¹ Ma pulisita oshukulu apo amba, "Eyi enu ya shemwa?" ² Setefani aepo amba, "Akulwange no a tata, mutele: Nyambi o miethso wa monahalile kwa tata wetu Abrahama oshili mu methso potamiya, koshime kukala ku Harani; ³ Aepo amba kukwenji, 'o shiye shivaka shoe no apoe, othze mu litunga na kukumonisha.' ⁴ "Epo shiya litunga omo a kalile lio Makaladea no kukala mu Halani; kutunda apo, mu manyima okufa tata wenji, Nyambi wa muletile mushibakeshi, omu muli pano. ⁵ Kwithsa eshi a mupile yo kuyola kwithsa, shinga po kuliata liulu lienji. Unone wa kulupalishile -nepone Abrahama ko shime kuwana mwana -eci a ku mupe sho shibaka ku kala shenji ne kulienji. ⁶ Nyambi wa wambile ku kwenji ci, eci ekulyoe henge aku thza mu litunga lia lio no kuka kwamiwa omango mu litunga elio, no kuka kwamiwa apika pa myaka thzo ku kwana ita ine thzo myaka. ⁷ 'Unone henge na ku atula litunga elio lia yoishile, kuamba Nyambi, 'no kutunda apo henge a kwiya no kunilombela mushibaka eshi.' ⁸ Apo Nyambi wapile Abrahama umbusha wo mukonda, nehoni Abrahama aepo kala tata wa Isaka no kumutwala ku mukanda mu liyuwa lio mutanu na atu; Isaka aepo kala tata wa Jakobo tata wo mikuta thzo likumi no mikuta thzili. ⁹ "Mukonda shiya shikuta sha felelile Josefa muka, wa mu ulishile ku Engepita; uno Nyambi wakalile nenji ¹⁰ no ku mu amwena mu makando enji o wahe. wapile Josefa kuyoya nawa no unyanyami pameho a Faro, fumu wama Engepita, oyu wamu hangulile ku endisha Engepita nei yoihe ya kalile munjiyo. ¹¹ " Kwa keile njala mu Engepita no Kanana, no makando o makulu, ne atata wetu kwithsa a wanine yo kulya. ¹² Unone Jakobo wa yubile eci koili yo kulya ku Engepita, wa tumine a tata wetu mwendo o mutatekelo. ¹³ Mwendo o mushili Josefa aepo kwama eci a kulwenji a mulimuke, Nehoni epo a Josefa hakumine pa kulimukwa kwa Faro. ¹⁴ Josefa wa ushile a kulwenji kuka tongwela Jakobo tata wo eci eye ku Engepita, pofoci na penji, makumi mutanu na eli na anu mutanu wo wahe. ¹⁵ Apo Jakobo wathzile ku Engepita no ku kafa, Aye no wa tata wetu. ¹⁶ Wa wa twalile ku shikemi no ku kawa tuleka ku shibaka esho a ulile Abrahama no mali kwa ana ahamoli ku shikemi. ¹⁷ "Apo sha kumine shikati esho a mu kulupelishile,ku kulupisha kuya akulupelishile Nyambi Abrahama, anu wa kulile no kubula mu Engepita, ¹⁸ Kupita apo a kuyola fumu wao mu Engepita, fumu oyu na kana kulimuka ya Josefa. ¹⁹ Wa angelile anu etu no ku otela a tata wetu ku a kwangisha eci kakala na ana shitele ayoye. ²⁰ "Mu shikati esho Mushe ayepo elekiwa; wa loile nene pameho a Nyambi no ku mu yamwisha maonda ahatu munjiyo thza tata wenji. ²¹ Hapa a mupakile pola, mwana Faro o mbuyama wa mutolile no ku mupilula eci mwa nenji wo mukwelume. ²² Mushe wali longethsile o nyanyami oue wa ma Engepita, no okolo mu mai enji ne ikwama. ²³ "Unone apa akwanishile myaka thzo makumi ane, kwa keile mayalo mu muchima wenji wo ku ka ungelisha a kulwenji, ana a Isilaele. ²⁴ Kumona mu Isilaele okwamiwa omango, Mushe wa mu amwenine no ku kwama omango oyo munu a lwishile mu Isilaele: ²⁵ wayalile eci akulwenji kenge a yubishisha ci Nyambi ko lioko lyenji kenge a wa yoisha, uno ka yubishishile. ²⁶ Liyuwa lia hatileko wamonine a kwelume eli o kwalwa wa elekile kuleta ku liyuba mukaci koo, ku amba, Akwelume, mu anu no mwapenji, ine muli kulukushela?' ²⁷ "Unone oyu wepishelile muenjenji wa mu shindekile no kuamba, 'Elie oyo na kuangula ci o kale muendishi no ku atula yatwe? ²⁸ Wafota kunipaa, eci liya no paya mu Engepita yana?' ²⁹ Mushe wa cilil munyima thzo kuyuba eshi shiamba, aepo kakala mwenda mu litunga lia Midiyani, oko wa kakalile tata wa ana eli. ³⁰ "Munyima thzo myaka makumi ane kupita, lingeloi lia keile ku kwenji mu mbulwa kukutu pa mukinya wa Sinai, muliyeye lio mulilo mu mulundu. ³¹ Mushe apa monine mulilo, a komokile nene; wo wathzile ci a kamone, kwa keile liywi lia