¹ Buka ethzi nanitanga kun'ola, Teofile, nathziamba yoihe ei atatekile Jesu kukwama no kufundisha, ² kukumena lyuwa eli athzile kuwilu, kunamana kutuminina apositola awa ahangulile ko mupepo oukenu. ³ Munyima thzo likando lyenji, walimonahalishile kukwo ci ayoya no imonisho yo kmonahala. Mumaiwa omakumi ane walimonahalishile kukwo, nokuamba yo ofumu wa Nyambi. ⁴ Apa aliwanine pofoci noo, wawa tuminine ci atunda mu Jelusalema, unone atatelele shikulupelisha sha tata eshi ambile, ''Namuyuvu kukwange ⁵ ci Joani hime akolovlithze ko meyu, unone amwe henge mwakukolovethziwa ko mupepo oukenu mumayuwa oshoonye.'' ⁶ Apo aliwanine pofoci amuipulile, ''Fumu, eshi sholiyo shikati wakuhushela ofumu kwa Isilaele?'' ⁷ Wambile kukwo, ''Kali yamwe munaloela kulimuka shikati nji myaka ethzi anapa tata ko okolo wenji. ⁸ Unone henge mwakutambula okolo mupepo oukenu apa wakukeya kukwenu, kalo henge mwakupwa mapaki mu Jelusalema nomu Judea momuhe nomu Samaria, noku hula okaye.'' ⁹ Apo Fumu Jesu ambile ei inu eyo, kwanatanekela muwilu, wayelukile kuthza muwilu, ne livui alyopo limuholeka. ¹⁰ Kwanatanekela hengeyo muwilu apa akakukile, popo mwene, akwelume eli awopo nemana kunyonga noo awa avatile ito yoikenu. ¹¹ Awopo aamba, ''Amwe akwelume oku Galilea, ine munemanena apa ko munatanekela muwilu? Oyu Jesu natwalilwa muwilu mukaci kenu henge akuhuka mushifwa shofoci omu munamumonena kothza muwilu.'' ¹² Nehoni apa ahukile ku Jelusalema kutundelela ku mukinya uishiwa olive, ou uli popepi no Jelusalema, muendo o lyuwa lyo Savata. ¹³ Ou akakumine, akathzile ku njiyo thzo kuwilu, okuakalangile. Neli Pitolosi, Joani, Jakobo, Andresi, Filipi, Tomasi Batolome, Mateu, Jakobo mwana Alufea, Simoni Zeloti, na Juda mwana Jakobo. ¹⁴ Hime aliyuvile wahe mukulombela, pofoci na ambuyama, na Maria mama wa Jesu, na aminenji. ¹⁵ Mu mayuwa ao Pilosi waimanine mukaci ka apenji, anu okukuma pa 120, nokuamba, ¹⁶ ''Apange, neli kwalolela ci lin'olo likwamahale , elyo wambile mupepo oukenu kunyima ko kanwa ka Davida kuamba ya Judasi, oyu waendishile awa ana angile Jesu. ¹⁷ Mukonda naye neli yumweya mukaci ketu ne naye watambulile shipathsi kwei ekwama.'' ¹⁸ (Honi oyu munu waulile shilwa kweyo awanine mu omango wenji, ayepo tangethza kuwisha mutwi, no ilama yenji ayopo iyatuka, kalo no ihoye yenji ayopo ipuna. ¹⁹ Wahe awa anakalanga mu Jelusalema hime aiyuvile ei, nga apa atile esho shilwa mumushovo wo ci ''Akeldama'' kokuamba ci, ''Shilwa sho unyinga.'') ²⁰ Mukonda kuna n'oliwa mu Buka thza Lisamu, 'Shilwa shenji shipiluke mu ngundu, kalo mbela kwakala munu hianga yofoci'; 'Ne munu wao ashimbe ekwama yenji yo kuendisha.' ²¹ Kunaloo, nehoni, ci kwa akwelume awa akalile netu mushikati Jesu apa aendile netu, ²² kutatekela ku kolovethzo thza Joani kunakuma pa liyuwa elyo atundishiwile mukaci ketu kuthza kuwilu, onapiluka paki pofoci natwe yo kupinduka kwenji. ²³ Awopo aleta akwelume eli, Josefa oyu ishiwa ci Barsabasi, oyu kalo atile ci Jusitiasi, no Mathiasi. ²⁴ Awopo alombela nokuamba ci, ''Owe, Fumu, walimka micima thza anu wahe, ne omonishe ci yupi ona hangula kwawa eli ci ²⁵ ashimbe ekwama no uapositola ei ashiile Judasi no kulithzela kwenji.'' ²⁶ awopo ahangula, ne wowangi ahangulile Mathiasi, ne ayepo taleliwa kwa apositola o likumi na yofoci.