¹ Liyuwa lyo Pentekota apa lyakumine, kuma aliwanine pofoci mushivaka shofici. ² Popo mwene kwayuvahalile livuma lyatundile kuwilu lyokuninga weci mupepo, lya nayalile munjiyo omuakalile. ³ opo kumonahala kukwo weci milengi thzo mulilo ethzi thzanatulile pa munu no munu. ⁴ Ayalile no mupepo oukenu awopo atateka kuamba mumalimi okushiyana-shiyana. mukonda mupepo oukenu wawatweshishile. ⁵ Honi kwakalile Majuda awa nakalanga Mujelusalema anu a Nyambi kutunda mumatunga oahe pano pa kaye. ⁶ Livuma apa lyayuvahalile, anu oangi akeila pofoci no kukomoka, mukonda munu yomuhe kuma nawayuvu kwa amba mumushovo wenji. ⁷ Wahe akomokile nokuyahama; awopo aamba, ''Shemwa, awa anu aamba mishobo thzokushuta-shuta kali wahe aka Galileya awa? ⁸ Ngepi tuwayuva, munu no munu mumushovo wenji anaelekeliwa? ⁹ Mapatiani no Mamede no Maelemite, nawa anakalanga mu Mesopotamia, nomu Judea nomu Kapasia, nomu Pontasi nomu Asia, ¹⁰ ku Firigia no Pafilia, nomu Engepita no ivaka imweya, yo Libya kutamba ku Sireni, no enda kutunda ku Roma, ¹¹ Majuda noma Proselite, ma Kereta noma Arabe, twawayuva kwamba mumishobo thzetu kwa aamba yokulu wo ekwama ya Nyambi.'' ¹² Akomokile wahe noku anekela; awopo aamba mukaci ko, ''Eine yatongola ine?'' ¹³ Unone wamweya awa kumaelile nokuamba, ''Apende waine omupe.'' ¹⁴ Unone Pitolosi wakatukile nawa olikumi noyofoci, ayepo kuwa noliywi lyoshokulu, nokuwaambela ci, ''Akwelume oku Judea namwe mwaheno munakalanga mu Jelusalema, mulimuke ci; kalo muniteelele shuwana. ¹⁵ Awa anu mwaanekela ci anapende, mukonda shishili shikati sho 9 mashikushiku. ¹⁶ Unone ei yoliyo yambiwile kutunda kwa mupolofita Joele: ¹⁷ Mumayuwa okuhula; Nyambi amba ci, 'henge nimwaela mupepo wange kwa anu wahe. Anenu owa kwelume nawa owa mbuyama henge apolofita. Mishumba thzenu henge amona emona, na akulu henge akulota elota. ¹⁸ Yoshemwa kwa a ngamba ange owa kwelume nawa owambuyama mumaiwa ao henge niwamwaela mupepo wange, kalo henge akupolofita. ¹⁹ Henge nimimonisha yo kukomokisha muwilu no imonisha pano pa kaye ko pashi, manyinga, mulilo no liundu. ²⁰ Liyuwa henge lyakupiluka milema kalo ngonda henge thza kupiluka manyinga liyuwa lya Fumu lyoshokulu ko lishime kwiya. ²¹ Henge kwakukala ci yomuhe isha pa lithzina lya Fumu henge akuyoishiwa.' ²² Amwe aka Isilaele, muyuve a maywi: Jesu oku Nahtzareta wakalile mukwelume oyu amipile Nyambi no ekwama yoshokulu no emonisha eyo Nyambi akwamine kukwenji mukaci kenu, weci eli mulimuka amwe mwashinda. ²³ Oyu mukwelume Nyambi kuma amupile kukwenu mulyano no kulimuka ei yakukwamahala kuposho; honi amwe, mukulikwathsisha lyoko lya anu owamango, mwamupaile ko kumungongotela pa mbinda. ²⁴ Unone Nyambi wamupindulile, kumuayulula