¹ Ndamukumbila, nubakwesu, u kaambo ka luse lwaka Leza, amulipe mibili yenu kwaamba mube chipayizho chikwete bumi, chisalala, chitambulika kwa Leza. Bobu mbubusebezhi bwenu buli kabotu. ² Mutabi nimuliyanyanya u luundu, pele a mulibambulule kwiita mu kubambulula mizeezo yenu. amuchite bobo kwaamba ati musoleke alimwi muzhibe nchichiliye chibotu, chitambulika, alimwi u chizandika kwa Leza. ³ U kaambo ka luse lwa kapewa kulyuume ume ndaamba kwenu ati: Mutabi nimutelika lwenu nubeni chikubaazha mbumubele, pele, amuyingayinye bubeteshi bwenu, umwi uumwi kwiingayina ayela lushomo lolo Leza ndwaakamupa. ⁴ Kaambo tulikwete shizo shinji shinji mu mubili woonse, pele takuli kuti shizo sheshi shilikwete mulimo ukozhene pe. ⁵ Munzhila yezhi njiyona, uswe tubanji banji tuli mubili womwi mwa Kilisito, alimwi muli umwi nchizo cha umwi uumwi. ⁶ Tulikwete shipo shishiyene shiyene kwiingayina u luse lolo lwakapewa kulyuuswe. Naakuti umwi chipo chakwe ncha bushinshimi, achibe chichitwa kwiingayina u lushomo lwakwe. ⁷ Naakuti umwi chipo chakwe ncha busebezhi, naasebeze. Naakuti umwi ulikwete chipo cha kuyiisha, naayishe. ⁸ Naakuti umwi chipo chakwe nchakuzumya zumya, naazumye zumye. Naakuti umwi chipo chakwe nchakupa, naachichite cha monzo womwi. Naakuti umwi chipo chakwe nchakusololela, naasololele cha bunkutwe. Naakuti umwi chipo chakwe nchakufwila luse, naachite bobo chakubotelwa. ⁹ Lufwuno lwenu lutabi lwa kuupaupa amenso. Amuchikake chibi; amukakatile kuli checho chalo chibotu. ¹⁰ Ku makani a lufwuno lwa bakwesu, atukwatishe umwi umweenzhiina. Ku makani a bulemu, amupane bulemu ku umwi uumwi. ¹¹ Makani a kuchita kabotu, mutabi bakata. Makani a moza, amuzandishe. Makani a Mwami, amumusebezele. ¹² Amubotelwe mukulangila kwenu, amukwate shamba mwashikilwa mapenzhi, amushome mu kukomba kwenu. ¹³ Amwaabane shintu u banamusalazhi bantu bakwe Leza. Amuyane inzhila shimwi sha kutondezha bubohwu monzo. ¹⁴ Amubalongezhe babo balo ba mupenzha; a mubalongezhe mutabi nimu bashinganya. ¹⁵ Amubotelwe ubabo babotelwa; amulile ubabo balila. ¹⁶ Amube ba matelaishi womwi kuli umwi uumwi. Mutabi nimulisumpula, pele amutambule u bantu bayina mbubabele. Mutabi nimuba basongo mu matelaishi enu nubeni. ¹⁷ Utazhola chibi ku chibi. Chita shintu shibotu a bushu bwa bantu boonse. ¹⁸ Naakuti chilakozheka, mbubona mbuchiba kwako, amupone mu luumuno u bantu boonse. ¹⁹ Mutazhololelana chibi nubeni ubeni, nubafwunwa, pele amulekele bukali bwaka Leza. Kaambo kulilembelwe ati, "kuzholela bukali chili kwangu; Ndakabazholela ndimwini,' mbwaamba Mwami." ²⁰ Pele "naakuti shinkondonoko ulifwile inzala, mupe kulya. Naakuti ulifwile inyota, mupe chakunwa. Naakuti wachita bobo, ati walundika makala a mulilo a mutwi wakwe." ²¹ Mutabi nimuzundwa u bubiyabi, pele amuzunde bubiyabi u bubotu.