¹ Honi mukwelume yumweya o lithzina lyo Ananiasi, na munu wenji Safira, waulishile shilwa, ² ne ayepo litulekela amweya ku mali aulishile (munu wenji naye kuma alimukile), ayepo leta amweya no kunaapaka ku maulu a apolsitola. ³ Unone Pitolosi po amba, ''Ananiasi, Satani ngepi anengena mu mucima woye ci oangele mupepo oukenu no kulitulekela mali amweya onaulisha shilwa? ⁴ Koshishime ku ulishiwa, kanashikala shilwa shoye, shanga munyima thzo kushi ulisha, kali yowe nashi endisha? Kwakeya ngepi ci oanekele enu yokengeya mu mucima woye? Ko angelile anu, unone Nyambi.'' Ou ayuvile aa maywi, ⁵ Ananiasi ayepo wela pashi ayepo fa, ne wowa oukulu awopo u ingenena wahe awa aiyuvile. ⁶ Nehoni akwelume awopo akeya kunamuvungela mushito no kuthza kukamuvumbeka. ⁷ Munyima thzo mahola ahatu munu wenji po ingena, kunakana kulimuka ei inakwamahala. ⁸ Pitolosi ayepo mu ambela, ''Oniambele ngeci kuma namu ulisha shilwa pa mali akuma apa.'' Ayepo amba, ''Eee, apo mwene.'' ⁹ Honi Pitolosi ayepo mu ambela, ''Ngepi nakukeya ci mwahe muliyuve ci mu eleke mupepo wa Fumu?'' Omone milo thzawa anaka vumbeka munu woye ethzo thzili pa shelo, ne kenge akeya kuna kushimba.'' ¹⁰ Popo mwene ayepo wela pashi ku maulu enji no kufa. Akwelume ou aingenine, anamuwana ku nafu, awopo amushimba kuka muvumbeka ku nyonga thza munu wenji. ¹¹ Wowa oukulu awopo uingenena keleke thzothzihe nawo wahe nayuvu ei enu. ¹² Imonisha no ikomokisha yoyingi kuma naikwamahala mukaci ka anu ko moko a apositola. Wahe kuma akalile mu tempele thza Solomoni. ¹³ Unone kwithsa ku anu ameya oyu nakala no ondume o kuliwana no; shanga, kemgeyo anu kuma nawashangala nene. ¹⁴ Akakulitawa awa akeile kwa Fumu akwatelelile kuvula, a kwelume na ambuyama owangi, ¹⁵ ci mane awopo aletanga akakukola ku makun'wa no kunawalangeka po lili wo no pa mishelu thzo, ci Pitlosi ou apita, mumbule wenji uwathsike. ¹⁶ Kalo anu owangi kutunda ku mambongi anathzinguluka Jelusalema awopo akeya kunaliwana, kuleta aka kukola nawa ana igeniwa ko mipepo thzo thzimango, ne wahe awopo apolishiwa. ¹⁷ Unone mupulisita shokulu ayepo katuka, nawa nakala nenji (aka kulifundisha yo u Saduki); kuma ayuvile shipulu ¹⁸ ne awopo akwata apositola, no kuwapaka mu kamenga naka nalimukiwa nene. ¹⁹ Unone ushiku lin'eloi lya Fumu alyopo liyanjulula mashelo oku kamenga no kuwapunisha, no ku amba ci, ²⁰ ''Muthze, mukemane mu tempele muka ambele anu maywi oahe ou moyo.'' ²¹ Ou ayuvile ei, awopo aingena mu tempele mashikushiku no kufundisha. Unone mupulisita shokulu po keya, nawa nakala nenji, ne awopo awaneka kuta pofoci, akulu o Isilaele wahe, no kutumena ku kamenga ci akashimbe apositola. ²² Unone mapokola awa athzileko kakawawanine mu kamenga, ne awopo ahuka no kukatongola, ²³ ''Tunakawana kamenga kana yanjeliwa shuwana-shuwana nakakunyunga kwanemana pa shelo, unone ou tunayanjulula, katuwanine munu mukaci.'' ²⁴ Honi kapitao o tempele no apulisita owakulu ou ayuvile aa maywi, kuma ayapile nene ko apositola ci shine sha kukwamahala apa pa iamba. ²⁵ Nehoni akopo kukeya munu kunawatongwela ci, ''Waya akwelume namupaka mu kamenga anemana mu tempele afundisha anu.'' ²⁶ Honi kapitao ayepo thza no mapokola, no kukawa husha mu kamenga, unone kanawakwama omango, mukonda kuma ayapile ci katele apovauliwe. ²⁷ Ou akawa kumishele, awopo akawapaka mu kuta. Mupulisita omukulu ayepo waipaula, ²⁸ ku amba ci, ''Kuma natumikanisha kufundisha omu mulithzina, ne kalo munayalisha Jelusalema ko ifundisha yenu kalo mwafota ci muleta manyinga oyu mukwelume pa petu.'' ²⁹ Unone Pitolosi na apositola awopo atawa ci, ''kunaloo ci tuyuvela Nyambi kupita kuyuvela anu. ³⁰ Nyambi owa tata wetu wapindulie Jesu, oyu mwapaile ko kumu ngongotela pa shitondo. ³¹ Nyambi ona mukulisha ku lyoko lyenji lyo shilyo ci apiluke mwana Fumu o mukwelume, no muyoyishi, no kupa kuhumba ku Isilaele, no kutetela ko ivi. ³² Twa mapaki mu enu ei, no mupepo oukenu nao paki, ou anapa Nyambi kwao amuyuva.'' ³³ Anu o mukuta ou ayuvile kengyo, kuma anjipile ne kuma afotile ci apae apositola. ³⁴ Unone mufalisi o lithzina lyo Gamaliele, mufundishi o mulao oyu nalemekiwa ko anu wahe, ayepo imana no kutuminina ci apositola atwaliwe pola mu shikati shoshoonye. ³⁵ Nehoni ayepo wa ambela ci, ''Akwelume o Isilaele, mu ayale shuwana kwei mufota kukwama kwawa anu. ³⁶ Mukonda kunyima, Teudasi kuma akeile kuliamba ci munu o mukulu, ne anu owangi okukuma pa makumi ane o ita, awopo amushupwela. Ayepo paiwa, ne wahe awa namuyuvela awopo alihanda wahe kupwa. ³⁷ Munyima thzoyu mukwelume, Judasi oku Galilea ayepo keya mu mayuwa o kutala anu ne ayepo nashimba anu wamweya kumushupwela. Naye po fa, ne awa namuyuvela awopo alihanda. ³⁸ Honi namiambla ci, mutunde kwawa akwelume kalo muwashiye wafoci, mukonda ngeci aa maano nei ekwama ya anu, kenge yakupwa. ³⁹ Unone ngeci po ya Nyambi kamwakutwesha kuimana; kenge muliwana ci mwalwisha Nyambi.'' Honi awopo ayuvishiysha. ⁴⁰ Nehoni awopo aisha apositola ci aingene ne awopo awa fula no kuwatuminina ci lelo afundisha mu lithzina lya Jesu, ne awopo awa shiya ci athze. ⁴¹ Awopo atunda mukuta kwana nyanyuka ci anawaniwa ci aloela kunyandishiwa mukonda o lithzina. ⁴² Munyima weyo liyuwa no liyuwa, kuma nathzanga mu tempela no muniyo nonjiyo kwa fundisha no kuamba evangeli ci Jesu yoliyo Kilesite.