¹ Ume ndaamba cha kushinizha kwiita mwa Kilisito. Ume nshibeyi pe, alimwi buntu bwangu bulapa bumboni mukusololelwa u Moza Usalala ² kaambo ume ndyuusile chini chini alimwi u kuchisa kutamana mu monzo wangu ³ Kaambo kuti nichaakukozheka ume lwangu ndimwini kunshinganya u kung'andaanya kuhwa kwa Kilisito u kaambo ka bakwesu, bantu ba mushobo wangu ku mubili. ⁴ Baba mba Izilaili. Balikwete buzhale, u bulemu, u shihwuminano, u chipo cha mulawo, u busebezhi bwa muchikombelo, alimwi u shishomezho. ⁵ Bantu babo bakasokela ku luhwubo lukando lolo lwalo Kilisito mwaakahwa ku mubili--walo ngu Leza aali shoonse. Natembaulwe lyoonse. Ameni. ⁶ Pele tachili ukoya ati izwi lyaka leza lyakakilwa pe. Kaambo tabali boonse mu Izilaili kwaamba ati chini chini boonse mbamu Izilaili. ⁷ Naaba kwaamba ati boonse mba lunungu lwaka Abulahamu chini chini mbanakwe. Pele, "Kwiita mwa ka Iyizeki lunungu loonse mulukakezhila." ⁸ Nkukuti, bana baku mubili tabali banakwe Leza. Pele bana ba chishomezho balibikilwe kuba ba lunungu lwakwe. ⁹ Kaambo leli ndizwi lya chishomezho: "Ku chiindi chechi nchichona Ume ndakashika, Saala ulakakwata mwana mweembezhi." ¹⁰ Kutali bulyo bobo, Pele Labeka aze wakamita ku mulombwana womwi, ushesu Iyizeki-- ¹¹ Kaambo bana kabatana kuzhalwa alimwi kabatana kuchita bubiyabi naa bubotu, kwaamba ati bukanze bwaka Leza kwiingayina u busale butolelele, ¹² kutali ku michito, pele kaambo kakwe wezo walo u woompolola--chakaambwa bobo kwakwe ati, "Mukando ulakasebezela mucheche wakwe." ¹³ Chakaba mbubona mbuchakalembwa: "Ndakafwuna Jakobo, pele ndakamusula Isawu." ¹⁴ Saa ninzho twaambe buti? Saa Leza taluleme? Kutabi bobo pe. ¹⁵ Kaambo wakaamba bolya kwa Mozesi, "Ndafwila luse wezo ngwikaafwila luse, alimwi ndakafwila inkumbu wezo ngwinjakufwila inkumbu." ¹⁶ Ubobo, takuli mbuli mbwaazanda muntu, naaba u kaambo ka wezo u lukanka, pele u kaambo ka Leza, walo utondezha luse. ¹⁷ Kaambo malembe alaamba bolya kwa Falawo, "Nku kaambo kako nchindakakubikila, kwaamba ati Ume ntondezhe insana shangu mulyuuwe, alimwi kwaamba ati izhina lyangu lizhibwe inshi yoonse," ¹⁸ Ubobo, Leza ulafwila luse aali wezo kufwumbwa ngwaazanda, alimwi kufwumbwa wezo ngwaazanda, ulamuzumya monzo. ¹⁹ Ulakonzha kwaamba bolya kulyuume, "Kaambooyi alimwi uchiyana butongo? Walo uzhi kale luzando lwakwe? ²⁰ Munzhila imwi, u muntu, ndiweni uwe nuukazha Leza? Saa checho chakabumbwa chilakonzha kwaamba kuli wakachibumba ati, "Kaambooyi wakamumba bolya?" ²¹ Saa mubumbi wiina cheelelo kuhwa kumufwuma womwi kubumba chibiya chakusebezha ku mulimo wa bulemu, alimwi chimwi ku chisebezha ku mulimo utali wa bulemu? ²² No kuti Leza, walo ulozha kutondezha bukali bwakwe alimwi u kuchita insana shakwe kwaamba ati shizhibwe, naatakaba shichamba kushizobwelo sha bukali shibambile kuzonauzha? ²³ No kuti naakachita bobo kwaamba ati atondezhe buhwubi ku bulemu bwakwe a shizobwelo sha luse, shesho nshaakabambila limwi sha bulemu? ²⁴ No kuti naakachitila limwi bolya kuli uswe, babo mbaakoompolola, kutali bulyo akati ka Juda, pele alimwi aa kati kabahwamashi? ²⁵ Mbubona mbwaamba mwa Hosiya: "Ndakoompolola bantu bangu babo batakaakuli bantu bangu, alimwi ungwaakufwini walo watakaakufwinwi. ²⁶ Alimwi chilakaba bobo awo ngoona nguchakaambilwa nkubabele ati, 'Umwe tamuli bantu bangu,' awo balakatewa ati ' mbana baka Leza upona.''' ²⁷ Ayizaya wakapozomoka ku twaambo twaka Izilaili ati, "Nikuba kwaamba ati bana ba Izilaili balakaba ukoya musenga wa kulwaatele, mba shoonto bulyo baya kufwutulwa, ²⁸ Kaambo Mwami ulachita mbubona bwaamba izwi lyakwe anshi ano chakumaninina alimwi chakutachelwa pe." ²⁹ Mbubona mbwaakaamba Ayizaya mushinshimi ati, "Naakuti Mwami wa makamu naatakatushiila ba lunungu lwesu, nitwaakuli ukoya Sodomu, alimwi nitwakaba bwakaba Gomola." ³⁰ No tulaamba buti ninzho? Kwaamba ati bahwamashi, babo batakaakukapula bululami, bakabuyana bululami, bululami kwiita mu lushomo. ³¹ Pele Izilaili, wezo wakaakukapula mulawo wa bululami, bayina nibakabuyana bululami u kaambo ka mulawo. ³² Kaambooyi? Kaambo bayina nibakachikapula kwiita mu lushomo, pele ukoya kwiita mu michito. Bakalifwumpula kwibwe lifwumpuzha, ³³ mbubona mbukulembelwe ati, "Langa, Ume ndooneka mu Ziyoni ibwe lifwumpuzha alimwi iibwe lifwumpula. Wezo walo ushoma muli ndilyo takaushiwa insoni pe."