Nyambi, kuamba, ³² 'Yame no Nyambi tata wa tata oe, Nyambi wa Abrahama, noyu wa Isaka, noyu wa Jakobo.' Mushe wa tutumine no kupila o ndume wo kumona. ³³ "Fumu wa ambile ku kwenji, 'O tundishe makatulo oye ku mahulu, apo unemana pa kenu. ³⁴ Nina mono likando lio anu ange awo ali mu Engepita; Nina yubu kulila ko, we neya kuna wa amwena; Neone owiye,henge ni kutuma ku Engepita.' ³⁵ "Oyu Mushe akanine, Hapa ambile, 'Elie nakuangula muendishi no kuatula? _yo lio a tumine Nyambi ku busa no ku ayoisha. Nyambi wamutumine ko lioko lia lingeloi elio lia mona halile kwa Mushe mu mulundu. ³⁶ Mushe wa watundishile mu Egepita, munyima thzo kukwama ikwama ikomokisha no imonisho mu Engepita no ku liwate lio likihu, no mu mbulwakukutu pa myaka thzo makuni ane. ³⁷ "Yolio Mushe kalo wa ambile kwa ana a Isilaele 'Nyambi kekenge apindula mupolofita wo kulipitula eci ane.' ³⁸ Yolio mukwelume wakalile mu mungi mu mbulakukutu no mangeloi awa ambile ku kwenji pa mukinya wa Sinai, oyo wakalile na tata wetu, noyu wa tumbulile liinlio mwoyo lia keile ku kwetu. ³⁹ "Unone a tata wetu a kanine ku mulemeka; amushindekile kutunda mukaci ko, micima thzo thza hukile ku Engepita. ⁴⁰ Mwesho shikati ambile kwa Aroni, 'Otukwamene Nyambi wo ku tuendisha. Eci eli Mushe, na tutundisha mu litunga lia Engepita, katulimuka ei nai kwa mahala ku kwenji. ⁴¹ Ngo wa kwamine namani ao mayuwa no kuleta shitabelo ku athzimu o ma swaniso, no ku nyanyukela ekwama yo moko o. ⁴² Unone Nyambi wo waishile eci a lombele matungwethzi omuwilu, eci eli na n'oliwa mu buka thzo mapolofita, 'Mwami paelile thsiyama eci shikale shitabelo mu myaka thzo makumi ane mu mbulwakukutu, munjiyo thza Isilaele? ⁴³ Mwatawile tabanakele thza Moleki no litungwethzi lia thzimu wa Refani, no ikupulo ei mwa likwamenine eci muilombele: ime nakumi tundisha mu Babilona.' ⁴⁴ "Atata wetu akalile no tabanakele thzo upaki mu mbulakukutu, eci Nyambi apa ambile kwa Mushe ci, Akwame eci lia mu monishile. ⁴⁵ Munyima, a tata wetu mushi thza Joshuwa a tumbulile tabanakele no kwiya nathzo apo ashimbile shibaka. Nyambi wa shimbile shibaka mu matunga no ku atundisha pa meho wo w tata wetu. Tabanakele thza shiyalile mu shibaka sha Davida, ⁴⁶ Oyu wa wanine shiemo kwa Nyambi, no kulomba eci hinga wana shibaka sho kukala ku njiyo thza Jakobo. ⁴⁷ Unone Solomoni yo wa ambile njiyo thzo Nyambi. ⁴⁸ ''Nehoni, Nyambi kakala munjiyo thzo kuamba no moko anu, eci eli amba mupolofita, ⁴⁹ 'Liwilu shiba sho Nyambi, no kaye polio a liata maulu ange. Mushobo mwine wo njiyo ou ni umbela? kuamba Fumu, nji shibaka mwine o mu ni kali tulumwishelo? ⁵⁰ Moko ange ka kwamine yoihe ya inu? ⁵¹ "Amwe anu oli kamba no shin'eka-n'eka,awa a kakukana kuthza ku mukanda mu mucima thzenu no matwi, mwa kanisha mupepo ou kenu, mwakana ci atatawenu eli akwamine. ⁵² Yupi mulofita oyu ana kana kunyandisha atata wetu? A paile mapolofita ao wa monahalile kwiya no uwa; muneya no kukala anu o a mango nawa aka kupaa, ⁵³ amwe mwa anu na mutambula mulao uya letile mangeloi, unone ka mu utulekile.'' ⁵⁴ Nehoni a kwa mulao apa yubile ei inu, wa anjipile mu micima thzo, no kulihumena sitibini no maeo. ⁵⁵ Unone aye kokuyala mupepo o ukenu, ayepo kenga ku wilu no kumona kuethsa kwa Nyambi; no kumona Jesu o nemana ku lioko lio shilio lia Nyambi. ⁵⁶ Setefani ayepo amba, ''Kenga, namona liwilu lina ya njuluka, no mwana munu o nemana ku lioko lio shilo lia Nyambi." ⁵⁷ Apo a kwa mulao ali bukile mumatwi, no kukuwa ko liywi lio likulu, wa thzile ku kwenji no mayalo ⁵⁸ ofoci. Wa mutundishile mukun'a no kutateka kumukuwa mawe. Apaki apakile eto yo ku mahulu o mucaha wa lithzina lio Saule. ⁵⁹ Wo wa kalile no ku mukuha mawe Sitibini, ayepo weshile Fumu no ku amba, "Fumu Yesu, o tambule moyo wange." ⁶⁰ Ayepo kinyama pashi no kwisha ko liywi lio shokulu, wa wa tulekile o mango o.'' O wa manine kuamba ei, aepo lala.