¹ Hou Petrosi no Johani akalile no kuamba kuanu, maprisita no kapitao wo tempele no Masaduki akaile kuko. ² Hawa kuma linyengile nene mukonda Pitrosi no Johani kuma fundishile anu kalo no nokukuwelela kupinduka kwa Jesu kwa afu. ³ Awopo awapaka mooko no kulonga mutolongo kutwala mashikushiku ahatileko, mukonda kuma lia tokile. ⁴ Unone anu owangi awa ayuvile maywi alitawile; no nambela thza akwelume ikiti mutanu ⁵ Kwakalile liiwa limweya ci avuthsithsi, akulu, na n'oli ho aliwanine pofoci mu Jerusalema. ⁶ Ana mukulu wa maprisita kwa kalile, no Kayafe, no Johani, no Alexandere, kalo no wahe hawa akalile aka mukuta wa muprisita shokulu. ⁷ Ou awo apakile Pitrosi no Johani mukaci ko, awa ipulile, "Nomaci mwine, inga mulithzina nelyalye, muna kwamesha eyi?" ⁸ Ne Pitroisi, ho ayalile mupepo oshokenu, wambile kuko, "Amwe avuthsithsi o anu, kalo na akulu, ⁹ ngeci po atwe tulipe hembe lelo yo ikwamisha yoiwa ina kwamahala ku munu wo kukola, kalo muliano mwine oyu munu anapolishiwa, ¹⁰ Kulimukahale kukwenu mwahe kalo kuanu wahe o Isilaele ci oyu munu nemana pa lupala lwenu onapolo mulithzina lia Jesu kilesite womu Nathzaleta, hoyu mwa ngongotelile, unone oyu Nyambi apindukile kwa afu. ¹¹ Jesu kilesite po liwe eli amwe mwa kuumba mwa kanine unone linanakala liwe lio liunji. ¹² Kwithsa kuyoishiwa kumunu wawo, mukonda kwithsa lingana mushi thzo liwilu linapiwa kwanu eli nga liloela ci lituyoishe." ¹³ Nehoni awo amonine kukolopa kwa Pitrosi na Johani kalo no kunangula ci anu pohuma, akwelume okukana kulifundisha, awo akomokile, no kulimuka ci Pitrosi na Johani akalile na Jesu. ¹⁴ Mukonda awo amonine mukwelume oyu polishile ku nemana no, apwilile yo kuamba kulwisha ei. ¹⁵ Unone munyima awo thzo kutumina apositola ci atunde mukuta, awo kuma aliyongaulile mukaci ko. ¹⁶ Apo amba, "Shime mwine tutwama kwawa akwelum? Yashemwa ci shimonisha sho kumonisha shina kwamiwa kuko shina limukiwa kumunu yomuhe yoya mu Jelusalema; katutwesha kushiamula. ¹⁷ Unone mukuninga ci kaiyaukile nene kwaanu, tuwimangule ci aamba kalo kwa kumunu mulithzina eli." ¹⁸ Nehoni awo ashelile mukaci no kuambela ci aamba inga kufundisha kalo mulithzina lya Jesu. ¹⁹ Unone Pitrosi na Johani atawile kalo no kuamba kuko, "Ngecipo kunaloho mumeho a Nyambi kuyuva yamwe kushiya aye, muatule. ²⁰ Atwe liombo tutwesha kushiya kuamba ei inu tunamono no kuyuva." ²¹ Munyima thzo kunangula Pitrosi na Johani, awa ashindekile ci athze. kanawana liano lyo kuwa kunyeka, mukonda wahe anu athzinekile Nyambi mukonda wei ya kwamahalile. ²² Mukwelume oyu wa polishiwile wakalile no myaka thzo kupitelela makumi ane. ²³ Munyima thzo kuwayulula, Pitrosi na Johani akeile kuapo no kunatongola yoihe maprista oshokulu na akulu eyi ambile kuko. ²⁴ Apo awo aiyuvile, awo ayelulile maywi ho no mayalo ofoci kwa Nyambi no kuamba, "Fumu, wakwamine liwilu no kaye no liwate, kalo no yoihe ei ilimo. ²⁵ Wambile no mupepo mukan'wa kangambala woye, tata wetu Davida, shinu mwime amalicava mu matunga ana anjipa, kalo na anu aayala ngepi inu yokupila okwathsi?' ²⁶ Waambile, Mafumu opakaye analiwana pofoci, kalo na vuthsithsi na liwana pofoci Fumu, kalo no kulwisha kilesite wenji.' ²⁷ Yashemwa, wahe a Heroda na Ponse Pilato, pofoci no malicava kalo no anu o Isthsilaele, analiwanine pofoci omu mushikun'a kulwisha ngamba wohe sho kenu Jesu, hoyu ona waweshile. ²⁸ Awo kuma liwanine pofoci kukwama yoihe lioko lyohe no inekela yoe ya hangulile kupila no ku kwamahala. ²⁹ Nehoni, Fumu ngo kenge pa limukisha yo kalo ngo pe kwa ngamba oe kuamba liywi lyoe no ukolo wouhe. ³⁰ Ngo olole lyoko lyoe ci lipolishiwe no kupa imonisha ne pelemeka mulithzina lya ngamba woe sho kenu Jesu," ³¹ Munyima awo thzo kumana kulombela, pashivaka po awo aliwanine pofoci kwalingungile, kalo awoe wahe kuma yalile mupepo woukenu no kuambaula liywi lya Nyambi no kupila wowa. ³² Ungi wawa alitawile kuma kalile no mucima ofoci no moyo ofoci pohuma. kwithsa oyu waambile ci eshi amonine po ci shenji yofoci, unone akwamenine inu yoihe pofoci. ³³ No maci nene aapositola kuma akwelelile apaki wo kupinduka kwa Fumu Jesu, no shishemo sho shikulu kuma shakalile kuko wahe. ³⁴ Ka kwakalile munu mukaci ko wapilile shimweya, mukonda wahe akalile no mive ianga maio aaulishile no kuleta mali kutundela painu au lishile ³⁵ no kuapaka kumaulu a muapositola, kalo kumaeliwile kumunu no munu kuthza komu afotelile. ³⁶ Josefa, hoyu aishile aapositola ci Barnabasi (Eli litoloka mwana mukakutanalisha), mu levi, mwana womu Sipera, ³⁷ waulishile shitwa shenji no kuleta mali kalo waalangekile kumaulu amu apositola.