omango.'' ²⁴ Simoni ayepo tawa no kuamba, ''Onilombelele kwa Fumu, ci kwei onamba inga kwithsa shikwamahala kukwangwe.'' ²⁵ Apa namana kupaka no kuamba liywi lya Fumu, Pitolosi na Joani awopo ahuka ku Jelusalema, kwaamba evangeli mu maumbo oangi mu Samaria. ²⁶ Honi lingeloi lya Fumu alyopo liamba kwa Filipi ci, ''Okatuke othze kumboela ku lin'waa litunda ku Jelusalema kuthza ku Gaza.' (Eli likun'wa lili mulihalaupa.) ²⁷ Ayepo katuka no kuthza. Ayepo mona, mukwelume oku Etopia, neli ngamba omukulu wa Kandasi, fumu o mbuyama oku Etopia. Yoliyo muendishi o lufumo lwenji loluhe. Hime nakeya ku Jelusalema kunalombela. ²⁸ Kohuka ku lyumbo lyenji kunakongomana mu koloi thzenji, kalo kutala mupolifita Isaya. ²⁹ Mupepo awopo uambela Filipi, ''Othzeko okakale po pepi nethzi koloi .'' ³⁰ Filipi ayepo mundandumukela, nepo muyuva kutala Isaya mupolofita, nepo amba, ''Eine wayuvishisha ei otala?'' ³¹ Cohoni ayepo amba, ''Ngepi nga niyuvishisha kokupila munu okuninehethza?'' Ayepo isha Filipi ci athzine mukoli nakale nenji. ³² Honi shivaka natala mulin'olo oyo muka Etopia neli eshi, ''Hime natwaliwa weci mangu athza kukupaiwa, kalo weci manguana anatutwala kwali no mukakuteula o hunga wao, cohni kanayanjulula kanwa kenji. ³³ Mukulihusha pashi kwenji kuatuliwa nawa akopo kutundishiwa kukwenji. Elye twesha kulangulula mukuta wenji? Mukonda moyo wenji nautundishiwa pano pa kaye.'' ³⁴ Cohoni oyo ngamba yokulu ayepo ambela Filipi, ci, ''Nakulomba, oniambele elye oyu aamba mupoloita apa, aye shemwa, nji munu wawo?'' ³⁵ Filipi ayepo tateka kuamba, po tatekela kuamba yolin'olo elyo nepo muambela yo evangeli thza Jesu. ³⁶ Apa naende hengeyo mu likun'wa, awopo nakuma okukwakalile meyu ne oyo ngamba shokulu poamba, ''Omone, meyu aa. Shine shinikwangisha kukolovethziwa?'' ³⁷ Filipi ayepo amba, ''Ngeci watawa no mucima woye ouhe, watwesha kukolovethziwa.'' Oyo oku Etopia po tawa, ''Natawa ci Jesu Kelesite mwana Nyambi.'' ³⁸ Honi oyo muka Etopia ayepo tuminina koloi ci thzimane. Awopo aingena mu meyu, Filipi noyo ngamba shokulu wahe, ne Filipi ayepo mukolovethza. ³⁹ Owa ombokile mu mueyu, mupepo wa Fumu awopo utwala Filipi kwako, oyo ngamba shokulu kanamumono kalo, unone ayepo thza mumuendo wenji kunanyanyuka. ⁴⁰ Unone Filipi ayepo kamonahala ku Azoto ne ayepo pita omo mulitunga, kuamba yo evangeli mumambongi oahe hime owu akakumine ku Sesarea.