¹ Inzho twalulamikwa kwiitila mu lushomo, tulikwete luumuno u Leza kwiita mu Mwami wesu Jeso Kilisito. ² Kwiita mwakwe aswe mutukwete manjililo kwiita mu lushomo kunjila mu luse lolo ndututuzhimine, alimwi tulalyeensheensha mu lulangilo lwa bulemu lwaka Leza. ³ Kutali chechi bulyo, pele alimwi tulalyeensheensha mu mapezhi esu. Tulizhi kuti mapenzhi alaleta kukakatila. ⁴ Kukakatila kulaleta mbutubele, alimwi mbutubele kulaleta lulangilo, ⁵ alimwi lulangilo taluusha insoni kaambo luzando lwaka Leza lwakakununwa mu myonzo yesu kwiita mu Moza Usalala, wezo wakapewa kuli uswe. ⁶ U koya nitwaakaakuchili balengushi, a chiindi cheelele Kilisito wakafwila bamuchita shibi. ⁷ Umwi ulakakilwa kufwila muntu mu lulami, nikuba ambweni umwi ulakonzha kusola kufwila muntu uuli kabotu. ⁸ Pele Leza wakatondezha luse lwakwe kuli uswe, kaambo ka lelyo nitwakaakuchili bashishibi, Kilisito wakatufwila. ⁹ Kubaazha awa, amana, ninzho bobo mbutwalulamikwa kwiita mu bulowa bwakwe, ulakatufwutula kuhwa ku bukali bwaka Leza. ¹⁰ U koya, lelyo nitwakaakuchili bashinkondonina, twakazholololwa kwa Leza kwiitila mu lufwu lwa Mwanakwe, kubaanzha awa, nitwakamana kuzholololwa, saa tulakafwutulwa kwiita mu bumi bwakwe. ¹¹ Kutali chechi bulyo, pele u kubotelwa mwa Leza kwiita mu Mwami wesu Jeso Kilisito, kwiita mwa wezo ninzho twatambula luswaangano. ¹² Inzho mbubobo, kwiita mu muntu womwi chibi chakanjila mu luundu, munzhila yezhi lufwu lwa kanjila kwiitila mu chibi. Amana lufwu lwakazandaala ku muntu woonse, kaambo boonse babisha. ¹³ Kuhwa nikwakaba mulawo, chibi kachilimo mu luundu, pele chibi tachibalwa awo ayina mulawo. ¹⁴ Nikuba bobo, lufwu lwakalela kuhwa kwa Adamu kushikila kwa Mozesi, aali u babo balo batakachita chibi ukoya kutachilila kwaka Adamu, walo nchikozhano cha wezo wakaakuchizhiza. ¹⁵ Pele chipo tachili ukoya kubisha. Naakuti kwiita mu kubisha kwa muntu womwi banji banji bakafwa, chilibuti luse lwaka Leza alimwi u chipo cha luse lwa muntu womwi, Jeso Kilisito, lukwatilizha banji banji! ¹⁶ Kaambo chipo tachili ukoya mbuchakaba chibi cha wezo muntu womwi. Kubetekwa kulachilila kubisha komwi alimwi chakaleta kubishiwa, Pele chipo chakachilila shibiyabi shinji shinji chamana chaleta kululamikwa. ¹⁷ Naakuti, kwiita mukubisha kwa womwi, lufwu lwakalela kwiita muli womwi, chilibuti kuli babo balo batambula luse alimwi u chipo chabululami bukaalela mu bumi kwiita muli womwi, Jeso kilsito. ¹⁸ Inzho, kubisha komwi kwakaleta kubishiwa kwa muntu woonse, mbubona bobo kwiita buchite bomwi bwa bululami bwakaleta kululamikwa alimwi u bumi bwa muntu woonse. ¹⁹ Ubobo kwiita mukutachilila kwa muntu womwi banji banji bakaba bashishibi, mbubona bobo kwiita mukuchilila kwa womwi banji banji balulamikwa. ²⁰ Inzho mulawo wakazhiza kuhwuzha bubiyabi. Pele awo chibi nguchilela, luse lulalela kubaala. ²¹ Chechi chakachitika kwaamba ati, lelyo chibi nichilela mu lufwu, alo luse lulalela kwiita mu bululami mu bumi butamana kwiita mwa Jeso Kilisito Mwami wesu.