¹ Honi mumaiwa a, palo thza afundishiwi ou nathzikulu manene, Majuda o Magelike awopo avilaela kwa Maheveru, mukonda afakathzi o kanawananga okwathsi shuwana. ² Honi o likumi na eli awopo aisha afundishiwi owangi nokuambela ci, ''Kakuloelile ci tushiye liywi lya Nyambi ci tukwame yo methsa. ³ Muhangule, amwe apetu, mukaci kenu akwelume mutanu naeli oku lemekiwa awa anayala mupepo no kunyanyama, twapake omu muikwama ei. ⁴ Atwepo, henge tutanalisha mukulombela no ekwama yo liywi.'' ⁵ Ou muambelo ou hime auloelile anu wahe ngapa ahangulile Setefani, mukwelume o kulitawa no kuyala mupepo ou kenu, no Filipi, Prokolo, Nikanora, Timoni, Paminase, no Nikolasi mukakulitawa oku Antioke. ⁶ Akakulitawa awopo akaleta awo akwelume kwa apositola, awopo nawalombelela no kuwapaka moko. ⁷ Liywi lya Nyambi alyopo liyandumuka , no afundishiwi mu Jelusalema awopo abula manene, kalo ungi ombunga thzo ma pulisita awopo nalitawa. ⁸ Honi Setefani, wayalile shihemo no ukolo ayepo kwama ikomokisha no imonisha yo shongi kwa anu. ⁹ Unone po kukeya anu omu sinagoge ethzi naishanga ci sinagoge thzakakuliyala, thzoku Sireni noku Alexandria, no amweya kutunda ku Silia noku Asia. Awa anu awopo alikananisha na Setefani. ¹⁰ Unone kanatwesha kukanana no unyanyami uo nakala nawo no mupepo ou naamba nawo Setefani. ¹¹ Awopo ahongaula anu ci ambe ci, ''Tunyuvu Setefani kuamba maywi okulimbununa maywi a Mushe naa a Nyambi.'' ¹² Awopo afuwelela anu, akulu, aoli, awopo akeyela Setefami nokunamuanga kumutwala mu kuta. ¹³ Awopo aleta mapaki oanda, awa ambile ci, ''Oyu mukwelume kashiile kuamba maywi oamango ku shivaka shoshikenu no mulao. ¹⁴ Mukonda tunamuyuvu kuamba ci Jesu oku Nathzareta henge episha shino shivaka no kuakulula shithzo atushielile Mushe.'' ¹⁵ Wahe awa akalile mukuta awopo amulupukela ne awopo amona shihanga shenji koshilipitula no shihanga sho lingeloi.