¹ "Nyanyameni kutewa mulinga bilinga byeni byabushunga kumesho abanu bamimone, nge embwe kumukatambula bwana kutunda kuli Isheni ali mwilu. ² Cho omu mwana bwana, kethi mwimbe tolombita yeni babenya ngwe mukalingi baka chibembulu musinangonge na mubingila, mangana babashangale kubanu. Busunga njendeka kuli yeni, bana tambula bwana bwabo muku shula. ³ Oloni omo wana bwana, kethi weche liboko lya chimwoshwe lithzibuke obyo liboko lya chilyo lilinakulinga ⁴ mangana bwana bwobe bwanewe mukushweka. Cho Isheni ou akamono mukushweka aka milambula. ⁵ "Cho omu mulombela, kethi mupwe ngwe ba chibembulu, mwafwa bathzema kwimana na kulomba muma Sinangonge na hamathambwa ngila mangana banu babamone. Buthunga njendeka kuli yeni, bana tambula bwana bwabo. ⁶ Oloni yeni, omo mulombela, kobeleni mu chibatulo cha njubo yeni. Shokeni kuchikolo cho lombeleni kuli Isheni, uje wakala mubu shweke. Cho Isho mukakumona mwakushweka akamilambula. ⁷ Omu mulomba, kethi mwilwithile ilwithile majwi angocho ngwe muje baka Jentele bakalingi, mwafwa bakathinganyeka ngwabo baba thzibe mwafwa amaju amengi. ⁸ Cho, kethi mupwe ngwe bakebo, mwafwa Isheni natanekeya byuma muka mwajeneka thimbu kanda mulombe. ⁹ Cho munapande kulomba ngachije: 'Tatetu uli mwilu, balemethe lithina lyobe. ¹⁰ Bumwene bwenu bwije. Chithango cheni chilingiwe hano hathi ngwe mwilu. ¹¹ Twaneni lelo kulya kwetu kwalitangwa na litangwa. ¹² Tuthambetheni kumilonga yetu, ngwe muje tukathambetha bakatubulumuna. ¹³ Kethi ututwamenene ku byeseko, oloni twobole kububi.' Mabulu amabwa akuthangulu kuwethi na "Mwafwa bumwene bweni nanthili na bumpau myaka na myaka. Ameni". ¹⁴ Mwafwa nge muthambetha banu milonga yabo, Isheni wa mwilu akamisambetha neni. ¹⁵ Oloni nge ku muthambetha banu kumilonga yabo, cho na Isheni wa mwilu kakamithambetha. ¹⁶ "Omo ulikela kulya, kethi ukale nachihanga cha bulilithi ngwe ba chibembulu bakalingi, bakebo bakabihitha bihanga byabo mangana banu babamone ngwabo banalikele kulya. Busunga njendeka kuli yeni, banatambula bwana bwabo mukushula. ¹⁷ Oloni yeni, mu mulikela lulya, kwita mathi kumutwe wobe na kujwela kumesho obe. ¹⁸ Chihonowe kusholoka kuba kweni ngwabo unalikele kulya, oloni kuli lika Isho ou ali mukushweka; cho Ishweni ou akamono mukushweka akakulambula yobe. ¹⁹ "Kethi muli tulikile bufuko bweni babenya hano hathi, aje tunembulu na ng'alawe baka bibiyitha, cho kuli bethzi bakatubu nakwiba. ²⁰ Nambe ngocho, tulikileni bufuko bweni mwilu, muje tunembulu nambe ng'alawe kuyethi kubiyitha, kuje bethzi kube kutuba na kwiba. ²¹ Okwo kuwatulikila bufuko bwobe, kukeko mbunge yobe ikala lalo. ²² Lisho likelyo linapu bdeya ya mubila. Cho, nge lisho lyobe lilibwino, mubila woshe ushula na cheke. ²³ Oloni nge lisho lyobe lyalibi, mubila woshe ushula nalithuthulungu. Cho, nge cheke chili muli yobe chinapu cha lithuthulungu, cho lithuthulungu lipwa lya kama manene bati! ²⁴ Naumo wahi atha kupangela bimwene babali, mwafwa watha kuthindaho umo na kuthzemaho mukwabo, nambe bene akononokela umo nakushaula mukwabo. Kuwatha kupangela Njambi na bufuko. ²⁵ Olojo njendeka kuli yeni, kethi mulishoshomwene kuyoya cheni, bikajo bimukanwa nambe bikajo bimukalya; nambe byanamubila yeni, tukathzala bika. Mwafwa mwonyo watubakana byakulya, na mubila watubakanya buthalo? ²⁶ Kengeni tuthila ba mwilu. Kubekukuba nambe kuteja nambe kutulika mibishete, oloni Isheni wa mwilu akabalitha. Kumani kumwethi na theyo yeni kutubakana tuthila? ²⁷ Iyajo hakati keni atha kulishoshomwena cho abwethelako litangwa limo kumwonyo wendi? ²⁸ Cho bika mukalishoshomwena habuthalo? Thinganyekeni ha bishani byamumahya, mubakakolela. Bikebyo kubye kupanga, nambe kupanga buthalo. ²⁹ Oloni njendeka kuli yeni, nambe Solomoni mukufuka chendi kathzalele buthalo bumo bwachifwa chaba. ³⁰ Cho ngo Njambi akathiki mwila mumahya, ou ukalako lelo lika na imene bana umbila muliko, kumani katha kumithika yeni, eni baka kukulahela kwakundondo? ³¹ Ngechi kethi mulishoshomwene ngweni, 'Tukalya bika?' nambe 'Tukanwa bika?' nambe 'Bithalo muka tukathala bika?' ³² Omw na Bangentile bakatondo byuma ebi, na isheni wamwilu atanekeya ngwendi mubitonda byuma ebi. ³³ Oloni cha kulibanga kengethekeni bumwene bwendi, na byoshe ebi byuma baka myanabyo. ³⁴ Ngechibene, kethi mulishoshomwene lya imene, Mwafwa lya imene likalishoshomwena likelyo babenya. Litangwa ha litangwa lyakala na bubi bwalyo babenya.