¹ Muli aje bene matangwa Yowano muka Kumbwitika wethzile na kwambulula mthzimbu mumambo ya Yuleya ngwendi, ² "Tengulukeni, mwafwa bumwene bwa mwilu buli ha yehi." ³ Mwafwa ou ikeye uje bandekeleho kuli Kapolofita Isaya, ngwendi, "Lwijwi lya umo anakuthana mu mambo, 'Bwahetheni ngila ya Shukulu ikale ya kuthungama.'" ⁴ Cho Yowano wathzalele buthzalo bwa maka a ngamela na mwiba wa lilambu mu mbunda yendi. Kulya chendi bimbimba na buki bwamushwata. ⁵ Cho Yelusalema, Yuleya yoshe na mutambela woshe wakuthzenguluka Ndonga ya Yotani waile kuli ikeye. ⁶ Baba mbwitikile mu ndonga ya Yotani kuli ikeye, oku na kuli tabela bubi bwabo. ⁷ Oloni omu amwene ngwendi ba Faliseo naba Sanduse babangi banakwijakuli ikeye na ku bambwitika, wendekele kuli bakebo ngwendi, "Eni bana ba mambwambwa iyajo ou namileke kutewa ku kuthzangametha chije chili nakwija? ⁸ Imeni bushuka bwa kutenguluka. ⁹ Kethi muthinganyeke kwendeka kuli yeni babenya ngweni, 'Tuli na kukulwila wetu Ambalahama.' Mwafwa njendeka kuli yeni ngwange Njambi natha kwindula bana ba Ambalahama nambe kutunda ku ma manya awa. ¹⁰ Ngimbu bana yaka laja kumithzi ya miti. Cho woshe owo muti ukahona kwima bushuka bwa bubwa bakuteta na ku umbila mu tuhya. ¹¹ Njina kumimbwitika na mema ku kutenguluka. Oloni ou anakwija hanima yange ali na nthzili ya kujitubakana, cho yange kunjapandele kwambata nambe biñaku byendi. Akamimbwitika na muthzithzime wakujela na tuhya. ¹² Lishehwa lyakupekwilako mbuto yendi yahathi lili muli boko lyendi cho aka kungila tilika yendi mubishete. Oloni akennyeka bujumbu bwoshe na tuhya otu kubakatha kuthzima." ¹³ Cho Yesu wethzile ku Ndonga ya Yotani kutunda ku Ngalileya mangana bamu mbwitike kuli Yowano. ¹⁴ Oloni Yowano wethekele ku mubyanetha, ngwendi, "Njishaka yobe unjimbwitike nkuma yobe uija kuli yange?" ¹⁵ Yesu wendekele kuli ikeye ngwendi, "Chitabethe oni, mwafwa chinatela yetu kwetetha buthunga bwoshe." Cho Yowano wachitabethele. ¹⁶ Hanima ya kumumbwitika, Yesu wakandukile mu mema, cho taleni, melu ashokolokele kuli ikeye. Wamwene muthzithzime wa Njambi kushuluka muchifwa cha katela nakutumama hali ikeye. ¹⁷ Taleni, Lijwi lyatundile mwilu nakwendeka ngwabo, "Ou ikeye Munange injashaka.Njabwahelela muli ikeye."