¹ Nehoni Agripa po amba kwa Paulusi, ''Oambe owe shinda.'' Ne Paulusi ayepo olola lyoko lyenji nokuliamwena. ² ''Ninanyanyuka , Fumu Agripa, kukwama ci lelo nikale posho thzoye muimba ei anani lundela Majuda, ³ shikulu mukonda yowe onalimukela ilika yo Majuda no ipula. Nehoni nakulomba ci oniyuve no mucima oshole. ⁴ Shoshemwa, wahe Majuda alimuka eli nayoyele muwanuke wange konili mulitunga lyange kalo no mu Jelusalema. ⁵ Anilimuka kutunda kumatatekelo ngeci anahimi kuikumisha, ci nakalile Mufalsi. Shipathsi shoshikalu nene sho kulitawa kwetu. ⁶ Nehoni naimana pano ci niatuliwe mukonda ko kukulupela kwange kuikulupelisha ei akwamine Nyambi kowa tata wetu. ⁷ Sholiyo shikulupelisha esho ikuta yetu likumi na ili akulupela kutambula kwali no kulombela Nyambi ushiku no mutanya, kalo kushkulupela pohuma eshi, Fumu, sholiyo Majuda anilundela. ⁸ Ngepi muna iayala amwe mwakakukana kulitawa ci Nyambi apindula awa anafu? ⁹ Nehoni ya shemwa, yame nofoci na ayalile ci naloela kukwama inu oshongi kulwisha lithzina lya Jesu oku Nathzareta. Nakwamine ei mu Jelusalema. Kuma naniyanjelelanga ¹⁰ mukamenga anu owangi okukena a Nyambi kulikwathsisha okolo natambulile kwa pulisita oshokulu; kalo ou awo apaiwile kuma naloelangile. ¹¹ Kuma nawaingenishangile lolungi muma Sinagoge kalo no kuwaotela kupopa Nyambi. Kuma naanjipile nene kukwo kalo nawa humbishile nene no mu matunga angana. ¹² Ou nakwamine ei, nathzile ku Damaseka no okolo no mulao kutundela kwa a pulisita oshokulu; ¹³ Kalo mulikun'wa konithza ko, mukaci ko mutanya, fumu,namonine mwethzi kutundelela kuwile ou waethsile nene kupandakana liyuwa kalo waethsile kupaka mukaci twahe ame na akwelume awa aendile nange. ¹⁴ Ou twahe twawile pashi, nayuvile liywi lya ambile kukwange eli lyambile mushihevelu, 'Saule, Saule, shinumwine oninyandishela? Kuli okalu kukwoye kulaha ku muondo.' ¹⁵ Nehoni amepo niamba, 'Yowe elye Fumu?' Fumu ayepo tawa, 'Yame Jesu oyu onyandisha. ¹⁶ Nehoni okatuke kalo owimane ko maulu oye; mukonda koli liano ouninalimonahalisha kukwoe, kukuneha ci opwe ngamba kalo nokula paki muinu ei olimuka yange no inu ei nakukumonisha nawa; ¹⁷ kalo henge nikuamwena kwaa anu noku kwa anu angana nikutuma, ¹⁸ kuthsikula meho no kuatundisha mumilema kuleta ku mwethzi no kutundisha ku ukolo wa Satani kuleta kwa Nyambi, ci atweshe kutambula kwa Nyambi kutetela ko ivi kalo no ushwana nipa kukwo awa anakenishiwa ko kulitawa kukwange.' ¹⁹ Nehoni, Fumu Agripa, kana leile mulao oshimona sho kuiwilu; ²⁰ unone, kwao ali mu Damaseka tango, kalone nawa ali mu Jelusalema, kalo nowahe omulitunga lya Judea, kalo noku anu angana, nawapile liywi ci awo ahumbe kalo nokuhuka kwa Nyambi, kukwama ekwama ei iendelela no kuhumba. ²¹ Sholiyo shaletile Majuda kunianga mutempele kalo aelekile ci anipae. ²² Nehoni ninatambula okwathsi kutunda kwa Nyambi kuleta lelo lino, kalo naimana kupa upaki kwa anu wahe nawa owakulu kokupila shimweya shokupandakana ei apolofita na Mushe ambile ci henge mbela yakukwamahala- ²³ eci Kelesite aloela kunyanda, kalo pakuninga ci yomutangi okupinduka kwa afu henge mbela akukuwelela mwethzi kwa anu etu noku anu angana.'' ²⁴ Ou Paulusi atunulile kuliamwena Fesitasi wambile no liywi lyoshokulu, ''Paulusi wathzaluka owe; kulifundisha koe nene kwakuthzalukisha owe.'' ²⁵ Unone Paulusi wambile, ''Kanithzalukile ame, Fesitasi okulemekiwa, unone nakuwelela maywi oshemwa no katulo thziyuvahala. ²⁶ Mukonda Fumu alimuka ei inu ei; kalone naamba nokolo kukwenji, mukonda ninalakwishiwa ci kuyatukele eshi shinaholama kukwenji; mukonda eshi kashakwamiwile kunthzimba. ²⁷ Watawa kwa apolofita, Fumu Agripa? Nalimuka ci awatawa.'' ²⁸ Agripa wambile kwa Paulusi, ''Mushikatiana pohuma watwesha kunilakwisha kalo nokunikwama mu Kelesite?'' ²⁹ Paulusi ayepo amba, ''Nalombela kwa Nyambi, ci kwithsa nji mushikatiana shanga mushikati shoshile, kali yowe pohuma kalo unone wahe awa aniyuva lelo, henge akala eci yame, unone kokupila tungongolo to mukamenga.'' ³⁰ Nehoni Fumu wakatukile, kalo no muendishi no Benisi naye, nawa akalileno; ³¹ owa ashile njiyo, alitongawelile kalo noku amba, oyu mukwelume kwithsa eshi anakwama eshi shiloela lifu shanga kuangiwa.'' ³² Agripa wambile kwa Fesitasi, ''Oyu mukwelume nga onangululiwa nga aye kalombile kwa Sesare.''