¹ Anu ba Juda balababaala buti batali ba Juda? No kupalulwa kulaleta bubotuunzhi? ² Pele kuli bubotu bukando buyanwa. U chakutaanguna, ba Juda bakapewa buzubuluzhi buhwa Leza. ³ Inzho chilibuti naakuti bamwi ba Juda bayina lushomo? Saa kutashoma kwaba Juda kulakonzha kumanya bushomeshi bwaka Leza? ⁴ U koya mbuchitakonzha kuba. Ubobo, Leza naayanike kwaamba u lashomeka, nikuba bobo muntu woonse mubeshi. Mbubona mbuchakalembwa, "Kwaamba ati bulibonye bululami kwiita mu mazwi ako, alimwi chechi chilakonzha kuya kulibonya twakashika ku lubeta." ⁵ Pele naakuti kutalulama kwesu kulatondezha kutalulama kwaka Leza, twaambe buti? Saa tukalaamba ati Leza taluleme kuleta bukali bukando bwakwe aali uswe? (Awa ndaamba bwaamba bantu.) ⁶ Ukoya mbuchitakonzha kuba! Inzho awo Leza ulabeteka buti luundu? ⁷ Pele naa kuti kwiita mu bubeshi bwangu bushomeshi bwaka Leza bulahwuzha bulemu bwakwe, kaambooyi alimwi nchimbetekwa kuba shishibi? ⁸ Inzho twaamba bolya, balatutamikizha balaamba ati, alimwi bamwi balaamba ati, "Atuchite bubi, kwaamba ati bubotu buzhize"? Babo chisubulo chabo chilibeelele. ⁹ Anu twaambe buti? Saa uswe tuliluleme lwesu tubeni? Pe pe twiina. Pele twalengelezha kale ba Juda alimwi u ba Giliki, boonse bulyo, kuba mu chibi. ¹⁰ Chechi chili mbubona mbuli mbuchilembelwe: "Kwiina naaba womwi ululeme, kwiina naaba womwi; ¹¹ kwiina naaba womwi uteelelesha; kwiina naaba womwi uu kapula Leza. ¹² Boonse bakuhwa kwa Leza; boonse bulyo babisha. Kwiina naaba womwi uchita bubotu, kwiina, naaba womwi pe." ¹³ Mimino yabo nshuumbwe shili bukwazhi. milako yabo ilachenga. Mu milomo yabo muli bulohwu bwa bazoka." ¹⁴ "Mukanwa kabo mulizwile bukali u kushinganya." ¹⁵ "Maulu abo alafwambaana fwambaana kuya ku kutila bulowa. ¹⁶ Muzhila shabo muli kuzonauna u kupenzha. ¹⁷ Bantu baba bayina niba kazhiba inzhila ya luumuno." ¹⁸ "Ku menso abo tabamutiyi Leza." ¹⁹ Inzho tulizhi kwaamba ati shoonse shaamba mulawo, shilakwatilizha babo bali mu mulawo, kwaamba ati boonse babule bwakutama, alimwi luundu loonse lukalitabile kwa Leza. ²⁰ Kwiina muntu uuya kululamikwa kwiita mu milimo ya mulawo ku menso akwe. Kaambo kwiita mu mulawo kulaleta kuzhiba chibi. ²¹ Pele ninzho kutali kuhwa ku mulawo bululami bwa Leza bwazubululwa, koko mulawo alimwi u bashinshimi nkubapa bumboni-- ²² bululami bwa Leza kwiita mu lushomo lwa Jeso Kilisito kuli babo boonse bashoma. Kwiina lwaandaano, ²³ Kaambo boonse bantu bakabisha u kulela ku bulemu bwaka Leza, ²⁴ pele ninzho balalulamikwa mu luse lwakwe kwiita mu lununuko lolo luli mwa Kilisito Jeso. ²⁵ U bobo Leza wakapa Kilisito Jeso kwaamba chibe chinunuzho cha bulowa bwakwe kwiita mu lushomo. Wakapa Kilisito kuba chitondezho cha bululami bwakwe, kaambo ka kutazhibaluka shibi shakale kale ²⁶ mu bushichamba bwakwe. Koku kakuli kutondezha bululami bwakwe ku chiindi cheno, kwaamba abe mululami alimwi u lulamika wezo u kwete lushomo mwa Jeso. ²⁷ No nkulikwi kulyeensheensha? Takwiwo pe. Kwiita mu mulawo uuli buti? uwa milimo? Pe pe, pele kwiita mu mulawo wa lushomo. ²⁸ Inzho tulaamba ati muntu u lalumikwa u lushomo kutali kwiita mu milimo ya mulawo. ²⁹ Na sa leza ngu Leza waba Juda balo? Sa tali Leza wa bahwamashi abo? Ee ee, ngwa bahwamashi abo. ³⁰ Naakuti, chini chini, Leza uli womwi, ulalulamika bapalule mu lushomo, alimwi u batali bapalule kwiita mu lushomo. ³¹ Saa tuusowe mulawo kwiita mu lushomo? Pe pe chitabi bobo! Pele, atuzumye zumye mulawo.