¹ U bobo ninzho kwiina kubishiwa bishiwa kuli babo balo bali mwa Kilisito Jeso. ² Kaambo mulawo wa Moza wa bumi mwa Kilisito Jeso wakwaangulula kuhwa ku mulawo wa chibi alimwi u lufwu. ³ Kaambo mulawo checho nchiwatakaakulozha kuchita kaambo kakuti kooyina insana kwiita mu mubili, Leza wakachilozha. Wakatuma Mwanakwe mu mubili uuli ukoya wesu kwaamba abe chipayizho cha chibi, alimwi wakabisha bisha chibi mu mubili. ⁴ Wakachita bobo kwaamba ati shizandika mu mulawo shizuzukizhiwe muli uswe, uswe nituteenda buli buzanda mubili, pele buzanda Moza. ⁵ Babo bapona kwiingayina buzanda mubili balabika mizeezo yabo ku shintu sha mubili, pele babo bapona buzanda Moza balabika mizeezo yabo ku shintu sha Moza. ⁶ Kaambo kubika matelaishi ku mubili ndufwu, pele kubika matelaishi ku Moza mbumi alimwi u luumuno. ⁷ Matelaishi aku mubili mbushinkondonina Leza, kaambo tacheendelana u mulawo waka Leza, naaba tachibi bobo. ⁸ Babo balo bali mu mubili tabalozha kubotezha Leza. ⁹ U bobo, tamuli mu mubili pele muli mu Moza, naakuti chini chini Moza waka Leza ulapona mulyuumwe. Pele naakuti umwi wiina Moza waka Kilisito, wezo ati tali wakwe pe. ¹⁰ Naakuti Kilisito uli mulyuuwe, mubili uli fwile u kaambo ka chibi, pele Moza ulapona u kaambo ka bululami. ¹¹ Naakuti Moza wa wezo wakabusha Jeso kuhwa ku bafwu ulapona mulyuumwe, wezo walo wakabusha Kilisito kuhwa ku bafwu ulakamupa bumi amwe ku mibili yezhi ifwa kwiita mu Moza wakwe, wezo upona mulyuumwe. ¹² U bobo, nubakwesu, tulikwete chikwelete, pele kutali ku mubili kupona kwiingayina u mubili. ¹³ Kaambo kuti kupona kwiingayina u mubili, uli afwaafwi u kufwa, pele naakuti mu mu Moza ati yoonse michito ya mubili yafwa, ati mulapona. ¹⁴ Kaambo boonse u basololelwa ku moza wa Leza, baba mbanakwe Leza. ¹⁵ Umwe mwiina nimwakatambula Moza wa buzhike kwaamba ati umwe alimwi mupone mukutiya; pele mwakatambula Moza wa buzhale, muli chechi tulalila kwaamba ati, "Abba, Taata!" ¹⁶ Nguwena Moza wezo ulapa bumboni ku moza wesu kwaamba ati tuli banakwe Leza. ¹⁷ Naakuti tuli bana, Nkukuti alimwi aswe tuli ba shikukona, ba shilukono lwaka Leza. Alimwi tuli yanene ku lukono u Kilisito, naakuti chini chini twakapenga aze kwaamba ati tutambule bulemu antoomwi aze. ¹⁸ Kaambo ndatelaika ati mapenzhi a cheno chiindi taalozha kwiingayinya u bulemu bobo buya kuzubululwa kuli uswe. ¹⁹ Kaambo abo bulenge bulalangila u kulindila kuzubululwa kwa bana ba Leza ²⁰ Kaambo bulenge bwakaba bwa buliwo, kutali bwalo buli mbuzanda, pele kaambo kakwe wezo waka chibamba bobo, mu bulangizhi ²¹ bulenge bwini bulakanununwa kuhwa mu buzhike kuya ku kubola, kwaamba ati bukaletwe mu lwaanguluko lwa bulemu bwa banakwe Leza. ²² Kaambo tulizhi kwaamba ati bulenge boonse bulatongela alimwi bulapenga antoomwi mu kuchisa u buli ninzho. ²³ Kutali bobo bulyo, pele aswe lwesu tubeni, uswe intukwete michelo mitaanzhi ya Moza, tulatongela mukati kesu, u koya mbutulangila buzhalwe bwesu, u kunununwa kwa mibili yesu. ²⁴ Kaambo mu lulangilo lolu twakafwutulwa. Inzho kulangila koko kulibonya taluli lulangilo. Kaambo wezo ulangila kuli chechi nchalozha kubona? ²⁵ Pele naakuti tulalangila checho chalo nchitutaboni, ati tulachilangila mu bushichamba. ²⁶ Munzhila yezhi njiyona, Moza awo ulatuyohwa mu bulengushi bwesu. Kaambo tatuchizhi mbutweelele kukomba, pele Moza walo wini ulatukombela mukooloma chakutateelwa mazwi. ²⁷ Wezo walo u kapula kuhwa mukati ka myonzo ulizhi matelaishi a Moza, kaambo ulakombela bana Leza basalala kwiingayina u luzando lwaka Leza. ²⁸ Alimwi tulizhi kwaamba ati babo balo bafwini Leza, ulabasebezela shintu shonse antoomwi mu bubotu, kuli babo balo bakoompololwa kwiingayina u makanze akwe. ²⁹ Kaambo babo mbaakaakwizhi kale wakabasalila limwi kwaamba bayanane mu chinkonzha cha Mwanakwe, kwaamba ati babe bana bataanzhi akati ka banina banji banji. ³⁰ Babo walo mbaakasalila limwi, babo baba abo wakaboompolola. Babo mbaakoompolola, baba abo wakabalulamika. Babo mbaakalulamika, babo abo wakabapa bulemu. ³¹ Inzho, anu, twaambe buti ku shintu sheshi? Naakuti Leza ngu wesu, nguni ukonzha kutulwisha? ³² Wezo walo watakakasha mwanakwe mwini pele wakamwaaba u kaambo kesu toonse, mbubuti mbwaatakonzha kutupa shintu shoonse antoomwi u Mwanakwe? ³³ Nguni ukonzha kupa kaambo ku basale baka Leza? Leza inguwe walo u lulamika. ³⁴ Inguwe walo uzonauna? Kilisito Jeso inguwe walo wakafwa--kubaala checho, walo wakabushiwa--walo uuli kwitashi lya chilyo lyaka Leza, alimwi walo ulatukombela uswe. ³⁵ Nguni ukonzha kutwaandaanya kuhwa ku lufwuno lwaka Kilisito? Saa mapenzhi, naa makatazho, naa kupenzhiwa, saa ninzala, naa nchintanda, nishiba shitizha, niliba icheba? ³⁶ Mbubona buli mbuchilembelwe ati, "Kaambo kenu tulayayiwa chiindi choonse. twakaba ukoya imbelele shiya kuyayiwa." ³⁷ Inzho mu shintu sheshi shoonse twakazunda chibaala kwiita mwa wezo walo wakatufwuna. ³⁸ Kaambo nizho Ume ndalamwa kwaamba ati taluli lufwu, nibuba bumi, naa baangelo, naaba infwulumende shilela, nishiba shintu shaano mazuba, nishiba shintu shiya kuzhiza, nishiba insana, ³⁹ nibuba bulafwu buya mwizeulu, nibuba bulafwu kuya anshi, nichiba chintu chili buti cha kalengwa, checho chikonzha kung'andaanya kuhwa ku lufwuno lwaka Leza, lolo luli mwa Kilisito Jeso Mwami wesu.