¹ Nubakwesu, kuzandisha kwa monzo wangu alimwi u kukomba kwangu kwa Leza u kaambo kabo, ndufwutuko lwabo. ² Ume ndapa bumboni bwabo kwaamba ati bakwate kuzandisha Leza, pele kutali kwiingayina u luzhibo lwabo. ³ Kaambo, kukakilwa kuteelelesha sha bululami bobo buhwa kwa Leza, alimwi kukapula u kuchita bululami bwabo beni, bayina kuchilila bululami bwaka Leza. ⁴ Kaambo Kilisito ngu mamanino a mulawo wa bululami kuli babo boonse bashoma. ⁵ Mozesi wakalemba sha bululami buhwa ku mulawo: "Muntu wezo uchita shintu sheshi ulapona muli shisho." ⁶ Pele bululami bobo buhwa mu lushomo bulaamba bolya: "Utabi nuuwamba mu monzo wako ati, 'Nguni u konzha kuya kwizeulu?' (chechi, chilaamba kuleta Kilisito anshi); ⁷ alimwi utabi nuuwamba ati, 'Anu nguni ukonzha kuya mwilambwe liteeli?''' (Chechi, chilaamba kuleta Kilisito kuhwa ku busena bwa bafwu). ⁸ Pele anu chilaamba buti? "Izwi lili afwaafwi kulyuuwe, lili mu mulomo alimwi u mu monzo wako,"Leli ndizwi lya lushomo, lelyo nditukambauka. ⁹ Naakuti mu mulomo wako waamba ati Jeso Mwami, alimwi washoma mu monzo wako kwaamba ati Leza wakamubusha kuhwa ku bafwu, ulakafwutulwa. ¹⁰ Kaambo umwi ashoma mu monzo wakwe ukululamikwa, alimwi u mulomo aamba bobo ulafwutulwa. ¹¹ Kaambo malembe alaamba ati, "Woonse wezo ushoma mwakwe wiina naati a kaushiwe insoni." ¹² Kaambo kwiina lwandaano akati kaba Juda uba Giliki pe. Kaambo Mwami nguwena ngu Mwami wa bantu boonse, alimwi muhubi ku bantu boonse boompolola ezhina lyakwe. ¹³ Kaambo woonse wezo u wompolola ezhina lya Mwami ulakafwutulwa. ¹⁴ No balakamoompolola buti wezo walo ngu batakashoma? No balamushoma buti wezo ngubatakateelela? No balateelela buti kwiina mukambaushi? ¹⁵ Balalozha buti kukambauka, chita kuti batumwa?--Mbubona mbukulembelwe ati, "Taaliboteli matende a babo bakambauka mulumbe mubotu!'' ¹⁶ Pele tabali boonse bakoohwumina mulumbe mubotu. Kaambo Iyizaya wakaamba ati, "Mwami, nguni wakabushoma buhwobezhi bwesu?" ¹⁷ Ubobo kushoma kulazhiza kwiita mukuteelela, alimwi kuteelela kulaita mwizwi lyaka Kilisito. ¹⁸ Pele Ume ndaamba ati, "Saa bayina nibakaateelela?" Eeye, chini chini bakaateelela. "Izwi lyabo lyakaya inshi yoonse, alimwi mazwi abo akaya kushika kweela luundu." ¹⁹ U bobo, Ume ndaamba ati, "Saa ba Izilaili bayina nibakaateelela?" Cha kutaanguna Mozesi wakaamba ati, "Ume ndakamuchita kwaamba ati mukabachitile munyono babo ba mushobo wiina mbuubele. Ndakamuchita ukoya chishi chitateelelesha, Ume ndakamupilinganya kushika ku bukali.' ²⁰ Aze Iyizaya wakashinizha lelyo naakaamba ati, "Ndakayanwa kuli babo bayina u nibakankapula. Ndakalibonya kuli babo bayina u nibakambuzha buzha," ²¹ Pele kuba Izilaili ulaamba ati, "Buzuba boonse ndakaatandabika matashi angu kuli batachilila alimwi ku bantu bashichinguni."