¹ Cho Yesu ba mutwamenene mu mambo ku Muthzithzime na kumwetheka kuli lyabolo. ² Hanima ya kuthzila kulya ha matangwa makumi awana na mathsiki makumi na awana chakwilika kulya, wathzile njala. ³ Muka kumwetheka wethzile kuli ikeye na kwendeka ngwendi, "Nga umuna Njambi, kambeya awa mamanya alumuke makende." ⁴ Oloni Yesu wamukumbulwile na kwendeka ngwendi, "Bana chitoneka, 'Munu kakayoyela halikende lika, oloni halijwi lyoshe likatunda mukanwa ka Njambi.'" ⁵ Cho lyabolo wamutumine mu kati ka nganda yakuthzela na kumwaka helu lya njubo ya Tembele, ⁶ nakwendeka ngwendi, "Nga umuna Njambi, lyumbile obe libenya hathi, mwafwa ba chithoneka, 'Aka kambeya tungelo bendi naku kunyunga,' cho, 'baka kujundula helu namaboko abo, mangana ukelike kulimwakula mwanja wobe kulimanya.'" ⁷ Yesu wendekele kuli ikeye ngwendi, "Bana chithoneka lalo 'kethi uketheke Shukulu Njambi yobe.'" ⁸ Lalo, lyabolo wamutwalele ku Munkinda wa ulaha manene na kumumwetha bumwene byoshe bwakaye na bu mpahu bwacho. ⁹ Wendekele kuli ikeye, "Ebi byuma byoshe njikwanabyo, nga ulyumbila hathi na kunjithzumbangeya." ¹⁰ Cho Yesu wendekele kuli ikeye ngwendi, "Tunda aha, Satana! mwafwa banachithoneka, 'Mukathzumbangeya Shukulu Njambi yeni, nakupangela ikeye lika.'" ¹¹ Cho lyabolo wamuthethzele, cho kengeni, tungelo bethzile nakumupangela. ¹² Cho Yesu omu athzibile ngwabo Yowano banamwaka mu kamenga, welukile mu Ngalileya. ¹³ Wethethzele Nganda ya Nazaleti na kuya na kuyoyela mu Kapenamu, ei yakele ku ngenge ya lishali lyamu Ngalileya mu byela bya Zembuluni na Nafitali. ¹⁴ Ebi byasholokele mungana betethe bije Kapolofita Isaya wendekele, ¹⁵ "Lije libu lya Zembuluni nalije libu lya Nafitali, kuya ku lishali, kutubakana Yotani, Ngalileya yaba Njentile! ¹⁶ Banu baje batumamene mulithuthulungu banamono cheke chakama, nakuli baje batumama mu mutambela na bimbembenethi bya buthsi, hali bakebo cheke chabatunukilile." ¹⁷ Kutunda hathimbu ije Yesu waputukile kunangula ngwendi, "Tengulukeni mwafwa bu mwene bwa kwilu bunaija muyehi." ¹⁸ Hatimbu wakele nakwendela ku lishali mu Ngalileya, wamwene baje bandolome babali, Simona ou batumbula ngwabo Petulu, na Andelei ndolome yendi, banakutu manda mu lishali, mwafwa bakele baka kuta bithi. ¹⁹ Yesu wendekele kuli bakebo ngwendi, "Ijeni njikabeni, cho njimi tengulula kukala baka kuswinga banu." ²⁰ Hajebene bathethzela manela abo na kumukabangeya. ²¹ Omu Yesu akele nakuya kununda haje wamwene bandolome bekwabo babali, Yakomba muna Zebendi, na ndolome yendi Yowano. Bakele mu bwato na ishabo Zebendi na kutonga manda yabo. Wabathanene, ²² cho hajebene bathethzele bwato na baishe nakumukaba. ²³ Yesu waile mu Ngalileya yoshe, kulongetha muma Sinangonge abo, kwambulula muthzimbu wabu mwene na kuthaka mishongo nakubabala choshe kubanu. ²⁴ Uje muthzimbu hali ikeye waile mu Siliya mwoshe, cho banu banenele boshe baje babinjile mishongo yakulithethza thethza naku babala bakele na mamba, bakakushinya, na twepa. Yesu wa bakangwithile. ²⁵ Mbunga yakama yamukabele kutunda ku Ngalileya, ku Ndekapoli, Yelusalema, na Yuleya, nakutubakana Yotani.