¹ Muntu woonse ulyeelele kupupulala baleli, kaambo kwiina bulelo bwakalibika bwini chita buhwa kwa Leza. Bulelo boonse buliko bwa kabikwa u Leza. ² U bobo wezo woonse ukaka bulelo bobo wakaka malailile aka Leza; alimwi babo babukaka balakapewa chisubulo. ³ Baleli tabatizha kuli babo balo bachita milimo mibotu, pele kuli babo bachita michito mibiyabi. Saa ulazanda kwaamba ati utakwati bukandu kuli babo bali mu bulelo? Chita chili kabotu, amana ulayana kulumbayizhiwa nkubabele. ⁴ Kaambo musebezhi waka Leza kwaamba amuchitile shibotu. Pele naakuti mulachita shibiyabi, amu mutiye; kaambo tasempula bulyo icheba liina nchilisebeza. Kaambo mutwanga waka Leza, ulikwete insana shakuzholela wezo walo uchita bubiyabi. ⁵ U bobo mulyeelele kubateelela, kutali bulyo u kaambo ka bukali, pele u kaambo ka matelaishi enu nubeni. ⁶ U kaambo ka chechi nchimupela mutelo. Kaambo baleli boonse mbatwanga baka Leza, nibachita mulimo lyoonse wezu. ⁷ Amutele kuli woonse wezo ngumukwatile shikwelete: amutele kuli wezo uyelele kutelelwa, amulubule kuli wezo ulubulilwa, amutiye wezo uyelele kutiiwa, amupe bulemu kuli uyelela kupewa bulemu. ⁸ Mutakwati chikwelete ku muntu, chita bulyo chakufwunana umwi uumwi. Kaambo wezo walo ufwini shimukobonina ati wazuzukizha mulawo. ⁹ Malayilile alaamba ati, "Utabi nuuchita bumambe, utabi nuuyaya, utabi nwiiba, utabi shimunyono," alimwi naakuti kuli amwi malayilile ati ali momu mumona, "Fwuna shimukobonoko mbubona mbuulifwini umwini." ¹⁰ Lufwuno talukonzha kubishizha shimukobonoko. Ubobo, lufwuno nduluzuzukizha mulawo. ¹¹ U kaambo ka chechi, mulichizhi chiindi, kwaamba ati ndiwoola lyenu lya kushishimuka kuhwa mutulo. U kwa ninzho lufwutuko lwesu lwaba afwaafwi kuleka lelyo nitwakashoma. ¹² Bushiku bwaumbuluka, bulazanda kucha. Ubobo atubike amabali milimo ya mushinze, twamana tusame shilwisho sha mumuni. ¹³ Atweende bweelele, ukoya mbutweenda chiindi cha muunza, kutali kuyaluluka mubukole nikuba mubu chakolwa; tuteenda muli sha bumambe naa bushaachihwule mwangu, alimwi mutali mu bulwati nikuba mubu shimunyono. ¹⁴ Pele atusolozhe Mwami Jeso Kilisito, kutali kusolozha sha mubili, kwaamba mubotezhe michito ya nshisho.