¹ No ninzho tulaamba buti? Saa tutolelele muchibi kwaamba ati luse luhwule? ² Bobo imbo pe. Uswe nitwakafwa ku chibi, mbubuti mbutukaakuchipona muli nchicho? ³ Saa tamwizhi kwaamba ati mbuli banji banji bakapapatizwa mwa Kilisito Jeso bakapapatizwa mu lufwu lwakwe? ⁴ Ubobo, twakazhikwa, aze kwiita mu lupapatizo mu lufwu. Chechi chakachitika kwaamba mbubona Kilisito mbwaakabushiwa kuhwa ku bafwu kwiita mu bulemu bwaka Ushi, aswe mbubona tulakalozha kweenda mu bumi bupiya. ⁵ Kaambo kuti naa twaswaangana aze mu lufwu lwakwe, mbubona bobo tulakaswaangana mu bubuke bwakwe. ⁶ Tulichizhi chechi, kwaamba muntu mukulu kulu wakakankaminwa aze kwaamba ati mubili wa chibi uzonaunwe. Chechi chakachitika kwaamba ati tutabi linji bazhike ku chibi. ⁷ Wezo walo wafwa wabikwa kuba mululami kuhwa ku chibi. ⁸ Pele naakuti twafwa u Kilisito, tulashoma kwaamba ati tulakapona antoomwi aze. ⁹ Tulizhi kwaamba ati mbwaali Kilisito wakabushiwa kuhwa ku bafwu, takafwi linji alimwi pe; lufwu lwiina linji insana aali nguwe. ¹⁰ Ubobo ukoya lufwu lolo ndwaakafwa ku chibi, wafwa lyomwi nana. Nikuba bobo, bumi bobo mbwaapona ulaponena mwa Leza. ¹¹ Munzhila yezho njiyona, mulyeelele kulibika lwenu nubeni kuba bafwu ku chibi, pele bapona mwa Leza kwiita mwa Kilisito Jeso. ¹² Ubobo mutalekela kwaamba ati chibi chimusololele mu mibili yenu ifwa kwaamba ati muchilile chizanda mubili. ¹³ Mutabi nimutola shizo shenu sha mibili ku chibi, kwaamba chibe chisebezho ku shintu shitaluleme. Pele amulibike lwenu nubeni kwa Leza ukoya babo bakakushiwa ku lufwu kuletwa ku bumi, atupe shizo sha mibili yesu kwa Leza kuba shisebezho shakusebezha ku bululami. ¹⁴ Mutabi nimuleka chibi kwaamba chimweendelezhe. Kaambo tamuchilelwa ku mulawo, pele mulalelwa mu luse. ¹⁵ Twaambe buti? Saa tuukuchita chibi kaambo kakuti tatucheendelezhiwa u mulawo, pele tuleendelezhewa u luse? chitabi bobo pe. ¹⁶ Saa tamwizhi kwaamba ati mwalibika lwenu nubeni kuba bazhike, mulaba bazhike kuli wezo walo ngu muchilile? Mulaba bazhike ku chibi, checho chitola ku lufwu, naa bazhike bachilila, checho chitola ku bululami. ¹⁷ Pele kulumba kube kwa Leza! Mbumwaakuli bazhike ba chibi, pele mwakachilila kuhwa ku monzo buyiishe bobo umwe mbumwakapewa. ¹⁸ Umwe mwakaangululwa kuhwa ku chibi, alimwi mwakaba bazhike ba bululami. ¹⁹ Ndaamba mu buntu u kaambo ka bulengushi bwa mibili yenu. Mbubona mbumwaaba shizo sha mibili yenu kuba bazhike ku shesho shitasalali alimwi u shitali mu mulawo, u chileta bubiyabisha, munzhila yezhi njiyona, a mwaabe shizo shenu sha mibili kuba bazhike ba bululami ku kusalazhiwa. ²⁰ Kaambo lelyo nimwakaakuli bazhike ba chibi, kamutazandika kuba ku bululami. ²¹ Ku chiindi checho, muchelo nzhi wezo ngumukwete wa shintu shesho ninzho shimuyazha insoni? Kaambo shiyanwa momu mu shintu shesho ndufwu. ²² Pele bobo mbumwaleka kuba bazhike ba chibi alimwi mwaba bazhike baka Leza, mulikwete muchelo wa bunamusalazhi. Bulumbu mbumi butamana. ²³ Kaambo bulumbu bwa chibi ndufwu, pele chipo chaka Leza mbumi butamana kwiita mwa Kilisito Jeso Mwami wesu.