Lihando 22

1 ''Apange na tata wange, mutelele ku upaki wange ou nimitongwela.'' 2 Mbunga owayuvile Paulusi kuamba kukwo mu shihevelu, kuma atutwalile. Ayepo amba, 3 ''No mu Juda anielekela ku Tarese mu Silia, unone nalifundishelile mu mbongi thzino ku maulu a Gamaliele. Kuma anitongwelile manene makunwa o mulao wa tata wetu.Natwala maano ange kwa Nyambi, weci eli muninga amwe mwaheno lelo. 4 Kuma nani nyandisha kengeya no kupaa, no kutwala mu kamenga akwelume na ambuyama wahe, 5 weci a pulisita oakulu na akulu atwesha kupaka. Natambulile manolo kutunda kukwo kuthza kwakakulitawa oku Damaseka, kuma nathzileko ci nikawashimbe kwanangiwa kuwatwala ku Jelusalema ci akapiwe mulandu. 6 Kuma yakwamahalile okunihenyena kumbali a Damaseka, neli mutanya wanguwangu mwethzi oshokulu kutunda kuwilu awopo unimunyeka. 7 Amepo niwela pashi nepo niyuva liywi lya ambile kukwange, 'Saule, Saule, waninyandishela ine?' 8 Amepo nitawa, 'Yowe elye, fumu?' Ayepo nitawa, 'Yame Jesu wa Nathzareta oyu onyandisha.' 9 Wahe awa akalile nange kuma amonine mwethzi, unone kayuvishishile liywi lyoyu wambile nange. 10 Amepo niamba, 'Nikwame ngepi , Fumu?' Fumu kuma ambile kukwange, 'Oimane othze ku Damaseka. Oko koliyo okatongweliwa yoihe eyo onaloela kukwama.' 11 Kanatweshile kumona mukonda wo shiteiwa, hime owa nikwatelelile ku moko awo akalile nange, amepo nikengena mu Damaseka. 12 Oko kuma nakawanineko mukwelume olithzina lyo Ananiasi, mukwelume oyu nakolopa muikwama ya Fumu kuthza ko mulao kalo kuma nalimukiwa manene ku Juda nawa atungu oko. 13 Ayepo keya kukwangwe, nepo naimana, ayepo amba, 'Minange Sule, omone.' omo muhola ethzo mwene amepo nimumona. 14 Apo honi ayepo amba ci 'Nyambi wa tata wetu onakuhangula ci olimuke ei ahima, kumona oyu naluku kuyuva liywi litunda mukanwa kenji. 15 Mukonda henge opiluka paki wenji kwa anu wahe ei onamono nei onayuvu. 16 Honine yine onatatelela? Oimane, okolovethziwe no kuhupiwa shivi shoye, kuisha lithzina lyenji.' 17 Ou nahukile ku Jelusalema, oku nilombela mu tempele, nopo nipiwa shimonisha. 18 Kuma namumonine kuniambela, 'Oyokolole otunde mu Jelusalema wanguwangu, mukonda kakatambula maywi oe ou owatongwela yange.' 19 Amepo niamba, 'Fumu, kuma nanipakanga mukamenga no kufula wahe awo nalitawa mu lithzina lyoe muma sinagoge oahe. 20 Unyinga wa Setefani paki oye apa wamwaalile, konakalile kalo hime natawile ci kukwamahale hengeyo kalo yame namamelile ito yawa amupaile. 21 Unone ayepo niambela, 'Othze, mukonda henge nikutuma kokule kwa anu angana.''' 22 Kuma ateelelile kukwenji hime apa akamaneni kuamba aa maywi. Ne awopo akuwa no kuamba, ''Munu okengeya omutundishe pano pa kaye, mukonda kaku loile ci ayoye.'' 23 Awopo akuwa kuhulula ikoveyo yo no kuikuhela muwilu kwamusukululela likungu, 24 mukulu mukakuendisha maswalale ayepo tuminina ci Paulusi atwaliwe munjiyo. Ayepo waambela ci amuipule no kumufula, ci aye shinda alimuke ci shine shinaletisha ci amukuwelele kengeyo. 25 Apa amunungelelile muwilu no miya, Paulusi ayepo ambela mukakuendisha maswalale oyu waimanine kumbali thzenji, ''Eine kunaloo ci mufule munu o Muroma kushime kuatuliwa?'' 26 Oyo mukakuendisha owa yuvile hengeyo, ayepo thza ko mukulu nokukamuambela, ci, ''Ine mufota kukwama? mukonda oyu munu Muroma.'' 27 Mukulu mukakuendisha owakeile no kunamuambela ci, ''Oniambele, o Muroma?'' Paulusi po amba, ''Ee.'' 28 Mukulu mukakuendisha ayepo tawa, ''Kuma nakulile mali oangi ci nikale muno mulitunga.'' Unone Paulusi ayepo amba ci, ''Kuma anielekelelile muno mu Roma.'' 29 Co honi akwelume awa afotile kumuipaula popo mwene owopo amushiya. Omukulu mukakuendisha naye neli aypa, owa limukile ci Paulusi neli Muroma, mukonda kuma amunungile. 30 Lyuwa lya hatileko, mukulu mukakuendisha kuma afotile kulimuka eyo Majuda neli a thzekishela Paulusi. Ayepo munungulula nepo ambela mapulisita oakulu nakakuendisha kuta wahe ci aliwane. Ayepo leta Paulusi no kunamuimanisha mukaci ko.