¹ Inzho ndaamba ati, saa Leza wa bakaka bantu bakwe? Tachibi bobo pe. Kaambo ame mbubona ndimuna Izilaili, wa lunungu lwaka Abulahamu, mu mushobo waka Benjamini. ² Leza wiina naakabakaka bantu bakwe pe, babo mbaakakwizhi kale. Saa tweezhi mbwaamba malembe aka Elija, mbwaakamukombelezha Leza ku makani aka Izilaili? ³ "Mwami, ba bayaya bashinshimi bako, bachina u shipayililo shako shoonse. Ndime ndashaala bulyo iche, amana balakupula bumi bwangu." ⁴ Pele no Leza wakamwiingula buti? "Ume ndalizobolela ndimwini balombwana bali shuulu shili chiloba babo bayina nibakakotamina Leza wa bubeshi Baala." ⁵ Nikuba bobo, ku chiindi cheno acho kuli mweelwe mushoonto bulyo u kaambo ka busale bwa luse lwakwe. ⁶ Pele naakuti chilayitila mu luse, ati tachichizhimine a milimo pe. Nkukuti luse taluchili luse pe. ⁷ Chilibuti ninzho? Checho Izilaili nchaakaakukapula, chiina nichakayanwa, pele basale bakachiyana, alimwi banji banji bakaba ba shichinguni. ⁸ Chili mbubona mbuli mbu chilembelwe: "Leza wakabapa moza wa kuhwoolosha, menso kwaamba ati batachilozha kubona, alimwi u matwi kwaamba ati batachilozha kuteelela, kushikila u bwasunu." ⁹ Inzho Devidi ulaamba ati, "Bachite kwaamba ati itebulu lyabo kabe kooze alimwi u chishilaha, iibwe lilebya alimwi chibe chisubulo chabo. ¹⁰ Menso abo a kwate loofwe kwaamba ati batalozha kubona, alimwi myoongo yabo yoobe lyoonse." ¹¹ Inzho ndaamba bolya, "Saa bakalifwumpula kushika ku kuwa?" Chitabi bobo pe. Ubobo, kwiita mu kubisha kwabo, lufwutuko lwa kashika ku bahwamashi, kwaamba ati chibachise ku monzo u munyono. ¹² Inzho naakuti kubisha kwabo mbuhubi bwa mono mu luundu, alimwi naakuti bubishe bwabo mbuhubi bwa bahwamashi, no kuzuzukizhiwa kwabo kulakaba buti? ¹³ Pele ninzho ndaambila umwe nu bahwamashi, alimwi ndaakuchili mwaapositolo wa bahwamashi, ndakomenya mulimo wa butumwa bwangu. ¹⁴ Ambweni mukuchita bolya ndakonzha kupa ati bakwesu bafwe munyono. Ambweni bamwi balakafwutuka. ¹⁵ Naakuti ku bakaka kwabo chilaamba ati nkuzholololwa kwa luundu, no kuhwuminwa kwabo kuli buti pele chilakaba ukoya bakwata bumi kuhwa ku bafwu? ¹⁶ Naakuti michelo mitaanzhi ilasalala, nkukuti u mufwuma wa chinkwa washaala ulasalala. Naakuti muzanda ulasalala, nkukuti u mitabi ilasalala ayo. ¹⁷ Pele naakuti imwi mitabi yakakombolwa, naa uwe, uli mutabi wa mwisokwe wa olivi, wakabikwa antoomwi akati kabo, alimwi naakuti mwakaabana abo mu buhwubi bwa mizanda ya chisamu cha olivi, ¹⁸ utabi nulyeensheensha a mitabi yezho. Pele naakuti ulalyeensheensha, ati tulyuuwe nuukwatilile mizanda, pele ati mizanda njiikukwatilile. ¹⁹ Amana mulaamba ati, "Mitabi yakakosaulwa kwaamba ati ambweni ame ndasanganyiwa." ²⁰ Aza meni meni. U kaambo kakutashoma kwabo bakakosaulwa, pele umwe mulizhimine nchi u kaambo ka lushomo lwenu. Mutabi nimulisumpula mu matelaishi enu, pele amutiye. ²¹ Kaambo naakuti Leza wiina naakabambilila yezhi mitabi, takakonzha ku kubambilila amwe. ²² Langa , ninzho, ikumbu alimwi u bukali bwaka Leza: bukali bwakazhila ba Juda bakamuhwa mwizwi lyakwe, pele inkumbu shaka Leza shilazhiza nkumubele, naakuti mwatololela mu nkumbu shakwe. U bulyo amwe mulakakosolwa kuhwa ku nkumbu shakwe. ²³ Alimwi abo, kuti batatolelela mukutashoma kwabo, balakayanyanyiwa abo. Kaambo Leza ulakonzha kubayanyanya alimwi. ²⁴ Naakuti mwakakosolwa kuhwa buli mbuchibele chisamu cha mwisokwe cha olivi, alimwi kuleka mbuli mbuchibele cha kalungwa ku chisamu cha olivi chibotu, chilibuti ninzho yezhi, mitabi mini mini, ilalamatikwa buti ku mitabi yanjiyo ya chisamu olivi alimwi? ²⁵ Kaambo ume nshizanda kwaamba ati mukale kwiina nchimwizhi, nubakwesu, ku maseseke aza, kwaamba ati mutabi basongo mu matelaishi enu nubeni: Bushinguni bulakashika ku Izilaili chita mweelwe munji munji wa bahwamashi u kazhoke kwa Leza. ²⁶ U bobo woonse Izilaili ulakafwutulwa, mbubona mbuchilembelwe ati: "Mu Ziyoni mulakahwa mufwutuli. Ulakakusha bubiyabi kuhwa kwa Jakobo, ²⁷ alimwi chechi chilakaba chihwuminano changu nkubabele, lelyo ndakakusha shibi kuhwa nkubabele." ²⁸ Kwiingayina u mulumbe mbuubele, mbaba shinkondonina u kaambo kenu. Pele kwiingayina u kusalwa, mbuba nakufwunwa u kaambo kaba shaakale babo, ²⁹ Kaambo shipo alimwi u koompololwa kwabo kwa Leza kwiina u lonzha ku kulesha. ³⁰ Mbubona umwe kale kale mbumwatakachilila leza, inzho mwatambula luse u kaambo ka kutachilila kwabo. ³¹ Munzhila njiyona, inzho abo ba Juda bayina nibakachilila. Inzho bulumbu mbwakuti mbubona mbukwakatondezhewa luse kwenu abo mbubona balakatambula luse abo. ³² Leza wakachita kuli babo batamuteeleli kwaamba ati alozhe ku bafwila luse boonse. ³³ Haa, buhubi luzhibo alimwi u busongo bwaka Leza bwahwulisha! Bubeteshi bwakwe tabubi kukapula, alimwi inzhila shakwe tashilozhewa kuyanwa! ³⁴ "Anu nguni wezo uzhi mizeezo ya Mwami naa nguni ukonzha kumubula? ³⁵ Naa nguni wakamupa chintu Leza, kwaamba ati Leza akamuzholele?" ³⁶ Kaambo kuhwa kwakwe alimwi kwiita mwakwe shintu shoonse nshi shakwe. u kwakwe akube bulemu kwa lyoonse. Ameni.