¹ Cho hathimbu ije bandongethi bethzile kuli Yesu nakwendeka kuli ikeye ngwabo, "Iyajo wapwa wakama ku tubakana bakwabo boshe mu bumwene bwa mwilu?" ² Cho Yesu wa thanene mwanike wa mundondo kuli ikeye, naku mwimika a kati kabo, ³ na kwendeka ngwendi, "Chili bene njimileka, umonathena tenguluka na kupwa ngwe banike ba bandondo, kumuka kobela mu bumwene bwa mwilu nameme kamandondo. ⁴ Na muchifwechi, uje woshe ya likehetha ikeye babenya ngwe ngechi ou mwanike wa mundondo cho ikeye bene wa kama kutubakana bakwabo boshe mu mwene bwa mwilu. ⁵ Uje woshe ya tanbula mwanike wa mundondo ngwe ngechi mwou mulithzina lyange na tambula yange. ⁶ Oloni ou woshe ya nenetha umo wababandondo baje bakulayela muli yange kwonowa kulama lukulahelo lwabo, chipwa chachibwa manene kuli ikeye ku mu kuti iya limanya lya kama kama muthingo yendi, cho lalo na ku mumbila a nthinga ya mema a kalunga. ⁷ "Lubinda lwa hano a kaye mwafwa akala bya bingi bya kwonowetha banu ku lama lukulahelo lwabo! Byuma bya kwetheka banu kubanga bene buje, oloni lubinda lwa kama kuli uje munu uje muli ikeye mukemwo mwitila bya kwetheka banu! ⁸ Umona ngwe liboko lyobe indi lindi lyobe likunenetha kuthzimbaletha lukulahelo lobe, liteteko na kulyumbila ku lyala nobe. Omo chachibwa manene kuli yobe ku kobela mu mwonyo na katengu kutubakana ku kumbila mutuya twa myaka yoshe na maboko obe abali nameme na mendi obe abali. ⁹ Umona ngwe lisho lyobe linenetha kwonowa kulama lukulahelo lobe, lichokobolemo na ku lyumbila ku lako nobe. Mwafwa chibwaha manene kulin yobe kukobela mu mwonyo na lisho limo kutubakana ku kumbila mungehena ya tuya na mesho oshe abali. ¹⁰ Munapande ku mona ngweni kumu yengula nameme umo wa ba bandondo. Mwafwa nji mileka ngwange mwilu tungelo twabo thimbu yoshe bakakala ku mesho a tate ali mwilu. ¹¹ Mabulu amabwa akulaja aba Giliki kuwakele na bithona ngwe omo bana watengulula, " Mwafwa Muna Munu wethzile na kuthokola bije byoshe bya kuthzimbala." ¹² Muyongola bati ali echi? Oshe uje munu ngwe ali na chiita cha tununu, kuthubuka umo wabo na thzimbala, cho kumani kathethze baje makumi a tanu na awana na batanu ba bawana kuje ku kumulo wa munkinda nakuya na ku shakethzeka uje umo na thzimbala? ¹³ Omwoni nga na muwana, buthunga bene njendeka kuli yeni ngwange, abwahelela ali uje umo ku tubakana ali baje makumi a tanu na awana na batanu na ba wana baje bana jenekele ku thzimbala. ¹⁴ Muchifwa chimo lika, kethi ngwe chithzango cha Ishweni wa mwilu kulinga ngwabo nambe umo lika wa aba banike babandondo aka nyonge. ¹⁵ "Umona ngwe ndolome yobe na bulumuna kuli yobe, ya kuli ikeye na kuka muleka uje mulonga wana lingi, olojo inapande kupwa mukati kobe nendi lika. Chojo ngwe a tolilila kuli yobe, cho unobola ndolome yobe. ¹⁶ Oloni ngwe katondo ku tolilila kuli yobe, cho lanyako weka umo nambe babali ba kuya nabo kuli ikeye mangana kuka kale bukaleho bwa majwi a kufuma mu tunwa tubali nambe tutatu. ¹⁷ Olojo ngwe lalo katondo kutolilila kuli baje boshe, cho ambulula ije n'anda ku chikungulwilo. Oloni umononi