ku uhungu wo lifu, mukonda kakwatweshahalile ci lifu limutuleke. ²⁵ Ne Davida aamba yenji ci, 'Namumonine Fumu lolungi pa meho ange, mukonda oli kulyoko lyange lyo shilyo ci lelo nahenyishiwa. ²⁶ Nehoni mucima wange kuma waloelilekalo lulimi lwange lwanyanyukile. Kalo, nyama thzange henge thzakuyoya mukukulupela. ²⁷ Mukonda kowa kushiyelela moyo wange mushivaka sha afu, hianga kutawethza omukenu woye kumona kuola. ²⁸ Onanilimukisha makun'wa o moyo; henge onikwama okuyala shihuno kushihanga shoye ²⁹ Apange kulishuwana ame kuamba kukwenu shuwana-wana ya mupatriareka Davida, ci naye wafile kalo amuvumbekile, kalo mbumbo thzenji thzishili netu kuleta lelo. ³⁰ Nehoni wapwile mupolofita kalo walimukile ci Nyambi kuma aliethzile kukwenji ci henge akupaka yumweya mukashikuta shenji pa ufumu. ³¹ Wamonine ei yakukwamahala kuposho nepo amba yokupinduka kwa Kelesite, ci kakashiyeleliwa mushivaka sha afu no elama yenji kaya kumona kuola. ³² Oyu Jesu-Nyambi onamupindula, uno twa mapaki twahe. ³³ Honi, apa namukandukishela kulyoko lyo shilyo lya Nyambi no kutambula mupepo oukenu ou akumbwethzile kutunda kwa tata wenji, ona umwaela pano yoliyo ei mumona no kuyuva. ³⁴ Mukonda Davida kakandukile ku wilu, unone aamba ci, 'Fumu waambile kwa Fumu wange, ''Okongomane ku lyoko lyange lyo shilyo ³⁵ kukakuma apa nakukwama akwe thzimbo yoye shilyatelo sho maulu oye.''' ³⁶ Honine, wahe aka njiyo thza Isilaele alimuke ci Nyambi onamukwama Fumu no Kelesite oyu Jesu namungongotela.'' ³⁷ Honi ou ayuvile ei, yawakin'ile ku micima, ne awopo aamba kwa Pitolosi nokwa apositola wahe, ''Apetu, tukwame ngepi?'' ³⁸ Pitolsi po waambela, ''Muhumbe kalo mukolovethziwe, munu no munu mulithzina lya Jesu Kelesite ivi yenu ikwateliwe, henge mutambula mbuyo thzo mupepo oukenu. ³⁹ Mukonda kunakulupelishiwa yamwe na anenu nakamatunga okule wahe, ungi wa anu awa akuisha Fumu Nyambi wetu.'' ⁴⁰ Ko maywi amweya oangi wawatongwelile no kuwafundisha, kuamba ci, ''Muliamwene ku shikuta shoshimango.'' ⁴¹ Atambulile liywi lyenji nepo akolovethziwa, elyo liyuwa kwaekethzehile mioyo thzikuma pa makumi ahatu oita(3,000). ⁴² Alipakile kuifundishi ya apositola mukuliwana, no mukulya ishima no mumalombelo. ⁴³ Wowa wakeyile mumioyo thzothzihe, ikomokisha no imonisha yoyingikuma yakwamahalile kwa apositola. ⁴⁴ Wahe awa alitawile akalile pofoci nokutambula inu yokulipitula, ⁴⁵ awopo aulisha inu yo yoihe nokuaela wahe kuthza ko ei afota munu no munu. ⁴⁶ Liyuwa no liyuwa atanalishile no maayalo ofoci mutempele kalo akuyaulile ishima muma njiyo, nokuliela pofoci kwana loela mumicima thzo, ⁴⁷ kwa shangala Nyambi kalo nahemiwa ku munu yomuhe, kalo liyuwa no liyuwa Nyambi wavungishangile kwawa nayoishiwanga