¹ Yesu watundile mutembele nakuya mu bgila yendi. Bandongethi bendi bethzile kuli ikeye nakumuleka binjubo bya tempele. ² Oloni wabakumbulwile ngwendi, "Kumwethi na kumona byuma byoshe ebi? Buthunga njendeka kuli yeni ngwange, kukwethi limanya eli bakathethza helu lyalikwabo eli ba konowa ku witha hathi lyahi." ³ Omu atumbamene ha litundu lya Libeta, bandongethi bethzile kuli ikeye ngwabo, "Tulekeni, byuma ebi bikasholoka thimbu muka? Bimwetho muka bikasholoka ha kwija chobe naha kukuma cha lifuti?" ⁴ Yesu waba kumbulwile ngwendi, "Nyanyameni mangana kukelike umo wa kumyungumwitha. ⁵ Mwafwa babangi bakaija mulithzina lyange. Bakendeka ngwabo, 'Yange Kilisitu,' cho bakongumwitha babangi. ⁶ Mukathziba binthzita na mithzimbu ya nthzita. Moneni ngwendi kumwashotele bimbunge, mwafwa ebi byoshe byatela kulingika; oloni makumithilo akakala kanda kweta. ⁷ Mwafwa lifuti likalumukila likwabo lifuti, na bumwene bukalamukila bumwene bukwabo. Kukakala njala na mindenda mubyela byakulithethza thethza. ⁸ Oloni echi chikakala lika kuputuka cha kuthemuka cha mishongo. ⁹ Cho bakamitwala ku kuyanda chakama na kumithsiya. Bakamithzinda ku mafuti oshe hamulonga wa lithzina lyange. ¹⁰ Cho babengi bakatenuka, nakwenda bungungu umo na mukwabo. ¹¹ Tupolofita bamakuli babangi baka katuka na kungumwitha babangi. ¹² Mwafwa kweneka kukaba mashiko chikatuma, cho chithzemo chababengi chikatonola. ¹³ Oloni ou akakwatetha nakushongo bakamwobola. ¹⁴ Ou muthzimbu waubwa wa bumwene baka wambulula mu kaye koshe kupwa bakaleho. Cho makumithilo akaija. ¹⁵ "Ngechi, omu mukamona chije chachibi chakunena kubulumuka, chije bendekele kuli kapolofita Ndanyele, Kwimana muje mwakuthzila" (echeleni mukakutanga chimulumbunukile), ¹⁶ "Echeleni baje bakakala mu Yuleya baka tewele ku malundu, ¹⁷ ou akakala helu lyanjubo kethi akashuluke nakwambata chili choshe munjubo yendi, ¹⁸ na ou akakala muliliya kethi akeluke nakwambata mukanjo wendi. ¹⁹ Oloni bukalu kuli baje bakakala na memo nabaje bakakala na kujamwetha bana babandondo muli aje matangwa! ²⁰ Lombeni mangana echi kushatuka kethi chikakale muchithika nambe ha Sabata. ²¹ Mwafwa kukakala kuyanda chakama manene, echi kandalaja chikaleko kutunda kumaputukilo a lifuti kweta ku lelo, embwe, kuchi ka kalako lalo. ²² Kubanga nomu bakahilwitha aje matangwa, kukwethi mibila ije bakobola. Oloni hamulonga waba banashakula aje matangwa bakawawihitha. ²³ Cho ngakukakala umo akamileka ngwendi, 'Lenga, Kilisitu uno!' nambe, 'Kilisitu uje!'kethi mukabitabele. ²⁴ Mwafwa ba Kilisitu na tupolofita bamakuli bakakatuka na kumwetha bimwetho na byakukomwetha, mangana bakamithzimbalethe, ngochongocho, nambe boje bashakula. ²⁵ Tala, njinakulekela lumo thimbu kanda. ²⁶ Ngachije, nge bendeka kulihobe ngwabo, 'Kenga, ali mumambo,' kethi ukayemo. Nambe, 'Kenga, ali mukati ka njubo,' kethi