abyana lalo ku tolilila kuchikungulwilo, cho mwambateni kupwa ngwe munu uje muka kujeneka ku kulahela na muka kutambula lithimu. ¹⁸ Buthunga bene njimileka ngwange, byuma byoshe bije mukuta ano athi baka bi kuta na mwilu, cho lalo obyo byoshe muthzitula ano athi baka bithzitula na mwilu. ¹⁹ Cho lalo njimi leka ngwange, umona ngwe mu bubali bweni muli thzibathana ano athi achuma choshe choshe chije ba lomba, Tate wa mwilu akaba lingilacho. ²⁰ Mwafwa kuje kuna kungulukila ba bali nambe batatu mu lithzina lyange, nange bene njili kuje mukati kabo." ²¹ Chojo Petulu wethzile na kwendeka kuli Yesu ngwendi, "Mwene, bithimbu bingaijo obyo ndolome yange napande kunji bulumuna olojo yange nji twaleleleho ku mu thambetha? Bithimbu bitanu na bibali taindi?" ²² Chojo Yesu wendekele kuli ikeye ngwendi, "Kunjethi na ku kuleka ngwange bithimbu bitanu na bibali, olojo bithimbu makumi a tanu na abali na bithimbu bitanu na bibali. ²³ Ngocho bene bumwene bwa mwilu buna lifuko na mwene umo uje wa tondele ku kunguluka bimbongo byendi bije bangamba bendi bambatele kuli ikeye. ²⁴ Ngamba umo uje wakele na mukuli wa makulukathzi likumi abimbongo kuli ikeye. ²⁵ Oloni a kulinga uje ngamba kakele na chifwa choshe cha kwiluthilamo bije bimbongo, uje shukwaina wa shikile ngwendi uje ngamba ba mulandeythe, kwakaho na munakathzi wendi na bana bendi na byoshe bije bya kele nabyo, manganoni uje mukuli wendi ba ufwete. ²⁶ Oloni uje ngamba wa wilile athi, na kubulyama kuli ikeye, nakwendeka ngwendi, Shukwaina, kachi nji bandameneniko tai, chojo nji ka mifweta byoshe.' ²⁷ Chojo na uje shukwaina ya uje ngamba, a mulonga waku mu thzibila mema ku mbunge, wamwecheleleko cho lalo wa mukonekelele na uje bene mukuli wa kele nawo. ²⁸ Oloni uje bene ngamba omwo waile anja wa li wanene na umo wa bangamba bakwabo, ou wakele na mukuli wa chita chimo cha bimbongo. Chojo wakwatele uje mukwabo, na kuputuka ku mu tikinya a milibu, nakwendeka kuli ikeye ngwendi, 'Fweta obyo wa tambwile kuli yange.' ²⁹ Olojo uje mukwabo ngamba nendi wa wililile athi na ku mulomba na kulikehetha kwakama, kwendeka ngwendi, 'Njibandamineko tai, cho nji ka kufweta.' ³⁰ Oloni uje ngamba wa kulibanga wa byanene. Chojo, wa twalele uje mukwabo na kuya na ku mumbila mu kamenga noho a kafweta uje mukuli wa kele nawo kuli ikeye. ³¹ Omwoni baje bangamba bakwabo bamwene bije bi bya sholokele, ba lubalele. Chojo bethzile kuli uje shukwaina nakumuleka byoshe bije bya sholokele. ³² "Chojo shukwaina ya uje ngamba wa mu thanene na kwendeka kuli ikeye ngwendi, 'Yobe ngamba wa mubi, yange nja kukonekelele uje mukuli wobe wa kama ngachije a mulonga wa kulinga u nanjilombele. ³³ Kumani yobe kuwa pandele kuthzibila n'eke mukweni ngamba, ngwe omu yange nja kuthzibilile n'eke yobe?' ³⁴ Chojo uje shukaina wa lubalele manene ngechi bene wa mwanene mu maboko ya baje baka kuyandetha kweta noho a kafwetele mukuli wendi woshe. ³⁵ Chojo echi chikecho na Tate wa mwilu a kalinga kuli umo na umo weni umona ngwe ku mu thambetha ndolome yobe ku fuma kwithi ya mbunge yobe."