¹ Apa kwpitile mayuwa mutanu, Ananiasi mupulisita shokulu, akulu wamweya, no muimaneni o lithzina lyo Tetulusi athzile ko. Awa akwelume awopo aleta milandu thza Paulusi kwa muvusisi. ² Paulusi ou aimanine pa posho thza muvusisi, Tetulusi ayepo tateka kumushangethza eamba no kuambela muvusisi ci, ''Mukonda owe poli tunaliyala no kuikalako koe kunaleta kuendisha nawa litunga lyetu; ³ honi mukukandelela kwetu twatambula enu yoihe ei okwama, Felikisi okulemekiwa nene. ⁴ Eci katele nikukalishe shikati shoshile nene, nakulomba ko kuhima koe kuniteelela kamanana. ⁵ Mukonda tunawana oyu mukwelume ci yoliyo shingungu naningisha ci Majuda mukaye kokahe ci apiluke. Yoliyo mukulu wa aka nathzareni. ⁶ Mane kuma anaeleka kuipisha tempele, atwepo tumukwata. Tufoto kumuatula kuthza ko mulao wetu. ⁷ Unone Lisiyasi muendishi, wananamushimbi mumoko etu ko okolo. ⁸ Ayepo ambela awa namuanga iamba ci akeye kukoe. Ou oipula Paulusi ei eamba, henge olifundisha enu yoihe ei tuwathzekishela.'' ⁹ Majuda nawo po aingena kukumushangethza, no kukolopisha ci yashemwa. ¹⁰ Unone muvuthsisi ayepo nyungela Paulusi mutwi ci ambe, Paulusi ayepo tawa, ''Nayuvishisha ci myaka thzingi ethzo onaatula lino litunga honi ninanyanyuka kukutongwela yange. ¹¹ Onalimuka ci kakupile myaka thzo kupitelela likumi na thzili kutunda apa nanithzela ku Jelusalema kukalombela. ¹² Ou akniwanine mutempele kanakananine no munu, kalo kananilete muyoyo mu mbunga shinga musinagoge nji mu mbongi. ¹³ Katwesha kukuleta upaki pei aniotela. ¹⁴ Unone nakutongola kukoe, ci kokuthza komu aiambela, mulikun'wa lyofoci, nakwamena Nyambe owa tata wetu. Nalitawa ku enu yoihe ili mumu lao nei anan'olo apolofita. ¹⁵ Nili no shikulupelo shofoci kwa Nyambi eci awa anu, ci henge kwakukala kupinduka kwa afu kwa anun okuluka nawa owamango. ¹⁶ Poliyo apa ninalitanalisha shikati yoshihe ci nikale no shihemo eshi shikana kunyathzahala kwa Nyambi noku kwa anuu. ¹⁷ Honi kokunapiti myaka thzothzingi napile okwathsi ku litunga lyange nokuleta shitabelo sho mali. ¹⁸ Ou nakwamine ei, Majuda wamweya awa atundile ku Asia aniwanine mumukiti okulikenisha mutempele, kanakalile no mbunga nji kukwama muyoyo. ¹⁹ Awa anu aloela kunakala pa posho thzoe ci naambe ei nayuvu kukwange, ngeci koili ei nayuvu. ²⁰ nji, awa anu ambe omango naniwana nao ou nakaimanine mukuta thza Majuda, ²¹ ngeci shime kali okukuwa nakuwile koninemana mukaci ko, 'kuamba yokupinduka kwa afu ei anithzekishele kukoe lelo.''' ²² Nehoni Felikisi oyu walimukile nawa yo likun'wa, ayepo paka liyuwa lyalyo lyo kutaneka eyo iamba. Ayepo amba, ''Lisiyasi mukulu o mashwalale ou akeya kutunda ku Jelusalema, henge nakutaneka iamba yenu.'' ²³ Nehoni ayepo tuminina mukakuendisha mashwalale ci Paulusi apakiwe mukamenga, unone akale no kuliyala ci ambushenji akanishiwa kumuletela ei afota. ²⁴ Apa kwapitile mayuwa, Felikisi wahukile na munu wenji Durusila, mbuyama o mujuda, ayepo isha Paulusi oku anayuvile yo kulitawa kwa Jesu. ²⁵ Unone Paulusi ou aambaulile nenji yo kukena, kulikwata micima, no katulo ethzi thzikeya, Felikisi wayapile ayepo ambela Paulusi ci, ''Othze honi. Unone ounikala no shikati nawa, henge nikuisha.'' ²⁶ Mushikati esho shime aanekelile ci Paulusi kenge amupa mali, ngapa amuishangile kuna ambaula nenji. ²⁷ Unone apa kwapile myaka thzili, Posiasi Fesitasi ayepo pakiwa muendishi kutundisha Felikisi, unone Felikisi wafotile ci Majuda amuheme, honi ayepo shiya Paulusi ci akale mukamenga.