¹ Bafaliseo na ba Sanduke bethzile cho bamwethekele na kumwihula mangana abosholwelechithzibukitho cha muma shelwa. ² Oloni wabangumbulwile na kwendeka kuli bakebo ngwendi, "Kuthimbu ya chingwethzi,mwendekele ngweni,'ikapwa thimbu ya ibwa, mwafwa luli likapwa lya kubenga.' ³ Ngwe ku thimbu ya mutondo, 'ikapwa thimbu ya chimbuthe, mwafwa lilu lakapwa lya mashelwa na kubenguluka.' Chojo muthzibuka kunongonona sholoka cha lilu,oloni kumwatha kulumbununa bumwetho bya thimbu. ⁴ Chikota cha bubi na bilinga bya bukwithzi chithetela chimwetho,oloni na chimo chahi chibakabana kubanga chimwetho cha Yona.'' Cho Yesu wabathethzele na kuya. ⁵ Omwo bandongethi betele kuthambwa likwabo,bebalele kwambata likende. ⁶ Yesu wendekele kuli bakebo ngwendi, "nyanyameni na kulinyunga ku muthima waba Faliseo naba Sanduke. ⁷ Cho bandongethi baliyongwele mukati kabo na kwendeka ngwabo, "Mwafwa kutwambatele likende." ⁸ Yesu wathzibukile echi cho wendekele ngweni, 'Yeni balikulahelo lya lindondo,bikajo muthinganyekele hakati keni na kwendeka ngweni mwafwa kumwambatele likende? ⁹ Kumani kanda muthzibithithe nambe kwanuka mikasha itanu ibalile baje makulukathzi atanu,cho bingalu bingahi mwashulithile? ¹⁰ nambe mikasha itanu na ibali ibali makulikathzi awana,cho bingalu bingahi mwashulithile? ¹¹ Cho chinapu bati honi kwakujeneka kuthzibithitha ngweni kunjakele na kwendeeka kuli yeni hamulonga wa likende? Nyanyameni na kulinyunga ku muthima waba Faliseo naba Senduke." ¹² Cho bathzibithithile ngwabo kakele na kubaleka kulinyunga ku muthima wa mulikende,oloni kulinyunga kukulongetha kwa ba Faliseo na ba Sanduke. ¹³ Omwo Yesu wethzile ku mutambela kuyehi na Kaseliya Filipu,wehwile bandongethi bendi, wabehwile ngwendi, "'Indijo banu bendeka ngwabo Muna Munu ikeye iyajo?" ¹⁴ Cho bamukumbulwile ngwabo, yobe Yowano mukakumbwitika; bamo ngwabo,Elinja; cho bakwabo ngwabo,Jelemiya, nambe umo waba polofita." ¹⁵ Cho wendekele kuli bakebo ngendi, "Che yeni honi ngweni yange iyajo?" ¹⁶ Wakumbulwile ngwendi, Simona Petulu wendekele ngwendi, "Yobe Kilisitu,Muna Njambi wa kuyoya." ¹⁷ Cho Yesu wakumbulwile na kumuleka ngwendi, "Unapu wakukwithula yobe,Simona muna Yona, mwafwa kethi mubila nambe maninga binajombolola echi kuli yobe olojo Tate ali mwilu. ¹⁸ Cho lalo njikuleka ngwange yobe Petulu,haje ha limanya njiakatunga chikungulukilo change. Cho bikolo bya ngehena kubikatha kubihyana. ¹⁹ Njikakwana bithapi bya bumwene bwa mwilu. Cho byoshe ukakuta hano hathi bakabikuta na kwilu,cho chije choshe ukathzitula hathi bakachithzitula na mwilu." ²⁰ cho Yesu wakameyeye bandongethi yendi ngwendi kethi baleke nambe umongwabo ikeye Kilisitu. ²¹ Kutunda ije thimbu Yesu wapukile kuleka bandongethi bendi ngwendi napande kuya ku Yelusalema, nakuyanda kukayanda ha byuma bya bingi mumaboko a bakulunu na tupilisitu bakama na baka kusoneka majwi a mashiko, baka muthsiya, na kumuthanguka ha litangwa lya muchitatu. ²² Cho Petulu wamushondolwethele hamukulu na kumubindika,nakwendeka ngwendi, "Echi chikale kulako nobe,Shukulu; echi kethi chikalingiwe kuli yobe." ²³ Oloni Yesu wamukumbulwile nakwendeka kuli Petulu, " Ita kunima yange, Satana! unapu chimbundi cha kutanukaho kuli yange,mwafwa kuwethi kunyunga byuma bya Njambi,oloni byuma bya banu." ²⁴ Cho Yesu wendekele kukli bandongethi bendi ngwendi, "ngwe kuli umo atonda kunjikabangeya,napande kuli byana,ambate chilindakano chendi, na kunjikabangeya. ²⁵ Mwafwa woshe ou atonda kunyunga mwonyo wendi akauthzimbaletha, cho woshe ou athzimbaletha mwonyo wendi hamulonga wange akauwana. ²⁶ Mwafwa chikajo chikwatha munu woshe ngwe afuka kaye koshe olojo athzimbalethe mwonyo wendi? Bikajo munu atha kwana bwa kulyetheketha na mwonyo wendi? ²⁷ Mwafwa Muna Munu akaija mu bumpahu bwa baishe na tungelo twendi. Cho akafweta munu woshe kwetheketha na bilinga byendi. ²⁸ Chili njendeka kuli yeni ngwange,kuli banu bamo hakati keni banemana hano baje kubakamono Muna Munu akaija mu bumwene bwendi."