¹ No tulaamba buti ku makani aka Abulahamu, shakale ushesu kwiingayina u mubili, nchaakayana? ² Naakuti Abulahamu wakalulamikwa kwiita mu milimo, uli kwete kaambo kamupa kulyeensheensha, pele kutali kubushu bwa Leza. ³ No malembe alaamba buti? "Abulahamu wakashoma Leza, alimwi chakabalwa kwakwe kuba mululami." ⁴ Inzho kuli wezo usebeza, bulumbu bwakwe tabubalilwa kuba chipo pe, pele ncheelelo chakwe. ⁵ Pele kuli wezo walo utasebezi amana u lashoma mwa wezo ululamika bashishibi, lushomo lwakwe lulabalilwa kuba bululami. ⁶ Devidi aze wakaamba shilonjezho a muntu wezo Leza ngwaakalulamika wiina milimo. ⁷ Wakaamba ati, "Mbalonjezhe babo balekelelwa bali michito mibiyabi, alimwi bali shibi shahwumbwa. ⁸ Mulonjezhe muntu wezo walo mwami ngwaatabalila shibi." ⁹ Saa bulonjezhe bobu mbwa babo bulyo bapalule, naa abo babo batali bapalule?Kaambo tulaamba ati, "Lushomo lwakabalilwa kwa Abulahamu kuba mululami." ¹⁰ No chakabalilwa buti kwakwe? Saa katana naa naakamana kupalulwa? Ka kutali naakapalulwa pele naatakaakuna kupalulwa? ¹¹ Abulahamu wakatambula chitondezho chakupalulwa kuba chaando cha bululami checho nchaakaakukwete kwiita mu lushomo lelyo naatakaakuna kupalulwa. Chakaba bobo kuti abe ushabo babo bashoma pele katali mupalule, kwaamba ati bululami bubalilwe kuli mbabo. ¹² Alimwi nguu shabo babo bapalule kutali bulyo bapalule pele babo abo beenda munzhila ya lushomo yezho ushesu Abulahamu njaakaakukwete naatakaakuna kupalulwa. ¹³ Chishomezho kwa Abulahamu alimwi u luhwubo lwakwe lwakuti u lakakona luundu chiina nichakazhiza kwiita mu mulawo pele kwiita mu bululami bwa lushomo. ¹⁴ Naakuti babo bapona kwiita mu mulawo kwaamba bakabe bashikukona, nkukuti lushomo lwabula mulimo, alimwi acho chishomezho chaba cha bulyo. ¹⁵ Kaambo mulawo ulaleta bukali bwa Leza, pele awo ayina mulawo, ayina kuusotoka. ¹⁶ U kaambo kako chilayita mu lushomo, kwaamba ati chishomezho chili a luse lolo luya kupewa kuli boonse ba luhwubo lwaka Abulahamu--kutali bulyo babo bachilila mulawo, pele abo babo baabana lushomo lwaka Abulahamu. Nguushesu wesu toonse, ¹⁷ mbubona mbuchilembelwe ati, "Ndakubika kuba ushi wa mashi woonse." Abulahamu kali a bushu bwaka wezo ngwaakushoma, wezo ngu, Leza, uupa bumi ku bafwu alimwi u chita shintu shitalibonya kuba shilibonya. ¹⁸ Mukulangila wakashoma kumwi katashomi, kwaamba ati ulakaba ushi wa mashi manji manji, kwiingayina u checho nchaakashimwina, "Bolya mbulukakaba luhwubo lwako." ¹⁹ Wiina naakabula insana mu lushomo, wakabika luseba lwakwe mwini ukoya mufwu (kaambo kakwete mwaanda wa myaka ya kuzhalwa) alimwi u kubula luzhalo kwaka Saala. ²⁰ Pele u kaambo ka chishomezho chaka Leza, Abulahamu wiina naakaleka kushoma. U bobo, wakazumishiwa mu lushomo alimwi wakapa bulemu kwa Leza. ²¹ Wakahwuminisha kuli checho Leza nchaakashomezha, aze kalonzha ku chizuzukizha. ²² U bobo acho chechi "chakabalilwa kwakwe kuba mululami." ²³ Pele mazwi "a kubalilwa kwakwe" ayina naakalembwa u kaambo kakwe iche pe. ²⁴ A kalembelwa aswe, alimwi chilakabalilwa u kwesu nitushoma mwakwe walo wakabusha Jeso Mwami wesu kuhwa ku bafwu. ²⁵ Wezu inguwe wezo wakaabwa u kaambo kashibi shesu alimwi wakabushiwa kwaamba tululamikwe.