¹ Yesu wakobelele mubwato, wajabukilile muthambwa, cho wethzile mu nganda yendi. ² Talani, bamunenele munalume umo muka kalepa walalele ha linala. Kumona kukullahela chabo, Yesu wendekele kuli uje munalume muka-kalepa ngwendi, "Mwana wa munalume, thimpa. Bibi byobe banakikonekela." ³ Talani, bamo bakathonekamajwi amashikobendekele hakati kabo ngwabo, "Ou munalume ali na kushaula." ⁴ Yesu wathzibukile bithinganyeka byabo cho wendekele kuli bakebo ngwendi, "Bikajo muli nakuthinganyekela bubi mu bimbunge byeni?" ⁵ Chachathi chili, kwendeka ngwange, 'Bibi byobe bana bithambetha,' nambe kwendeka ngwange, 'Katuka linga wende'? ⁶ Oloni linga muka thibuke ngweni Muna Munu ali na nthzili ha kaye ya kuthambetha bibi,..." Cho wewndekele kuli uje munalume wa kalepa ngwendi, "Katuka, ambata nala yobe, cho ya kunjubo yobe." ⁷ Cho uje munalume wakatukile nakuya ku njubo yendi. ⁸ Omwo mbunga yakama yamwene echi, bathzibile lyoba cho balemethele Njambi, uje wanene binthzili bya chifwa echi kubanu. ⁹ Omwo Yesu wakele nakwita kufuma muje, wamwene munalume wa lithzina lya Mateo natumama mu njubo ya muka kutambula lithimu. Wendekele kuli ikeye ngwendi, "Njikabe." Wakatukile cho wamukabele. ¹⁰ Omwo Yesu watumamene na kulya muje munjubo, talani, babengi baka skutambula Lithimu nabaka bubi bethzile na kulya na Yesu na bandongethi bendi. ¹¹ Omwo ba Faliseo bamwene echi, bindekele kuli bandokethi bendi ngwabo, "Omwo bikajo mulongethi weni ali nakuya na baka kutambula Lithimu na baka bubi?" ¹² Oloni omwo Yesu wathzibukile ebi, wendekele ngwendi, "Banu baje bana likangula mumubila kubethi kutonda chimbanda, kubanga baje baka kubinja. ¹³ Mwatela kuya na kulilongetha bika chilumbununa echi: 'Yange njishaka kutetela kethi nkombelo.' Mwafwa kunjethzilile baka buthunga linga batenguluke, oloni baka bubi." ¹⁴ Cho bandongethi ba Yowano bethzile kuli ikeye nakwendeka ngwabo, "Oloni bikajo yetu na ba Faliseo tuka thzili kulya, oloni bandongethi bobe kubethi kuthzila?" ¹⁵ Yesu wendekele kuli bakebo ngwendi, "Kuma babuthamba bamu chiwano cha bulo batha kulila omwo chambato achili nabo? Oloni matangwa aija omwo chambato bakamufumitha ha katati kabo, hakeho bakathzila kulya. ¹⁶ Naumo wahi atongela chitopeko cha nanga yayiha ha chithzalo cha laja, mwafwa chitopeko chikalabuka ha buthzalo, chika thethza mbengwa yakama. ¹⁷ Nameme ngocho banu kubeku longela binyu yaiha mu binjeke bya bilambu bya laja. Ngwe balingamo, bije bilambu cho bitubika, ije binyu cho itika, na binjeke bya bilambu ba kabitabula. Olojo, baka binyu yaiha baka ilongela munjeke ya bilambu bya biha, cho byoshe baka binyunga mwa mubwa." ¹⁸ Omwo Yesu achili nakwendeka nabo ebi byuma, Talani, mukulunu umo wethzile kuli ikeye cho wathsikamene. Nakwendeka ngwendi, "Munange wa munakathzi thimbu ino bene nathsi oloni ija ukambeke maboko obe hali ikeye, cho akayoya." ¹⁹ Cho Yesu wakatukile nakumukaba, na bandongethi bendi baile nendi. ²⁰ Talani, munakathzi wakele na mushongo wakwita maninga ha myaka likumi na abali wethzile munima ya Yesu wamukwatele ku shongo ya buthzalo bwendi. ²¹ Mwafwa wendekele babenya ngwendi, "Ngwe njikakwata lika ku buthzalo bwendi, Yange njikanguka." ²² Oloni Yesu watengulukile cho wamumwene, cho wendekele kuli ngwendi, "Munange wa munakathzi, thimpa; lukulahelo lyobe luna ku kangwitha." Cho uje munakathzi wakangukile kutunda hathimbu ije. ²³ Cho omwo Yesu wethzile munjubo ya uje mukulunu, cho wamwene baka kuthzika tulyalya na mbunga yakama yakele nake nena miyoyo manene. ²⁴ Wendekele kuli bakebo ngwendi, "Tuhukeni, mwafwa ou mwanike wa munakathzi kathzile, oloni na lala mu tulo." Cho bamu jolele na kumushendula. ²⁵ Omwo mbunga ba ituhwile hanja, wakobelele mu bulili cho wamukwatele kuli boko, uje mwanike wa munakathzi wendukile. ²⁶ Ou muthzimbu wa chifwa wa thsimanene mu mutambela woshe. ²⁷ Omwo Yesu watundile kuje, banalume babali batupuputwa bamukabele. Batwelele nakutambeka na kwendeka ngwabo, "Tuthzibileko ngothzi, Muna Ndabiti!" ²⁸ Omwo Yesu wakobelele muje munjibo, baje tupuputwa bethzile kuli ikeye. Yesu wendekele kuli bakebo ngwendi, "Mwakulahela ngweni njinatha kulinga echi?" ba kumbulula ngwabo, "Eyo, Shukulu." ²⁹ Cho Yesu wabakwatele ha mesho abo na kwendeka ngwendi, "Chilingiwe kuli yeni mu kwitila muku kulahela cheni," ³⁰ cho mesho abo atonene. Cho Yesu wabakambeyeye mwakama nakwendeka ngwendi, "Mumone ngweni kukwethi umo akathzibuka echi." ³¹ Oloni baje banalume babali baile na kutwala lutwe kwambulula muthzimbu ou kumutambela woshe uje. ³² Omwo baje banalume bakele na kuya, talani, cho Yesu bamunenelele munalume uje wakabebebe wakele na lyamba. ³³ Omwo mundzindzime wa kujwala bautundithile, uje munalume wendekela. Ije mbunga ya likomokelele na kwendeka ngwabo, "Echi kanda tuchimoneho muno mu Isalela!" ³⁴ Oloni ba Faliseo bakele na kwendeka ngwabo, "Mu kwitila muli mwene ya mindzindzime ya kujwala, alina na kutunditha mindzindzime ya kujwala." ³⁵ Yesu waitanganenenemo mu binganda na mu membo oshe. Watwaleleleho ku longetha mu ma Sinangonge, kwambulula biñanda bya bu mwene na kukongwitha mishongo yoshe na kubinjo kwa kulithethza thethza. ³⁶ Omwo wamwene mbunga, wabathzibilile ngothzi, mwafwa bayandele na kutheya. Bakele ngwe bimanga baje kubethi na kanyungi. ³⁷ Cho wendekele kuli bandongethi bendi ngwendi, "Kuteja kunatumu, oloni baka kupanga banapu babandondo. ³⁸ Ngechibene mubwathi lombeni kuli Shukulu muka bimbuto, linga atume baka kuteja mu bimbuto byendi."