ukachitabele. ²⁷ Mwafwa omu muhyato umunika kutunda ku mbwela nakutwala cheka ku muyatangwa, mukemo mwakaija Muna Munu. ²⁸ Kuje koshe kunathsila kathitu, kukeko kukakungulukila makubi. ²⁹ "Oloni hajebene hanima ya bihuli bya aje matangwa lithathe bakalithzibaletha, ngonde kuikasholola kumunika chayo, bingongonothi bikawa kutunda mwilu, cho na binthzili bya melu baka biningangetha. ³⁰ Cho bimwetho bya Muna Munu bikasholoka mwilu, na miyati yoshe yahathi ikakala na kulila. Cho bakamona muna munu anakwija hamashelwa a mwilu na nthzili na bumpahu bwakama. ³¹ Akatuma tungelo twendi na kwohya chakama cha bitolombita, cho bakakungulula hamo baje bashakula kutunda ku mahunthzi awana, kutunda kushongo imo kweta kushongo ikwabo ya mwilu. ³² "Tangeleni ku chiti cha mukuyu. Haje thimbu iputuka minungo kulombela na kujobelela maputa, muthzibuka ngweni ndombo ili ayei. ³³ Cho lalo, omu mumona byoshe ebi byuma muthzibuke ngweni ali ayei, kubikolo bene. ³⁴ Chili njendeka kuli yeni ngwange, echi chithemunwina kuchiketi kubanga bi byuma byoshe binasholoka. ³⁵ Lilu na mahu biketa, oloni lijwi lyange kuliketi. ³⁶ Oloni kwetheka na litangwa na thimbu oyo nou naithzibuka wahi, nambe tungelo ba mwilu, nambe Mwana, oloni kubanga Tate lika. ³⁷ Ngwe muje akele matangwa a Nowa, mukemo chikakala na kwija cha Muna Munu. ³⁸ Mwafwa mumatangwa aje thimbu kanda libathzi bakele nakulya na kunwa, kushomboka na kushombwetha kweta na kulitangwa akobelele Nowa mu bwato, ³⁹ cho kubathzibukile nambe chimo kweta nomu libathzi lyethzile naku banyongetha boshe--mukemo chikakala kwija cha Muna Munu. ⁴⁰ Cho banalume babali bakakala mulihya --umo bakamwambata, mukwabo bakamuthethza. ⁴¹ Banakathzi babali bakakala ku n'unju na kutwa--umo bakamwambata, mukwabo bakamuthethza. ⁴² Ngachije kaleni bakunyanyama, mwafwa kumwatanekeyele litangwa muka akaija Shukulu yeni. ⁴³ Oloni tanekeyeni echi, nge babenya njubo watanekeyele thimbu muka ya buthsiki yaija mwithzi, nga wakele na kunyanyama cho ngwe katabethele njubo yendi kuikobela ku muthzi. ⁴⁴ Ngachije mukale bakulyanganya, mwafwa Muna Munu akaija hathimbu ouo kumwakulahelele. ⁴⁵ "Cho iya ou ngamba wa lukulahelo na mana ou ibenya njubo naka kutala njubo yendi mangana athe kubana kulya chabo ha thimbu inapande? ⁴⁶ Wakukwithiwa ou ngamba bakawana kuli shukwaina ali nakulinga ngocho omu akaija. ⁴⁷ Chili njendeka kuli yeni ngwange uje shukwaina akamwaka kutala bufuko ali nabwo boshe. ⁴⁸ Oloni nge ngamba wamubi andeka mu mbunge yendi ngwendi, 'Shukwaina nakotokela,' ⁴⁹ na kuputuka kupupa baje bangamba bakwabo, cho na kulya na kunwa nabaka kupenda, ⁵⁰ cho shukwaina wauje ngamba akaija halitangwa lije ngamba kakulahelele na hathimbu ije kathzibukile. ⁵¹ Uje shukwaina akamubatula mubipuka nakumwana mwela hamo nabaka makuli, oku kukakala kulila nakuhingenjenga ku mayo.